شارانىڭ ماقساتى – جۇرتشىلىقتىڭ ۇلتتىق مادەنيەت مەن سالت-داستۇرگە قىزىعۋشىلىعىن ارتتىرۋ جانە جاستاردى سالاۋاتتى ءومىر سالتىنا تاربيەلەۋ، سونداي-اق قازاق حالقىنىڭ ۇلتتىق سۋسىنى – قىمىزدىڭ قۇندىلىعىن ناسيحاتتاۋ. ۇلتتىق سۋسىن مەرەكەسىنە وبلىس اكىمى جانسەيىت تۇيمەبايەۆ، وبلىستىق ماسليحاتتىڭ دەپۋتاتتارى، ءوڭىر ارداگەرلەرى مەن زيالى قاۋىم وكىلدەرى، ەتنومادەني ورتالىقتاردىڭ ءتوراعالارى جانە رەسپۋبليكالىق، وبلىستىق بلوگەرلەر مەن ب ا ق قىزمەتكەرلەرى قاتىستى.
فەستيۆالدە العاشقى بولىپ ءسوز العان ءوڭىر باسشىسى جانسەيىت قانسەيىت ۇلى ايتۋلى مەرەكەمەن قۇتتىقتاپ، ءداستۇردىڭ ءمان-ماڭىزىنا توقتالدى.
– ءسالت-داستۇرىمىزدى قايتا جاڭعىرتىپ، جاس ۇرپاققا ۇلگى رەتىندە ۇيىمداستىرىلىپ وتىرعان «قىمىزمۇرىندىق» فەستيۆالىنىڭ ورنى وراسان زور. بۇل دەگەنىمىز– ەرتە زامانعى تامىرىمىزعا قايتا ورالۋ. قىمىزمۇرىندىق – بيە بايلاپ، العاشقى قىمىز ءىشۋ تويى جانە ىنتىماقتىڭ، ەڭبەكتىڭ، بىرلىكتىڭ مەرەكەسى. بيە ساۋىلىپ، ونىڭ ءسۇتى قورلانىپ، اشىتىلعان سوڭ ەكى-ۇش كۇن بويى جينالعان قىمىزعا اقساقالدار مەن كورشى-قولاڭدار قىمىزمۇرىندىققا شاقىرىلعان. ياعني العاشقى قىمىز ادامدارعا سالتاناتپەن ۇسىنىلىپ، «كوپكە بۇيىرسىن» دەگەن تىلەكپەن بەرىلگەن. قازاقتا سۋسىننىڭ قۇنان قىمىز، دونەن قىمىز، ۋىز قىمىز، جازعى قىمىز، تۇنەمەل قىمىز سياقتى تۇرلەرى بار. بۇلاردىڭ ءارقايىسىنىڭ دايىندالۋ ءتاسىلى دە ءارتۇرلى. ءداستۇر بويىنشا حالقىمىز بۇل مەرەكەدە «ساۋار كوپ بولسىن!»، «اق مول بولسىن!»، «اۋزىمىزدى اقتان ايىرماسىن» دەپ تىلەك ايتىسقان، ولاي بولسا بۇگىنگى «قىمىزمۇرىندىق» تويى قۇتتى بولسىن، – دەدى ايماق باسشىسى.
سونداي-اق، ايتۋلى ءىس-شارا اياسىندا قىمىز باپتاۋشىلار سايىسى، قولونەر شەبەرلەرىنىڭ كورمەسى، قۇلىندى بيە جانە سايگۇلىكتەردىڭ شەرۋى، ۇلتتىق ات سپورت تۇرلەرىنەن كورىنىستەر، قىمىز ءىشۋ سايىسى ءوتتى. سايىستارعا 15 اۋدان، قالالاردان ۇمىتكەرلەر قاتىسىپ، جەڭىمپازدار وبلىس اكىمىنىڭ ارنايى سىيلىعىمەن، ديپلومدارمەن ماراپاتتالدى.
بۇدان بولەك، وڭىردەگى بارلىق اۋدان، قالالار كيىز ءۇي تىگىپ، ونى بەزەندىرىپ، ەتنواۋىل ۇيىمداستىرىپ قوناقتارعا مەرەكەلىك كوڭىل-كۇي سىيلادى.
قىمىزمۇرىندىق فەستيۆالىندە قىمىز باپتاۋدان باس جۇلدەنى تۇلكىباس اۋدانىنىڭ ۇمىتكەرلەرى يەلەندى. تاۋ باۋرايىندا باپتالعان بال قىمىزعا جۇرتشىلىق ريزا بولدى. باس جۇلدە يەگەرلەرىنە قۇلىندى بيە تارتۋ ەتىلدى. ءبىرىنشى ورىندى بايدىبەك اۋدانىنىڭ قىمىز باپتاۋشىلارى ەنشىلەسە، ەكىنشى جانە ءۇشىنشى ورىنداردى تۇركىستان قالاسى مەن ورداباسى اۋدانىنىڭ ۇمىتكەرلەرى يەمدەندى. قولونەرشىلەر بايقاۋىندا تۇركىستاندىق شەبەرلەردىڭ باعى جانسا، سايگۇلىكتەر سايىسىندا شىمكەنت قالاسىنىڭ اتبەگىلەرى جەڭىمپاز بولدى. جۇرتشىلىق نازارىن اۋدارعان قىمىز قۇمارلار باسەكەسىنە بارلىق اۋداننان وتە ىنتالى ازاماتتار قاتىستى. اسا قىزىقتى وتكەن جارىستا 10.5 توستاعان قىمىزدى توقتاماي سىمىرگەن ارىس قالاسى، مونتايتاس اۋىلىنىڭ تۇرعىنى الماس جامانقۇلوۆ جەڭىسكە جەتتى. جەڭىمپازدار مەن جۇلدەگەرلەرگە اقشالاي سىيلىقتار تاپسىرىلدى. سونىمەن قاتار، قىمىز باپتاۋ سايىسىنا قاتىسقان ۇمىتكەرلەرگە ىنتالاندىرۋ سىيلىقتارى تابىس ەتىلدى.
