ورازا ايت مەرەكەسٸ: بۇل كٷنٸ نە ٸستەۋگە بولمايدى

13 مامىردا مۇسىلمان قاۋىمى ٷشٸن ۇلىق مەرەكە – ورازا ايت باستالدى. مەيرامنىڭ بٸرٸنشٸ كٷنٸ مەشٸتتەردە جاماعاتپەن ايت نامازى وقىلادى.

12 مامىر – قاسيەتتٸ رامازان ايىنىڭ سوڭعى كٷنٸ. ال بٷگٸننەن باستاپ مۇسىلمان ەلەمٸ وتىز كٷن ورازادان كەيٸن شەۋۋال ايىنىڭ العاشقى ٷش كٷنٸندە ورازا ايت مەرەكەسٸن تويلايدى.

ايت سٶزٸنٸڭ ٶزٸ "مەرەكە", "مەيرام" دەگەن ماعىنانى بٸلدٸرەدٸ.

ايت نامازى قالاي وقىلادى

ورازا ايت مەرەكەسٸنٸڭ نەگٸزگٸ شارتى – مەيرام ايت نامازىن وقۋمەن باستالادى. ايت نامازى مەشٸتتەردە تاڭەرتەڭ ەرتە جاماعاتپەن وقىلادى. پايعامبارىمىز مۇحاممەد (س.ع.س.) ٶز ٶسيەتٸندە: "ايت كٷنٸ بٸرٸنشٸ ورىندايتىنىمىز – ناماز وقۋ", - دەگەن.

ەر مۇسىلمان ايت نامازىنا جۋىنىپ-شايىنىپ, دەرەت الىپ, ەڭ ەدەمٸ ەرٸ تازا كيٸمدەرٸن كيٸپ, ٷستٸنە حوش يٸس سەۋٸپ بارادى.

سونىمەن قاتار, مەشٸتكە بارماس بۇرىن بٸر-ەكٸ قۇرما جەپ, دەم اۋىز تيگەن ابزال. بۇل ورازانىڭ اياقتالعانىنىڭ بەلگٸسٸ.

بيىل پاندەميياعا قاراماستان ايت نامازىن مەشٸت اۋلالارىندا وقۋعا رۇقسات ەتٸلدٸ. ادامدار بەتپەردە كييۋ, ارا قاشىقتىقتى ساقتاۋ سيياقتى سانيتارلىق تالاپتاردى ساقتاۋعا تيٸس.

نامازعا دەيٸن پٸتٸر ساداقانى بەرٸپ تاستاۋ

پٸتٸر ساداقا رامازان ايىندا بەرٸلەدٸ. ەگەر كٸمدە-كٸم پٸتٸر ساداقانى ەلٸ بەرمەسە, ورازا ايت نامازى وقىلعانعا دەيٸن بەرٸپ تاستاۋى قاجەت. ايت نامازىنان كەيٸن بەرٸلگەن پٸتٸر ساداقا جاي ساداقا بولىپ قالادى.

بيىل پٸتٸر ساداقانىڭ مٶلشەرٸ – جان باسىنا 420 تەڭگە. جاعدايى بار ادامدار ونى مەيٸزدٸڭ نەمەسە قۇرمانىڭ باعاسىمەن بەرە الادى. قازٸرگٸ كەزدە ەكٸ كەلٸ مەيٸز 3 580 تەڭگە تۇرادى. سونداي-اق, 4 كەلٸ قۇرمانىڭ قۇنىمەن بەرۋگە بولادى. ونىڭ باعاسى – 7 300 تەڭگە.

ورازا ايت كٷنٸ اۋىز بەكٸتۋگە بولا ما

ورازا ايتتىڭ تاڭىندا سەرەسٸ ٸشٸلمەيدٸ, كٷندٸز اۋىز اشىق بولادى.

ورازا ايت داستارقان جايىپ, دەمنەن اۋىز تيەتٸن كٷن بولعاندىقتان, ورازا ايتتىڭ بٸرٸنشٸ كٷنٸ اۋىز بەكٸتۋگە تىيىم سالىنعان.

رامازان ايىنان قالعان قازا ورازانى ايتتىڭ ەكٸنشٸ كٷنٸ, ياعني 14 مامىردان باستاپ ۇستاي بەرۋگە بولادى.

ورازا ايت قالاي تويلانادى

ورازا ايت كٷندەرٸ ەربٸر مۇسىلماننىڭ شاڭىراعىندا باۋىرساق پٸسٸرٸلٸپ, ەت اسىلىپ, مەرەكەلٸك مول داستارقان جايىلادى. تۋعان-تۋىسقاندار, كٶرشٸ-قولاڭ بٸر-بٸرٸنە قوناققا بارىپ, ايت مەرەكەسٸمەن قۇتتىقتايدى, سىيلىق بەرەدٸ.

دەستٷر بويىنشا بۇل كٷنٸ مۇسىلماندار بٸر-بٸرٸنە "ورازا ايت قابىل" بولسىن" دەپ جىلى لەبٸزدەرٸن بٸلدٸرەدٸ.

رەنجٸسٸپ قالعان اعايىن-تۋىس, جورا-جولداس بٸر-بٸرٸنەن كەشٸرٸم سۇراپ, ٶكپە-نازىن ۇمىتادى.

سونىمەن قاتار, ورازا ايت مەرەكەسٸندە تۇرمىسى تٶمەن وتباسىلارعا, جەتٸم-جەسٸرلەرگە قول ۇشىن سوزعان ابزال.

دەرەككٶز: sputnik.kz