Ońtústiktiń agroónerkásip kesheni qarqyndy damidy
Ońtústik sharýalary ózara tájiribe almasyp, kooperativter qurý isine jappai jumylýy tiis. Bul óz kezeginde aýyl sharýashylyǵy salasyndaǵy qordalanǵan máselelerdi birigip, ujymdasyp sheshýge yqpal etetin bolady. Sondai-aq memleket tarapynan bólinip otyrǵan túrli jeńildikterge qol jetkizýge septigin tigizedi. Bul týraly Túlkibas aýdany, Kereit aýylynda ótken «Kooperatsiia-agroónerkásip keshenin damytýdyń negizi» atty kóshpeli seminarda Ońtústik Qazaqstan oblysynyń ákimi Janseiit Túimebaev málim etti.
Seminarǵa qatysýshylar aldymen 2012 jyly óńirlik indýstriialdy karta sheńberinde iske qosylǵan «Aqsanat Injiniring» JShS-niń bekire tuqymdas balyq ósirý fermasynyń jumysymen tanysty. Jobanyń jalpy quny – 452,0 mln teńge. Kásiporyn jylyna 40 tonna balyq eti men 30,0 keli qara ýyldyryq óndirýge qaýqarly. Balyq ósirý isinde mol tabysqa kenelip otyrǵan «First Fish Company» JShS sharaǵa qatysýshylarǵa balyq ósirýdegi tájiribesimen bólisti.
Aita keteiik, qazirgi tańda oblysymyzda balyq ónimderin qaita óńdeitin 3, balyq ósiretin 28 sharýashylyq bar. Máselen olar 2016 jyly 5213 tonna balyq ónimderin óndirgen.
Seminarda sóz alǵan aimaq basshysy Janseiit Túimebaev aýyl sharýashylyǵyn damytýdaǵy negizgi basymdyqtarǵa toqtalyp, sharýalardy kooperativterge birigýge shaqyrdy.
– Bizdiń oblystyń bolashaǵy – aýyl sharýashylyǵynda. Sondyqtan tájiribesi mol sharýa qojalyqtary tirligin endi bastaǵan áriptesterine barynsha qoldaý bildirýi qajet. Bilgenin úiretip, aiaqtan turýyna kómek qolyn sozǵany abzal. Sonda ǵana usaq sharýashylyqtardy biriktirýge, iri jobalardy iske asyrýǵa kiriktirýge bolady. Bul óz kezeginde memleket tarapynan bólingen sýbsidiialarǵa qol jetkizýge yqpal etedi. Eń bastysy – Ońtústiktiń aýyl sharýashylyǵy damidy, – dedi Janseiit Qanseiituly.
Budan bólek seminarda aýyl sharýashylyǵy ónimderiniń kórmesi uiymdastyryldy. «Kooperatsiia-agroónerkásip keshenin damytýdyń negizi» taqyrybynda teoriialyq jiynda balyq sharýashylyǵy jáne asyl tuqymdy mal sharýashylyǵyn damytý, aýyldyq eldi-mekenderde sút óndirýshi sharýashylyqtardyń basyn qosý, aýyl sharýashylyǵy óndiristik kooperativin qurý týraly sala mamandarynyń pikirleri tyńdaldy.
Munan soń oblys basshysy atalǵan mekemege qarasty «Arsen As» JShS-niń jemis-jidek kontsentrattaryn jáne tabiǵi sýsyndar shyǵarý tsehin aralap kórdi. Jobanyń jalpy quny 600 mln.teńge. Onyń ishinde 120 mln. teńgesi seriktestiktiń óz qarjysy, 480,0 mln. teńgesi AIO «Maksimým» qarjy uiymy esebinen nesielendirilgen. Atalǵan zaýytta 38 adam eńbek etedi.
Al, «Aqsanat Injiniring» JShS 2014 jyly ashylǵan fermasynda 182 bas jylqy bar. Jobanyń jalpy quny – 200 mln teńge. Fermada Aqalteke, Donskaia, Kýshýmskaia, poni jáne asyltuqymdy minis jylqylary jetkilikti. Atalǵan sharýashylyq 1120 usaq mal men shetelden ákelingen asyl tuqymdy 660 aberdin –angýs, 241 gereford siyryn baǵyp otyr. Odan ózge jergilikti 900 iri qara mal ósirilýde.
OQO ákiminiń baspasóz qyzmeti
