16 تامىزدا ورال قالاسىندا، تۇڭعىش پرەزيدەنت الاڭىندا، «AUYL FEST. قوي شارۋاشىلىعى» اتتى العاشقى حالىقارالىق فەستيۆال وتەدى. باتىس قازاقستان وبلىسىندا، ايگىلى «ەدىلباي» قوي تۇقىمىنىڭ وتانىندا وتەتىن بۇل فەستيۆال ءداستۇر مەن زاماناۋي تەحنولوگيانى جانە الەمنىڭ 14-تەن استام ەلىنەن كەلگەن قوي شارۋاشىلىعى سالاسىنىڭ ۇزدىك ماماندارىن بىرىكتىرەدى،- دەپ حابارلايدى Dalanews.kz
«عىلىمي-تاجىريبەلىك كونفەرەنسيا، ۇلكەن فورۋم وتەدى، وندا ءبىز قوي شارۋاشىلىعىن دامىتۋ ماسەلەلەرىن تالقىلاپ، ونىڭ دامۋىنا سەرپىن بەرۋدى كوزدەيمىز. 25-تەن استام ءىس-شارا وتكىزۋ جوسپارلانعان. فورۋمنان بولەك بىرنەشە تاقىرىپتىق كورمەلەر بولادى. بۇل فورماتتى ءبىز پەتروپاۆل قالاسىندا سىناپ كوردىك. حالىق وتە جاقسى قابىلدادى»، – دەدى «اۋىل» پارتياسىنىڭ ازاماتتىق باستامالاردى قولداۋ دەپارتامەنتىنىڭ ديرەكتورى باعدات قادىروۆ.
ءىس-شارا اياسىندا قوناقتاردى كۇتىپ تۇرعان باعدارلامالار:
- «AUYL FEST. قوي شارۋاشىلىعى» حالىقارالىق فەستيۆالىنىڭ فورۋمى؛
- قوي شارۋاشىلىعى جەتىستىكتەرىنىڭ كورمەسى؛
- قوي جۇنىنەن تىگىلگەن كيىمدەردىڭ ءسان كورسەتىلىمى، دەفيلە، تابيعي قوي تەرىسىنەن جاسالعان كوستيۋمدەر بايقاۋى، كوللەكسيالار جارمەڭكەسى؛
- قوي جانە قوزى ەتىنەن جاسالعان تاعامدار بويىنشا جەتەكشى اسپازداردىڭ قاتىسۋىمەن كۋلينارلىق بايقاۋ؛
- قوي قىرقۋ بويىنشا شەبەرلىك ساباعى جانە جارىس؛
- قوي ەتىن مۇشەلەۋ بويىنشا شەبەرلىك ساباعى جانە جارىس؛
- اسىل تۇقىمدى قوشقارلار اۋكسيونى؛
- قازاق تازىسى مەن توبەتى تۇقىمدارىنىڭ كورمەسى؛
- ۇلتتىق ويىندار مەن ەتنوسپورت: ساداق اتۋ، اسىق اتۋ، توعىزقۇمالاق، قوشقار كوتەرۋ، حان تالاپاي، بەس اسىق، ارقان تارتۋ؛
- قازاقستان ەسترادا جۇلدىزدارىنىڭ قاتىسۋىمەن كونسەرتتىك باعدارلاما.
فەستيۆال جارقىن ەتنومادەني وقيعا عانا ەمەس، سونداي-اق قوي شارۋاشىلىعىن قازاقستان اگروونەركاسىپ كەشەنىنىڭ نەگىزگى باعىتتارىنىڭ ءبىرى رەتىندە دامىتۋ مەن ينۆەستيسيا تارتۋدىڭ ءتيىمدى الاڭى بولماق.
