ءوز كەزەگىندە ءسوز العان كومپانيا باسشىسى بۇگىندە ەل اۋماعىندا 40 مىڭ شارۋا قوجالىعى ەنەرگيا كوزدەرىنە قول جەتكىزە الماي وتىرعانىنا توقتالدى. وسى رەتتە ول جەل گەنەراتورلارىن ورناتۋ – ۇتىمدى دەپ ەسەپتەيدى.
– Tree Energy كومپانياسى بۇگىندە بالامالى ەنەرگيا كوزدەرىن ىزدەۋ مەن وندىرۋدە ءساتتى جۇمىس اتقارىپ كەلەدى. مۇنىڭ ءبارى ەل اۋماعىنداعى كۇن مەن جەلدىڭ مۇمكىندىگىن قولدانىپ كورۋ يدەياسىنان تۋىنداعان بولاتىن. العاشقى قولدانىستى گاراجدا ىسكە اسىرىپ كوردىك. بۇگىنگى تاڭدا نە رەسەيدە، نە ورتا ازيادا بالاماسى جوق بىرەگەي جەل گەنەراتورىن زاۋىتتا ءوندىرۋ دەڭگەيىنە جەتىپ وتىرمىز، – دەدى جانبولات مۇزبايەۆ.
بۇگىندە بالامالى ەنەرگيا كوزدەرى عىلىمي ورتادا ۇلكەن قىزىعۋشىلىق تۋعىزىپ وتىر. اتاپ ايتقاندا، دانيا جەل گەنەراتورلارىنىڭ كومەگىمەن بارلىق ەلەكتر قۋاتىنىڭ 40 پايىزىن وندىرسە، پورتۋگاليا 23 پايىزىن، يسپانيا 16، يرلانديا – 14، گەرمانيا – 8 پايىزىن وندىرۋگە قاۋقارلى. ال قازاقستاندا نەبارى 0،5 پايىزدى عانا قۇرايدى.
كومپانيانىڭ مۇمكىندىكتەرىمەن تانىسىپ شىققان وبلىس اكىمى جەل كۇشىمەن وندىرەتىن ەلەكتر ەنەرگياسى قۋاتىن اۋىل شارۋاشىلىعىنا قولدانۋدىڭ ءتيىمدى ەكەنىنە توقتالدى.
– وڭتۇستىك قازاقستاندا جەل كۇشىمەن الىناتىن ەلەكتر ەنەرگياسى قۋاتىن كەڭىنەن جانە مول وندىرۋگە بولادى. ويتكەنى بىزدە ۇزدىكسىز جەل سوعىپ تۇراتىن ايماقتار بارشىلىق. جەل ەنەرگياسىنىڭ باسقا ەنەرگيا كوزدەرىنەن ەكولوگيالىق جانە ەكونوميكالىق ارتىقشىلىقتارى كوپ. سوندىقتان الداعى ۋاقىتتا جەل ەنەرگياسىن تۇراقتى پايدالانۋ ءۇشىن جەل ەنەرگەتيكاسى قوندىرعىلارىن باسقا ەنەرگيا كوزدەرىمەن كەشەندى تۇردە ۇشتاستىرۋ يدەياسىن تولىعىمەن قولدايمىز، – دەدى جانسەيىت قانسەيىت ۇلى.
ايتا كەتەيىك، وڭتۇستىك قازاقستاندا تابيعي رەسۋرستاردى پايدالانا وتىرىپ، 207،3 مۆت بولاتىن بالامالى ەلەكتر ەنەرگياسىن وندىرەتىن 6 جوبا جۇزەگە اسىرىلۋدا. بۇل جوبالار تولەبي، سارىاعاش، ماقتارال، بايدىبەك، وتىرار اۋداندارىندا جۇرگىزىلۋدە.
https://dalanews.kz/31328
