ۆەبينار سپيكەرلەرى – «ورلەۋ» باۇو» اق فيليالى الماتى ق. بويىنشا پق باي ديرەكتورىنىڭ ءواج جونىندەگى ورىنباسارى ي. ي. حاليتوۆا (ورىس تىلىندە)، ينستيتۋتتىڭ اعا وقىتۋشىسى ا. ت. قوڭىروۆا (قازاق تىلىندە).
ۆەبينار ق ر بعم ۇسىنعان اقپاراتتى نەگىزگە الادى: ءبىلىم بەرۋ ۇيىمدارىنىڭ 1 توقسانداعى جۇمىسى، باستاۋىش سىنىپ كەزەكشىلەرىنىڭ جۇمىسى، كەزەكشى سىنىپتاردا قامتىلۋعا ءتيىستى سانيتارلىق تالاپتار، وتاندىق تەلەارنالار مەن ينتەرنەت جەلىسىندەگى ءبىلىم بەرۋ رەسۋرستارى تۋرالى اقپارات. قاشىقتىقتان وقىتۋدى ۇيىمداستىرۋ بويىنشا ناقتى ۇسىنىستار: «ۇيدە قالاي وقۋعا بولادى؟»، «گيگيەنا نەگىزدەرى»، «كيبەركۋلتۋرا»، «ينتەرنەت ارقىلى قالاي وقۋعا بولادى؟»، «دەنە جاتتىعۋلارىنىڭ ءمانى».
ۆەبينار فورماتى تىكەلەي قارىم-قاتىناس رەجيمىندە بولعاندىقتان، بارلىق قاتىسۋشىنىڭ ءوزىن قىزىقتىراتىن سۇراقتاردى قويۋعا مۇمكىندىگى بار. ارنايى سىلتەمە بويىنشا ۆەبينارعا ەنگەن قاتىسۋشىلاردىڭ سۇراقتارى بويىنشا سپيكەرلەر تولىق تۇسىنىكتەمەلەر مەن ۇسىنىستار بەرەدى.
مۇنىڭ ءبارى بالا ءۇشىن، اتا-انا مەن ءمۇعالىم اراسىنداعى تۇسىنىسپەۋشىلىكتەن بالا زارداپ شەكپەۋى ءۇشىن جاسالۋدا! باس ءمۇعالىم قيىن جاعدايدا ءبىلىم بەرۋ جۇيەسىنىڭ قىزمەتكەرلەرىنە سەنىم ارتتى، ۇلكەن تالاپپەن باتىل قادامدار جاسادى، جول كورسەتتى. ال ۇستازداردىڭ ۇستازى ەڭبەك ەتەتىن «ورلەۋ» بىلىكتىلىكتى ارتتىرۋ ۇلتتىق ورتالىعى مينيسترلىكتىڭ العا قويعان تالاپ-ماقساتتارىن جۇزەگە اسىرۋ ماقساتىندا بەلسەنەدىلىكپەن ەڭبەك ەتۋدە. ول ءۇشىن قوسىمشا قاراجات سۇراعان جوق، ۋاقىتپەن ساناسقان جوق، كەزەكتى ەڭبەك دەمالىستارىندا جۇرسە دە، كومپيۋتەردىڭ الدىنان الىستاپ كەتكەن جوق! ترەنەرلەر جاز بويىنا مەكتەپ مۇعالىمدەرىمەن تىعىز بايلانىستا بولىپ، قاشىقتىقتان وقىتۋدىڭ تەحنيكالىق ەرەكشەلىكتەرىن جالىقپاي ءتۇسىندىرىپ، تاجىريبەلەرىمەن بولىسۋدە.
ۆەبينار ماتەريالىندا بالالارىنىڭ بويىندا مەكتەپ ومىرىندە قالىپتاساتىن ماڭىزدى قاسيەتتەردى: مىنەز-قۇلىق مادەنيەتى، توزىمدىلىك، جاۋاپكەرشىلىك داعدىلارىن دامىتۋعا قولداۋ كورسەتۋگە قاجەتتى اتا-انالارعا ۇسىنىس-كەڭەستەر بار.
Covid-19 ءبىزدىڭ ومىرىمىزگە ەلەۋلى وزگەرىستەر ەنگىزدى. قاشىقتىقتان وقىتۋ – كارانتين جاعدايىندا وقۋ پروسەسىن جالعاستىرۋعا مۇمكىندىك بەرەتىن ءبىلىم بەرۋ ۇلگىسى. قازىرگى تاڭدا زامانۋي ءبىلىم بەرۋ مەكەمەسىندەگى ءداستۇرلى وقىتۋ ۇلگىسىمەن قاتار قاشىقتىقتان وقىتۋ كوپتەگەن ماسەلەلەردى شەشۋگە جانە وقۋ پروسەسىندە اتا-انالار مەن ءبىلىم الۋشىلاردىڭ وتىنىشتەرىن ورىنداۋعا مۇمكىندىك بەرەدى. وسىلايشا، وقىتۋدىڭ ۆيرتۋالدى نىسانى، اتاپ ايتقاندا مەكتەپتە قاشىقتىقتان وقىتۋ – وقۋشىنى ءوز بەتىنشە ىزدەنۋگە جەتەلەيدى، قوسىمشا ءبىلىم الۋ اياسىن كەڭەيتۋگە مۇمكىندىك بەرەدى.
قاشىقتىقتان وقىتۋدىڭ ارتىقشىلىعى، ءبىرىنشى كەزەكتە – بالالاردىڭ قاۋىپسىزدىگى، ەكىنشىدەن، وقۋشىلار تولىق كولەمدە، زاماناۋي تەحنولوگيالار ارقىلى ءبىلىم الادى. دەمەك، پاندەميا ءبىزدىڭ ەلىمىزدە بالالاردىڭ ءبىلىم الۋ پروسەسىنە كەدەرگى بولماۋى ءۇشىن ءبىلىم جانە عىلىم مينيسترلىگى بارلىق مۇمكىندىكتەردى قاراستىرىپ وتىر. مۇعالىمدەر دەمالىس ۋاقىتىندا قاشىقتىقتان وقىتۋ ادىستەرىنە ماشىقتانىپ، بىلىكتىلىك داعدىلارىن دامىتتى. ياعني، جاڭا وقۋ جىلىندا ىندەتتىڭ تارالۋىنا توسقاۋىل بولاتىن قاۋىپسىزدىك شارالارىن تولىق قامتي وتىرىپ مەكتەپتەر ءوز جۇمىسىن جالعاستىرادى.
ادام شىن مانىندە ءبىلىم الۋعا ۇمتىلعان جاعدايدا عانا ۇيرەنۋ مۇمكىن بولاتىندىعىن ەستە ۇستاعان ءجون. سوندىقتان بالالاردى قاشىقتىقتان وقىتۋ ساپاسى تەك مۇعالىمگە عانا ەمەس، سونىمەن بىرگە وقۋ پروسەسىنىڭ بارلىق قاتىسۋشىلارىنا: ءار وقۋشى مەن اتا-اناعا بايلانىستى.
اينۇر جۇماحان
