شىمكەنتتە «ورداباسى» فۋتبول كلۋبىنىڭ بۇرىنعى باسشىلىعىنا قاتىستى قىلمىستىق ٸس قوزعالدى, دەپ حابارلايدى Dalanews.kz.
قازاقپارات مەلٸمەتٸنشە, قىلمىستىق ٸس قوزعاۋعا بيۋدجەت قاراجاتىن ماقساتسىز پايدالانۋ كٷدٸگٸ نەگٸز بولعان.
تەرگەۋ دەرەكتەرٸنە سەيكەس, 2023–2024 جىلدار ارالىعىندا كلۋب 18 فۋتبولشىمەن جالپى سوماسى 2,3 ميلليارد تەڭگەدەن اساتىن كەلٸسٸمشارتتار جاساعان. بۇل قارجىنىڭ شامامەن 1,9 ميللياردى بٸر جىل ٸشٸندە شەتەلدٸك ويىنشىلاردىڭ جالاقىسىن تٶلەۋگە جۇمسالعان. قۇقىق قورعاۋ ورگاندارى مۇنداي شىعىنداردىڭ نەگٸزدٸلٸگٸنە كٷمەن كەلتٸرٸپ, ٶكٸلەتتٸكتٸ اسىرا پايدالانۋ دەرەگٸ بولۋى مٷمكٸن ەكەنٸن اتاپ ٶتتٸ.
وقيعا قوعام نازارىنا شىمكەنت ەكٸمٸ عابيت سىزدىقبەكوۆتٸڭ مەلٸمدەمەسٸنەن كەيٸن ٸلٸكتٸ. ەكٸم كلۋبتىڭ قالالىق بيۋدجەتكە شامادان تىس سالماق تٷسٸرٸپ وتىرعانىن سىنعا العان. ەسٸرەسە ۇلتتىق قۇرامانىڭ كاپيتانى اسحات تاعىبەرگەننٸڭ جاعدايى ەرەكشە نازار اۋدارتتى. ونىڭ «ورداباسىداعى» ايلىق جالاقىسى شامامەن 20 ميلليون تەڭگە بولعان. 2025 جىلدىڭ اقپان ايىندا ونىڭ كەلٸسٸمشارتى ەكٸ تاراپتىڭ كەلٸسٸمٸمەن ەشقانداي تالاپ-ارىزسىز بۇزىلعان. بۇل شەشٸمدە كەلٸسٸمشارتتا قاراستىرىلعان ايىپپۇل تالاپتارى ەسكەرٸلمەگەن.
جارييالانعان مەلٸمەتتەرگە سٷيەنسەك, سوڭعى بەس جىلدا شىمكەنت قالاسىنىڭ بيۋدجەتٸنەن «ورداباسى» كلۋبىنا 23 ميلليارد تەڭگەگە جۋىق قاراجات بٶلٸنگەن. الايدا بۇل سومانىڭ نەبەرٸ 11 پايىزى عانا بالالار مەن بۇقارالىق فۋتبولدى دامىتۋعا جۇمسالعان. قالعان قارجى كەسٸبي ويىنشىلاردىڭ, سونىڭ ٸشٸندە اي سايىن 2 ميلليون تەڭگەگە دەيٸن جالاقى الاتىن لەگيونەرلەردٸڭ ەڭبەكاقىسىن تٶلەۋگە كەتكەن.
قازٸرگٸ تاڭدا اتالعان ٸس بويىنشا تەرگەۋ جالعاسۋدا. ەگەر بيۋدجەت قارجىسىن ماقساتسىز پايدالانعانى نەمەسە يەمدەنگەنٸ دەلەلدەنسە, كلۋبتىڭ بۇرىنعى باسشىلىعى قىلمىستىق جاۋاپكەرشٸلٸككە تارتىلۋى مٷمكٸن.
