ءماجىلىس دەپۋتاتى نيكيتا شاتالوۆ كۋلۋاردا الەۋمەتتىك جەلىدە وزىنە قارسى كوپ جازىلعان سىني پىكىرلەرگە جاۋاپ بەردى، دەپ حابارلايدى Dalanews.kz Ulysmedia.kz-كە سىلتەپ.
نيكيتا شاتالوۆ “پاراگراف” سايتىندا ءوزىنىڭ ءومىربايانى قاتەلىكپەن جازىلىپ كەتكەنىنە (قازسسر-دا تۋعان دەپ جازىلعان) ءوزىنىڭ قاتىسى جوعىن ايتادى. ونى تەحنيكالىق قاتەلىك دەپ اتايدى. اقپارات كوزىنە حابارلاسىپ، قاتەلىكتى تۇزەتۋدى وتىنگەن.
سول قاتەلىكتى ءبىرتۇرلى اينالدىرىپ، مەن كوزىممەن كورمەگەن سوۆەت وداعىمەن ارالاستىرىپ جىبەرىپتى. مەن وعان كوپ نازار اۋدارمايمىن. ادامدار اقپاراتپەن مانيپۋلياسيا جاساپ، مەن جازباعان، ايتپاعان اقپاراتتاردى تاراتتى. مەن جاريا تۇلعا ەكەنىمدى ەسكەرە كەلە بۇعان سابىرلى تۇردە قارايمىن، – دەيدى ول.
دەپۋتات ءوزىن رەسەيشىل دەپ ايىپتاعانداردىڭ ايتقانى “قىپ-قىزىل وتىرىك” دەپ جاۋاپ بەردى. گەوساياسات جايلى ءسوز قوزعاعاندا ءاردايىم قازاقستاننىڭ ۇلتتىق مۇددەسى تۇرعىسىنان جازاتىنىن جەتكىزدى.
مەن وسى ەلدىڭ پاتريوتىمىن. باسقا ادامدارعا بىردەڭە دالەلدەۋگە زاۋقىم جوق. مەنى ءجىتى وقىعان ادامدار، ءسوزىمدى وقىپ، كورىپ وتىرعاندار قانداي مۇددەلەردى قورعايتىنىمدى بىلەدى. ۇستانىمىمنىڭ رەسەيگە ەش قاتىسى جوق. وكىنىشكە قاراي، مۇنداي قۇبىلىس مەن ەتنيكالىق ورىس بولعاننان كەيىن تۋىنداپ جاتىر دەپ ايتۋعا ءماجبۇرمىن. سەبەپ سول، – دەيدى ول.
بۇعان دەيىن نيكيتا شاتالوۆ الەۋمەتتىك جەلىدەگى پاراقشاسىندا گەوساياسي تاقىرىپتا جازبا قالدىرىپ، سول ءۇشىن سىنعا قالعان ەدى. ونى رەسەيشىل دەپ ايىپتاعاندار بولدى. ول سوزىندە ۋكراينانى قولداپ وتىرعان باتىس ەلدەرىن “يدەاليست” دەپ اتاپ، ۋكراينا پرەزيدەنتىنىڭ كومانداسىن سىناعان. ونىڭ الدىندا كاسپيي قۇبىرى كونسورسيۋمىنىڭ رەسەيدەگى ستانسياسىنا درونمەن شابۋىل جاسالعاندا شاتالوۆ قازاقستان ۋكراينانى جاۋاپكەرشىلىككە شاقىرۋ كەرەك دەپ ءمالىم ەتكەن.
