قاتىسۋشىلاردىڭ باسىم كوپشىلىگى تىگىنشىلىكتى يگەرسە، قالعانى ەلەكتر سلەسارى ماماندىعىن مەڭگەرگەن. بۇل تۋرالى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ماماندارى ءمالىم ەتتى.
ءۇش اي ىشىندە ماماندىقتى مەڭگەرگەن ازاماتتار تۇراقتى جۇمىسقا دا ورنالاستى. ولار از ۋاقىت ارالىعىندا ءبىرى تىگىنشى، ءبىرى ەلەكتر سلەسارى ماماندىعىنا ماشىقتانىپ الدى. ەندى جۇمىسقا كىرىسۋگە ساقاداي ساي. ال ءمولدىر امانتايەۆا ءتىپتى ءوز بيزنەسىن اشىپ، سۇيىكتى ىسىنەن ءناپاقا تابۋدى ويلاستىرىپ تا قويعان. باعدارلاما قاتىسۋشىسى الداعى ۋاقىتتا جەڭىلدەتىلگەن نەسيە الىپ، قاراجاتقا جەكە تىگىن سەحىن اشپاق نيەتتە.
ايتا كەتەيىك، وبلىستا باعدارلامانىڭ ءبىرىنشى باعىتى شەڭبەرىندە ماماندىعى جوق ازاماتتار ەڭبەك نارىعىنىڭ سۇرانىسىنا وراي كاسىپتىك ءبىلىم الۋعا 4500، قىسقا مەرزىمدى كاسىپتىك وقىتۋعا 12 مىڭنان اسا ادام جولداندى. قىسقا مەرزىمدى كاسىپتىك وقىتۋعا جولدانعانداردىڭ جارتىسىنا جۋىعى وقۋدى اياقتاپ، 2 مىڭعا جۋىق ادام جۇمىسقا ورنالاستى دەيدى سالا ماماندارى. جەرگىلىكتى بيلىك وكىلدەرى وبلىستا باعدارلامانى ءوز دەڭگەيىندە ىسكە اسىرۋ ناتيجەسىندە جۇمىسسىزدار ازايىپ، سۇرانىسقا يە ماماندار قاتارىن تولىقتىرىپ وتىرمىز دەيدى.
ايتا كەتەيىك، بۇگىندە وڭىردە سۇرانىسى زور تىگىنشى، سانتەحنيك، ەلەكتر سلەسارى سياقتى باس-اياعى ون بەس ماماندىقتىڭ ءتىزىمى جاساقتالىپ وتىر. جۇمىسسىزدىقپەن كۇرەسۋ ماقساتىندا قولعا الىنعان باعدارلاما اياسىندا وسىناۋ ماماندىقتارعا ازاماتتاردى كىسقا مەرزىمدى كاسىپتىك وقىتۋ جوسپارى ءوز دەڭگەيىندە جۇرگىزىلۋدە دەيدى سالاعا جاۋاپتىلار.
