Shymkentte «Ordabasy» fýtbol klýbynyń burynǵy basshylyǵyna qatysty qylmystyq is qozǵaldy, dep habarlaıdy Dalanews.kz.
QazAqparat málimetinshe, qylmystyq is qozǵaýǵa búdjet qarajatyn maqsatsyz paıdalaný kúdigi negiz bolǵan.
Tergeý derekterine sáıkes, 2023–2024 jyldar aralyǵynda klýb 18 fýtbolshymen jalpy somasy 2,3 mıllıard teńgeden asatyn kelisimsharttar jasaǵan. Bul qarjynyń shamamen 1,9 mıllıardy bir jyl ishinde sheteldik oıynshylardyń jalaqysyn tóleýge jumsalǵan. Quqyq qorǵaý organdary mundaı shyǵyndardyń negizdiligine kúmán keltirip, ókilettikti asyra paıdalaný deregi bolýy múmkin ekenin atap ótti.
Oqıǵa qoǵam nazaryna Shymkent ákimi Ǵabıt Syzdyqbekovtiń málimdemesinen keıin ilikti. Ákim klýbtyń qalalyq búdjetke shamadan tys salmaq túsirip otyrǵanyn synǵa alǵan. Ásirese ulttyq quramanyń kapıtany Ashat Taǵybergenniń jaǵdaıy erekshe nazar aýdartty. Onyń «Ordabasydaǵy» aılyq jalaqysy shamamen 20 mıllıon teńge bolǵan. 2025 jyldyń aqpan aıynda onyń kelisimsharty eki taraptyń kelisimimen eshqandaı talap-aryzsyz buzylǵan. Bul sheshimde kelisimshartta qarastyrylǵan aıyppul talaptary eskerilmegen.
Jarıalanǵan málimetterge súıensek, sońǵy bes jylda Shymkent qalasynyń búdjetinen «Ordabasy» klýbyna 23 mıllıard teńgege jýyq qarajat bólingen. Alaıda bul somanyń nebári 11 paıyzy ǵana balalar men buqaralyq fýtboldy damytýǵa jumsalǵan. Qalǵan qarjy kásibı oıynshylardyń, sonyń ishinde aı saıyn 2 mıllıon teńgege deıin jalaqy alatyn legıonerlerdiń eńbekaqysyn tóleýge ketken.
Qazirgi tańda atalǵan is boıynsha tergeý jalǵasýda. Eger búdjet qarjysyn maqsatsyz paıdalanǵany nemese ıemdengeni dáleldense, klýbtyń burynǵy basshylyǵy qylmystyq jaýapkershilikke tartylýy múmkin.
