م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ عالىمدارى «اشپوليمەتالل» اق-ى اۋماعىندا ءتۇستى مەتالل كەنىشتەرىن ءوندىرۋ بارىسىندا پايدا بولعان قالدىقتاردان كومپوزيسيالىق سەمەنت الۋدىڭ تەحنولوگياسىن ويلاپ تاپتى، – دەپ حابارلايدى «مەملەكەتتىك ۇلتتىق عىلىمي-تەحنيكالىق ساراپتاما ورتالىعى» اق باسپا ءسوز قىزمەتى.

جاڭا تەحنولوگيانى دايىنداۋعا تەحنيكا عىلىمنىڭ دوكتورى پروفەسسور ج.ت. ايمەنوۆ جەتەكشىلىك جاساعان.

ءتۇستى مەتالل كەندەرىن وڭدەۋدەن پايدا بولعان قالدىقتاردى پايدالانۋعا قاتىستى عىلىمي جوبا قۇرىلىس سالاسى مەن ءوڭىردىڭ ەكولوگيالىق ماسەلەلەرىن رەتتەۋگە مۇمكىندىك تۋعىزىپ وتىر. مامانداردىڭ ەسەبىنشە، جاڭا تەحنولوگيامەن وندىرىستىك قالدىقتاردى وڭدەۋ بارىسىندا 30 پايىزعا دەيىن پورتلاندسەمەنت كلينكەرىن الۋعا بولادى ەكەن. سونىمەن قاتار اۋعا تارايتىن سو2 30-40 پايىزعا دەيىن ازايتۋعا مۇمكىندىك بەرەدى.

تەحنولوگيا كەنتاۋ قالاسى ماڭىندا تاۋ بولىپ ءۇيىلىپ جاتقان وندىرىستىك قالدىقتاردى يەگەرىپ، ەكونوميكالىق يگىلىگىن كورۋگە مۇمكىندىك بەرەتىنىن ايتا كەتۋىمىز كەرەك. بۇگىندە مۇندا 135 ملن. تونناعا دەيىن وندىرىستىك قالدىقتار جينالىپ قالعان.