وڭتۇستىك شارۋالارى ءوزارا تاجىريبە الماسىپ، كووپەراتيۆتەر قۇرۋ ىسىنە جاپپاي جۇمىلۋى ءتيىس. بۇل ءوز كەزەگىندە اۋىل شارۋاشىلىعى سالاسىنداعى قوردالانعان ماسەلەلەردى بىرىگىپ، ۇجىمداسىپ شەشۋگە ىقپال ەتەتىن بولادى. سونداي-اق مەملەكەت تاراپىنان ءبولىنىپ وتىرعان  ءتۇرلى جەڭىلدىكتەرگە قول جەتكىزۋگە سەپتىگىن تيگىزەدى. بۇل تۋرالى  تۇلكىباس اۋدانى، كەرەيت اۋىلىندا وتكەن  «كووپەراسيا-اگروونەركاسىپ كەشەنىن دامىتۋدىڭ نەگىزى» اتتى كوشپەلى سەميناردا وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ ءمالىم ەتتى.

سەمينارعا قاتىسۋشىلار الدىمەن  2012 جىلى وڭىرلىك يندۋستريالدى كارتا شەڭبەرىندە  ىسكە قوسىلعان  «اقسانات ينجينيرينگ» ءجشس-نىڭ بەكىرە تۇقىمداس بالىق ءوسىرۋ فەرماسىنىڭ جۇمىسىمەن تانىستى. جوبانىڭ جالپى قۇنى – 452،0  ملن تەڭگە. كاسىپورىن جىلىنا  40 توننا بالىق ەتى مەن 30،0 كەلى  قارا  ۋىلدىرىق وندىرۋگە قاۋقارلى. بالىق ءوسىرۋ ىسىندە مول تابىسقا كەنەلىپ وتىرعان «First Fish Company» ج ش س شاراعا قاتىسۋشىلارعا بالىق وسىرۋدەگى تاجىريبەسىمەن ءبولىستى.

ايتا كەتەيىك، قازىرگى تاڭدا وبلىسىمىزدا  بالىق ونىمدەرىن قايتا وڭدەيتىن 3،   بالىق وسىرەتىن 28 شارۋاشىلىق بار. ماسەلەن ولار 2016 جىلى 5213 توننا بالىق ونىمدەرىن وندىرگەن.

سەميناردا ءسوز العان ايماق باسشىسى جانسەيىت تۇيمەبايەۆ اۋىل شارۋاشىلىعىن دامىتۋداعى نەگىزگى باسىمدىقتارعا توقتالىپ، شارۋالاردى كووپەراتيۆتەرگە بىرىگۋگە شاقىردى.

– ءبىزدىڭ وبلىستىڭ بولاشاعى – اۋىل شارۋاشىلىعىندا. سوندىقتان تاجىريبەسى مول شارۋا قوجالىقتارى تىرلىگىن ەندى باستاعان  ارىپتەستەرىنە بارىنشا قولداۋ ءبىلدىرۋى قاجەت. بىلگەنىن ۇيرەتىپ، اياقتان تۇرۋىنا كومەك قولىن سوزعانى ابزال. سوندا عانا ۇساق شارۋاشىلىقتاردى بىرىكتىرۋگە، ءىرى جوبالاردى ىسكە اسىرۋعا كىرىكتىرۋگە بولادى. بۇل ءوز كەزەگىندە مەملەكەت تاراپىنان بولىنگەن سۋبسيديالارعا قول جەتكىزۋگە ىقپال ەتەدى. ەڭ باستىسى – وڭتۇستىكتىڭ اۋىل شارۋاشىلىعى داميدى، – دەدى جانسەيىت قانسەيىت ۇلى.



بۇدان بولەك سەميناردا   اۋىل  شارۋاشىلىعى ونىمدەرىنىڭ كورمەسى ۇيىمداستىرىلدى.  «كووپەراسيا-اگروونەركاسىپ كەشەنىن دامىتۋدىڭ نەگىزى» تاقىرىبىندا   تەوريالىق جيىندا  بالىق شارۋاشىلىعى جانە اسىل تۇقىمدى مال شارۋاشىلىعىن  دامىتۋ، اۋىلدىق ەلدى-مەكەندەردە ءسۇت ءوندىرۋشى شارۋاشىلىقتاردىڭ باسىن قوسۋ،  اۋىل شارۋاشىلىعى وندىرىستىك كووپەراتيۆىن قۇرۋ تۋرالى سالا ماماندارىنىڭ پىكىرلەرى تىڭدالدى.

مۇنان سوڭ وبلىس باسشىسى اتالعان مەكەمەگە قاراستى «ارسەن اس» ءجشس-نىڭ جەمىس-جيدەك كونسەنتراتتارىن جانە تابيعي سۋسىندار شىعارۋ سەحىن ارالاپ كوردى. جوبانىڭ جالپى قۇنى  600 ملن.تەڭگە.  ونىڭ ىشىندە  120 ملن. تەڭگەسى سەرىكتەستىكتىڭ ءوز قارجىسى، 480،0 ملن. تەڭگەسى ايو «ماكسيمۋم» قارجى ۇيىمى ەسەبىنەن نەسيەلەندىرىلگەن. اتالعان زاۋىتتا 38 ادام ەڭبەك ەتەدى.

ال، «اقسانات ينجينيرينگ» ج ش س  2014 جىلى اشىلعان فەرماسىندا 182 باس جىلقى بار.  جوبانىڭ جالپى قۇنى – 200 ملن تەڭگە. فەرمادا  اقالتەكە، دونسكايا، كۋشۋمسكايا، پوني جانە  اسىلتۇقىمدى  ءمىنىس جىلقىلارى جەتكىلىكتى.  اتالعان شارۋاشىلىق 1120 ۇساق مال مەن  شەتەلدەن اكەلىنگەن اسىل تۇقىمدى 660 ابەردين –انگۋس، 241 گەرەفورد سيىرىن باعىپ وتىر.  ودان وزگە جەرگىلىكتى 900 ءىرى قارا مال وسىرىلۋدە.



وقو اكىمىنىڭ باسپا ءسوز قىزمەتى