مىنە، ءدال وسى ەرەكشە قورعالاتىن ايماقتىڭ ءبىراز بولىگىنە، ناقتىراق ايتساق، 13،5 گەكتار جەرگە وسىدان بىرنەشە جىل بۇرىن بىرىككەن اراب امىرلىكتەرىنىڭ اتاقتى شەيحىنا ارنالعان دەمالىس ايماعى سالىنىپتى دەگەن ءسوز تاراعان. تاياۋدا ءبىز اتالمىش ولكەدەگى «سايرام – وگەم» ۇلتتىق تابيعي پاركىنىڭ ىشىنەن ارابتارعا ارناپ سالىنعان دەمالىس ايماعى تۇرعان جەرگە بارىپ قايتتىق، دەپ جازادى زامانا باسىلىمى.
ەكى تاۋدىڭ قاق ورتاسىندا، «سايرام» شىڭىنا شىعار جەردىڭ جولىن جاۋىپ العان دەمالىس ايماعى يت تۇمسىعىن سۇعا المايتىنداي ەتىپ قورشاۋعا الىنعان. «كىرۋ ءۇشىن «East weast company LTD» دەگەن مەكەمەدەن ارنايى رۇقسات الۋ كەرەك»، – دەدى ەسىك الدىندا تۇرعان كۇزەتشىلەر. دەگەنمەن ءبىز وندا ءدال قازىرگى ۋاقىتتا كىمدەر دەمالىپ جاتقانىن، جالپى، دەمالىس ايماعىنىڭ قانداي ەكەنىن سول وڭىردە تۇراتىن، ىشىندە نە بوپ جاتقانىن بەس ساۋساقتاي بىلەتىن ءبىر ازاماتتان سۇراپ الدىق.
«بۇل جەردە بۇگىندە ءتورت ءۇندى ازاماتى جاتىر. ولار – شەيحتىڭ قىزمەتشىلەرى. ياعني ولاردىڭ مىندەتى – وسى دەمالىس ايماعىن ايناداي ەتىپ تازا ۇستاۋ. سول ءۇشىن ولارعا اي سايىن 1 مىڭ دوللار كولەمىندە جالاقى تولەنەدى. ال كىرە بەرىسىندەگى قاقپادا ءوزىمىزدىڭ قازاق جىگىتتەرى جۇمىس ىستەيدى. ۆاحتالىق ادىسپەن كەزەك اۋىساتىن كۇزەتشىلەرگە ايىنا 35 مىڭ تەڭگەدەن جالاقى تولەنەدى.
ال ەندى دەمالىس ايماعىنىڭ ءىشى تۋرالى ايتار بولسام، وندا 7-8 كوتتەدج بار. ەڭ ۇلكەنى، ەكى قاباتتىسى شەيحتىكى. قالعاندارى قىزمەتشىلەرگە ارناپ سالىنعان. سونداي-اق جاتتىعۋ زالى، اسحانا مەن كولىك تۇراعىنا ارناپ سالىنعان عيمارات تا بار. ونىڭ ىشىندە سۋ جاڭا 4 «لەند كرۋزەر» ءدجيپى جانە تاۋ باسىنا شىعۋعا ارنالعان كىشىگىرىم كولىكتەر تۇر. الگى كولىكتەردى جارىتىپ ەشكىم مىنبەيدى دە، دەگەنمەن جىلىنا ءبىر رەت شىمكەنتتەن ءبىر كولىك ءجوندەۋشى كەلىپ، الگىلەردىڭ ءبارىن تەكسەرىپ، مايىن اۋىستىرىپ كەتەدى»، – دەدى ول.
اراب شەيحى بۇل دەمالىس ايماعىنا سوڭعى رەت شىمكەنتتىڭ «بەكجان» بازارىنىڭ جانىنان سالىنعان ورتالىق مەشىتتىڭ اشىلۋ سالتاناتىنا كەلگەندە باس سۇققان ەكەن. دەگەنمەن جىلىنا ءبىر رەت، كۇزگە قاراي شەيحتىڭ تۋىستارى ما، الدە قىزمەتشىلەرى مە، ايتەۋىر توپىرلاعان اراب كەلىپ، دەمالىپ كەتەدى ەكەن. مۇنى بىزگە سول ماڭداعى كەڭەسارىق اۋىلىنىڭ تۇرعىنى تەمىرحان اسەنوۆ ايتىپ بەردى.
https://www.youtube.com/watch؟v=tH6MnbczmM8
«بۇل جەر نەگىزىندە ورمان شارۋاشىلىعىنا قارايتىن جەر ەدى، – دەيدى ت.اسەنوۆ. – جەتى-سەگىز جىلدىڭ كولەمى بولىپ قالدى، ارابتارعا ارنالعان دەمالىس ايماعى سالىنىپ، تۇرعىنداردىڭ تاۋدى ەمىن-ەركىن ارالاۋىنا كەدەرگى كەلتىرىپ جاتىر. ياعني تاۋدىڭ ەڭ بيىك جەرى – «سايرام» شىڭىنا شىعۋ ءۇشىن وسى جەردى ارابتارعا جالعا بەرگەن فيرمادان رۇقسات الۋ كەرەك ەكەن. مەنىڭشە، ارابتار بۇل ايماققا بەكەردەن-بەكەرگە قىزىعىپ وتىرعان جوق. كۇزدىگۇنى، قۇستار قايتقان تۇستا يتەلگى ۇستايتىن سياقتى. ايتپەسە مۇندا ولارعا باسقا نە كەرەك؟
بۇل جەر ارابتار قورشاپ العانعا دەيىن «التەكس» دەگەن سپورتتىق ساۋىقتىرۋ لاگەرى ەدى. سول زامانداردا وبلىستىق دەنە شىنىقتىرۋ جانە سپورت باسقارماسىنىڭ جولداماسىمەن ەلىمىزگە تانىمال سپورتشىلار كەلىپ، وسىندا دەمالاتىن. ءقازىر ول داۋرەن كەلمەسكە كەتتى».
قىسقاسى، تابيعاتى تاماشا، كوركى كوز تارتاتىن قاسقاسۋدىڭ ەڭ شىرايلى دا شۇرايلى جەرى بۇگىندە ارابتارعا ارنالعان دەمالىس ايماعىنا اينالىپ كەتىپتى. ول جەرگە سىرتتان بارعان دەمالۋشىلار تۇگىلى، سول وڭىردە تۋىپ-وسكەن جانداردىڭ ءوزىنىڭ كىرۋىنە اتىمەن رۇقسات جوق.
جەرگىلىكتى حالىقتىڭ ىشتەي نارازىلىعىن تۋعىزىپ وتىرعان بۇل قورشاۋلى ايماق كەلەشەكتە قاسقاسۋلىقتارعا قايتارىلا ما، جوق الدە تۇبىندە ارابتاردىڭ مەنشىگىنە ءوتىپ كەتە مە، بۇل تۋرالى ازىرگە ەشكىم ەشتەڭە ايتا المايدى.
