ٷكٸمەت وتىرىسىندا قر ەكولوگييا جەنە تابيعي رەسۋرستار مينيسترٸ ەرلان نىسانباەۆ بٸرقاتار وبلىس ەكٸمدٸكتەرٸنٸڭ جۇمىسىن سىنعا الدى, دەپ حابارلايدى Dalanews.kz.
مينيستردٸڭ ايتۋىنشا, ٶڭٸرلەر ٶرتكە قارسى تەحنيكانى ليزينگ ارقىلى جاڭارتۋعا تيٸس, الايدا بۇل باعىتتا العا جىلجۋ بايقالمايدى.
“256 ٶرت-باقىلاۋ مۇناراسى قاجەت بولعان جاعدايدا, ورمان شارۋاشىلىقتارىندا بار-جوعى 185 مۇنارا عانا بار. جاڭا مۇنارالار سالۋ جۇمىستارى پاۆلودار, قوستاناي, باتىس قازاقستان, اقتٶبە جەنە سولتٷستٸك قازاقستان وبلىستارىندا ٶزگەرٸسسٸز قالىپ وتىر. سونداي-اق اقمولا, اقتٶبە, اتىراۋ, باتىس قازاقستان, قوستاناي, پاۆلودار جەنە شىعىس قازاقستان وبلىستارىندا ورمان ٶرت ستانتسييالارىنىڭ تاپشىلىعى بايقالادى. قازٸرگٸ قولدانىستاعى ستانتسييالاردىڭ جارتىسى ٶتكەن عاسىردىڭ 50–60 جىلدارى سالىنعان. اتالعان وبلىستاردىڭ ەكٸمدٸكتەرٸ ەميسسييالاردان تٷسكەن قاراجات بولا تۇرا, جاڭا ورمان-ٶرت ستانتسييالارىن سالۋعا قارجى بٶلمەي وتىر”, – دەدٸ ەرلان نىسانباەۆ.
مينيستردٸڭ ايتۋىنشا, شىعىس قازاقستان (1154 بٸرلٸك قاجەت, بار بولعانى – 833), اقمولا (535/504) جەنە پاۆلودار (208/92) وبلىستارىندا ورمان كٷزەتٸنٸڭ سانى نورماتيۆكە جەتپەي وتىر.
"جالپى, 2025 جىلعى 7 سەۋٸردەگٸ جاعداي بويىنشا اقتٶبە, اتىراۋ, شىعىس قازاقستان, جامبىل, باتىس قازاقستان, قوستاناي, پاۆلودار, سولتٷستٸك قازاقستان جەنە تٷركٸستان وبلىستارىنىڭ ورمان مەكەمەلەرٸ مەن “سەمەي ورمانى” رەزەرۆاتى ٶرت قاۋٸپتٸ ماۋسىمعا دايىن ەمەس. مينيسترلٸك جٷرگٸزگەن تەكسەرٸستەر نەتيجەسٸندە كەمشٸلٸكتەردٸ جويۋ جەنە تەحنيكانى 2025 جىلعى 15 سەۋٸرگە دەيٸن تولىق دايىندىققا كەلتٸرۋ تۋرالى ۇسىنىستار وبلىس ەكٸمدٸكتەرٸنە جولداندى", – دەپ تٷيٸندەدٸ مينيستر.
