ورال قالاسىنداعى جىلۋ ەلەكتر ورتالىعىندا قۋاتى 12 مەگاۆاتت بولاتىن جاڭا №1 تۋربينا ىسكە قوسىلدى. وسى تۋربينانىڭ 100 پايىز توزىعى جەتىپ، 10 جىل بويى جۇمىسى توقتاپ تۇرعان بولاتىن. ناتيجەسىندە ەسكى تۋربينانىڭ ورنىنا 3،2 ميلليارد تەڭگەگە جاڭا تۋربينا ساتىپ الىنىپ، پايدالانۋعا بەرىلدى،- دەپ حابارلايدى Dalanews.kz
جاڭا تۋربينانىڭ ىسكە قوسىلۋى ءوز كەزەگىندە ەنەرگەتيكالىق تاۋەلسىزدىكتى قامتاماسىز ەتەدى. قازىرگى ۋاقىتتا جىلۋ ەلەكتر ورتالىعىنداعى ءوندىرىس 46 مۆت-تى قۇرايدى. جاڭا تۋربينانىڭ ارقاسىندا وندىرىلەتىن ەلەكتر ەنەرگياسىنىڭ قۋاتى 12 مۆت-قا ارتادى.
«مەملەكەت باسشىسى قاسىم-جومارت توقايەۆ: ەنەرگەتيكالىق قاۋىپسىزدىكتى قامتاماسىز ەتۋ – باستى مىندەتتىڭ ءبىرى ەكەنىن اتاپ وتكەن بولاتىن. وبلىسىمىزدا ەنەرگيانى تۇتىنۋ قارقىنى جىلدان جىلعا ارتۋدا. سوڭعى 10 جىل ىشىندە ەلەكتر قۋاتىن تۇتىنۋ كولەمى 30 %-عا ءوستى. بۇل ءوز كەزەگىندە ەنەرگيا قۋاتتىلىعىن ارتتىرۋدى قاجەت ەتەدى. بۇگىنگى ىسكە قوسقان جاڭا تۋربينا تۇرعىندارىمىزعا بەرىلەتىن ەلەكتر ەنەرگياسىنىڭ مولشەرىن ارتتىرۋعا ىقپال ەتەدى»»،- دەدى ناريمان تورەعالي ۇلى.
ايتا كەتۋ كەرەك، سوڭعى ەكى جىلدىڭ وزىندە جىلۋ-ەنەرگەتيكا سالاسىن جاڭعىرتۋ ماقساتىندا بيۋدجەتتەن 15،6 ميلليارد تەڭگە كولەمىندە قارجى باعىتتالعان. سونىڭ ناتيجەسىندە ءبىرقاتار ماڭىزدى جوبالار ىسكە قوسىلدى. اتاپ ايتقاندا: ناسوستىق ستانساداعى تاراتۋ قۇرىلعىسى، گراديرنيا، جاڭا قازاندىق، №2 جانە №5 جىلۋ ماگيسترالىن قايتا جاڭعىرتۋ، سونداي-اق زاشاعان كەنتىندەگى جاڭا قازاندىقتىڭ قۇرىلىسى.
سونىمەن قاتار، جاپونيانىڭ ايگىلى «Hitachi» تۋربيناسىنا جوندەۋ جۇمىستارى باستالدى. بۇل – ەكىجاقتى كەلىسسوزدەردىڭ وڭ ناتيجەسى.
2035 جىلعا دەيىنگى ارالىقتى قامتيتىن، 32 جوبادان تۇراتىن جول كارتاسى بەكىتىلگەن بولاتىن. وندا: قىسقا مەرزىمدى — جالپى قۇنى 33،9 ملرد تەڭگەگە 6 جوبا؛ ورتا مەرزىمدى — 117،7 ملرد تەڭگەگە 12 جوبا؛ ۇزاق مەرزىمدى — 135،1 ملرد تەڭگەگە 13 جوبا قاراستىرىلعان.
قازىرگى تاڭدا قىسقا مەرزىمدە ىسكە اسىرىلۋى ءتيىس جوبالار دايىن. ولار: ورال قالاسى مەن زاشاعان كەنتىندەگى №1 جانە №2 قازاندىقتاردىڭ جىلۋ جەلىلەرىن جاڭارتۋ، 6 جانە 7-جىلۋ ماگيسترالدەرىن قايتا قۇرۋ، قۇرىلىسشى جانە سولتۇستىك-شىعىس شاعىناۋداندارىنداعى ىشكى جىلۋ جەلىلەرىن اۋىستىرۋ جوبالارى. سونداي-اق جىلۋ ەلەكتر ورتالىعىنداعى №3 تۋربواگرەگات، ءۇش جىلۋ ماگيسترالى مەن ءۇش ەنەرگەتيكالىق قازاندىقتى جاڭارتۋ جوبالارى دا ازىرلەنۋدە.
