«سوڭعى جىلدارى وبلىستا 7 اۆتوماتتى گاز تاراتۋ ستانسيالارىنىڭ قۇرىلىسى جۇرگىزىلدى. قۇرىلىستىڭ جالپى قۇنى - 22،2 ملرد. تەڭگە. ونىڭ ۇشەۋى جۋىردا پايدالانۋعا بەرىلەدى. ولار كەنتاۋ، ورداباسى، ارىس اۋداندارىنداعى گاز تاراتۋ بەكەتتەرى. اۋىلدارداعى ىشكى قۇرىلىس جۇمىستارى اياقتالعاننان سوڭ ىسكە قوسىلۋعا دايىن تۇرعان ستانسيا ورداباسى، وتىرار اۋداندارىن تولىعىمەن گازبەن قامتاماسىز ەتۋگە جۇمىس جاسايتىن بولادى. وسى بەكەتتەردى ىسكە قوسساق، وبلىستاعى سولتۇستىك اۋدانداردى گازبەن قامتۋ مۇمكىندىگى اشىلادى»،-دەدى جانسەيىت قانسەيىت ۇلى.
ايتا كەتەيىك، بىلتىر وبلىستا 25 ەلدى مەكەندى گازعا قوسۋ جۇمىستارى جۇرگىزىلگەن. بۇل ماقساتقا 13،7 ملرد.تەنگە باعىتتالعان بولاتىن. بيىل 70 ەلدى مەكەنگە گاز قۇبىرلارى تارتىلىپ، قۇرىلىس جۇمىستارى جۇرگىزىلۋدە. جالپى، وبلىستا 844 ەلدى مەكەننىڭ 300ء-ى تابيعي گازبەن قامتاماسىز ەتىلگەن. ياعني بۇل ءوڭىردىڭ 1 755 307 تۇرعىنى كوگىلدىر وتىنعا قول جەتكىزىپ وتىر.
وبلىستىڭ ەلدى مەكەندەرىن 2017-2020 جىلدار ارالىعىندا گازداندىرۋدىڭ كەشەندى ءىس-شارا جوسپارى ازىرلەندى. جوسپارعا سايكەس 2020 جىلعا قوسىمشا 383 ەلدى مەكەندى گازداندىرۋ جوسپارلانىپ وتىر. 2021 جىلعا تابيعي گازبەن قامتىلعان ەلدى مەكەندەر سانىن 683-كە نەمەسە 2 ملن. 720 مىڭ تۇرعىنعا جەتكىزۋ مەجەلەنۋدە.
ەستەرىڭىزگە سالا كەتەيىك، 2013 جىلى وبلىسىمىزدا ەلباسىنىڭ تىكەلەي قولداۋىمەن جۇزەگە اسقان «بەينەۋ-بوزاي-شىمكەنت» ماگيسترالدى گاز قۇبىرى بويىنان 7 اۆتوماتتاندىرىلعان گاز رەتتەۋشى ستانسيالارىنىڭ قۇرىلىستارى جۇرگىزىلىپ، بۇگىنگى تاڭدا 4ء-ى (تۇركىستان ق.، يقان ە.م.، سايرام اۋد.، بايدىبەك اۋد.،) پايدالانۋعا بەرىلسە، قالعان 3ء-ىن (كەنتاۋ ق.، وتىرار اۋد.، ورداباسى اۋد.،) اعىمداعى جىلى اياقتاۋ جوسپارلانعان.
