ماسكەۋدە جۇرگەن ورال قالاسىنىڭ تۇرعىنى جازىلبەك اجعالييەۆتى رەسەي پوليسياسى ءۇش تاۋلىك بويى ۇرىپ-سوعىپ، ۋكرايناداعى سوعىسقا كەلىسىمشارتقا قول قويۋعا ماجبۇرلەمەك بولعان. بۇل تۋرالى ونىڭ اپكەسى مارۋا ەسكەندىروۆا الەۋمەتتىك جەلىدە مالىمدەدى، دەپ حابارلايدى Dalanews.kz ۋرالسكايا نەدەليا باسىلىمىنا سىلتەمە جاساپ.
ماسكەۋگە جۇمىس ىزدەپ بارعان
مارۋا ەسكەندىروۆانىڭ ايتۋىنشا، جازىلبەك 2025 جىلدىڭ جەلتوقسان ايىنىڭ باسىندا اعاسى باتىربەكپەن بىرگە ماسكەۋگە جۇمىس ىستەۋگە كەتكەن.
ونىڭ سوزىنشە، بۇل شەشىم وتباسىنىڭ اۋىر قارجىلىق جاعدايىنا بايلانىستى قابىلدانعان.
«اعامنىڭ ءۇش بالاسى بار، ەكى نەسيەسى بار. امالسىزدان رەسەيگە جۇمىس ىزدەپ كەتتى»، – دەيدى مارۋا.
جازىلبەك ماسكەۋدەگى «تري سەسترى» كلينيكاسىنا مەيىرگەر بولىپ جۇمىسقا ورنالاسىپ، ۋاقىتشا تىركەۋگە قۇجات تاپسىرعان.
قۇجات الۋعا كەتكەن سوڭ حابارسىز جوعالدى
2026 جىلعى 18 قاڭتاردا جازىلبەككە ساحاروۆ كوشەسىندە ورنالاسقان كوشى-قون ورتالىعىنان قوڭىراۋ شالىپ، قۇجاتتارىنىڭ دايىن ەكەنىن ايتىپ، كەلىپ الۋدى سۇراعان.
ال 19 قاڭتار كۇنى تاڭعى ساعات 06:00-دە ول ءوز نومىرىنەن تاكسي شاقىرىپ، كوشى-قون ورتالىعىنا جول تارتقان. سول كەتكەننەن قايتىپ ورالماعان.
مارۋا ەسكەندىروۆانىӊ ايتۋىنشا، ونىڭ تەلەفونى ءبىر ساعاتتان كەيىن ءوشىپ، سودان بەرى قوسىلماعان. قاي تاكسيگە وتىرعانى دا بەلگىسىز.
سول كۇنى كەشكە اعاسى باتىربەك پوليسياعا ادام جوعالعانى تۋرالى ارىز جازعان. الايدا قۇقىق قورعاۋ ورگاندارى ونى تەك ءۇش تاۋلىكتەن كەيىن ىزدەي باستايتىنىن ايتقان.
وسىدان كەيىن مارۋا ەسكەندىروۆا ورال قالاسىنداعى پوليسياعا دا ارىز تۇسىرگەن. وندا وعان رەسەي ىىم-ىنەن جازىلبەكتىڭ ماسكەۋدە جوعالعانى جونىندە باعدار بەرىلگەنى حابارلانعان.
«ەلەكتروشوكەرمەن ۇرىپ، باسىنا قاپ كيگىزگەن»
22 قاڭتار كۇنى تاڭەرتەڭ جازىلبەك تۋعان-تۋىستارىنا ءوزى حابارلاسقان. ول سول ساتتە الماتى اۋەجايىندا بولعان.
مارۋا ەسكەندىروۆا باۋىرىنىڭ اۋىر كۇيدە ەكەنىن ايتادى.
«ول قاتتى شوك الىپ قالعان»، – دەدى ول.
جازىلبەكتىڭ ايتۋىنشا، 19 قاڭتار كۇنى تاڭەرتەڭ ول ساحاروۆتاعى كوشى-قون ورتالىعىنا كەلگەندە، قىزمەتكەرلەر «بەس مينۋت كۇتىڭىز» دەگەن.
سول ساتتە عيمارات ەسىگىنىڭ الدىندا رەسەيلىك پوليسەيلەر كەلىپ، ونى ۇستاپ اكەتكەن.
«ونى ەلەكتروشوكەرمەن ەسەڭگىرەتىپ، تەلەفونىن تارتىپ العان. باسىنا قاپ كيگىزىپ، بولىمشەدە اپارعان»، – دەيدى اپكەسى.
ءۇش تاۋلىك ازاپتاعان
مارۋا ەسكەندىروۆانىӊ سوزىنشە، جازىلبەك ءۇش كۇن بويى اياۋسىز سوققىعا جىعىلعان.
«ونى ءۇش تاۋلىك بويى ۇرىپ-سوعىپ، ەلەكتروشوكەرمەن ازاپتاعان. وسى ۋاقىت ىشىندە اسكەري كوميسسارياتتان ءۇش رەت ادام كەلىپ، ۋكرايناداعى سوعىسقا كەلىسىمشارتقا قول قويۋدى تالاپ ەتكەن»، – دەيدى ول.
جازىلبەك بولسا بۇل تالاپتان ۇزىلدى-كەسىلدى باس تارتقان.
«ولتىرسەڭدەر دە قول قويمايمىن»، – دەپ جاۋاپ بەرگەن ول جانە ءوزىن قازاقستانعا دەپورتاسيالاۋدى تالاپ ەتكەن.
قازاقستانعا كۇشتەپ دەپورتاسيالانعان
مارۋا ەسكەندىروۆانىڭ مالىمەتىنشە، 21 قاڭتارعا قاراعان ءتۇنى جازىلبەك اجعالييەۆ رەسەيدەن قازاقستانعا دەپورتاسيالانعان.
ونى الماتىعا ۇشاتىن ۇشاققا وتىرعىزىپ، ەلدەن شىعارعان.
ءقازىر جازىلبەك قازاقستان اۋماعىندا. ونىڭ جاعدايى مەن وقيعانىڭ قۇقىقتىق باعاسى بويىنشا رەسمي ورگاندار ازىرگە تۇسىنىكتەمە بەرگەن جوق.
