ۆەتنامعا ۇشپاق بولعان قاراعاندىلىق اۋە كومپانياسىن سوتقا بەردى، دەپ حابارلايدى Dalanews.kz.

قاراعاندى تۇرعىنى استانا-فۋكۋوك-استانا باعىتى بويىنشا جالپى قۇنى 420 مىڭ تەڭگە بولاتىن ءتورت اۋە بيلەتىن ساتىپ العان. ۇشۋعا ءبىر تاۋلىك قالعاندا اۋە تاسىمالداۋشى جولاۋشىنى رەيس توقتاتىلعانى تۋرالى حاباردار ەتكەن. رەيس توقتاتىلۋىنا سەبەپ – وۆەربۋكينگ، ياعني اۋە كەمەسىندەگى ورىن سانىنان ارتىق مولشەردە بيلەتتەر ساتىلۋى.

بالاما رەتىندە اۋە كومپانياسى بيلەتتەردىڭ قۇنىن قايتارۋدى نەمەسە باستاپقى جوسپارلانعان كۇننەن 2 تاۋلىككە كەش ۇشاتىن الماتى-دانانگ-الماتى باعىتىنا اۋىستىرۋدى ۇسىنعان.

274 مىڭ تەڭگە كولەمىندە اقشانىڭ ءبىر بولىگى قايتارىلعانىنا قاراماستان، جولاۋشى وزىنە كەلتىرىلگەن ماتەريالدىق شىعىن، مورالدىق زياندى العا تارتىپ، تۋر اگەنتكە جانە اۋە تاسىمالداۋشىعا قارسى سوتقا جۇگىنگەن.

سوت تۋر اگەنت تاسىمالداۋعا جاۋاپتى تاراپ ەمەس ەكەنىن انىقتاعان. سونىمەن قاتار، وۆەربۋكينگكە جول بەرىپ، رەيستى توقتاتقان اۋە تاسىمالداۋشىنىڭ ارەكەتتەرى جولاۋشىعا كەلتىرىلگەن مورالدىق زيان ءۇشىن وتەماقى تولەۋگە نەگىز بولىپ تانىلعان.

وسىعان بايلانىستى اۋە كومپانياسىنان 50 مىڭ تەڭگە مولشەرىندە مورالدىق زيان وندىرىلگەن.

اپەللياسيالىق ساتىداعى سوت ءبىرىنشى ساتىداعى سوتتىڭ قورىتىندىلارىمەن كەلىسىپ، شەشىمدى وزگەرىسسىز قالدىرعان. سوت اكتىسى زاڭدى كۇشىنە ەندى.