ورداباسى اۋدانىندا ورنالاسقان «بايداۋلەت» وندىرىستىك جىلىجاي كەشەنى قاناتىن كەڭگە جايۋدا.

نەگىزى 2014 جىلى قالانعان جىلىجاي قيار مەن قىزاناق وندىرۋگە باعىتتالعان. العاشقىدا 0،5 گەكتار اۋماق جەردەن باستالعان كەشەن، بۇگىنگى تاڭدا اۋقىمى اجەپتاۋىر كەڭەيىپ 2،5 گەكتارعا جەتكەن ەكەن. قازىرگى كۇنى مۇندا 9 جۇمىسشى جىلىنا 60 توننا ءونىم ءوندىرىپ كەلەدى.

ايتا كەتەلىك جوبانىڭ جالپى قۇنى 15 ملن. تەڭگەنى قۇرايدى. قوجالىق ديرەكتورىنىڭ اتاپ وتكەنىندەي الداعى ۋاقىتتا ءونىم كولەمىن 700 تونناعا دەيىن جەتكىزىپ، دايىن تاۋاردى الماتى، قاراعاندى، وسكەمەن، پاۆلودار قالالارىنا جونەلتۋ جوسپارلانىپ وتىر.

بۇدان بۇرىن اۋدانداعى جۇمىس بارىسىمەن تولىققاندى تانىسىپ شىققان ءوڭىر باسشىسى جانسەيىت تۇيمەبايەۆ وسىناۋ سالا باسشىلارىنا اۋدانداعى جىلىجاي شارۋاشىلىعىن جانداندىرۋدى تاپسىرعان بولاتىن.

«تۇركىستان ءوڭىرى اۋىل شارۋاشىلىعىنا وتە قولايلى ايماق. وسىنى ءتيىمدى پايدالانۋىمىز كەرەك. اسىرەسە، زاماناۋي تەحنولوگيالاردىڭ كومەگىمەن جىلىجاي شارۋاشىلىعىن مىقتاپ قولعا الساق، ءونىم ساپاسى مەن كولەمى ارتاتىن بولادى. سوندىقتان دا وسى ماسەلەنى اۋدان، قالا باسشىلارىنا ۇنەمى ايتىپ كەلەمىن»، – دەگەن ەدى جانسەيىت تۇيمەبايەۆ.