2018 جىلى وبلىستىڭ اۋىل شارۋاشىلىعى ەڭبەك ونىمدىلىگىن ارتتىرۋ مەن ەكسپورتتى ۇلعايتۋ باعىتىندا داميتىن بولادى. ياعني، اۋىل شارۋاشىلىعى داقىلدارىنىڭ ەگىس كولەمى 15 مىڭ گا ۇلعايتىلىپ، جالپى ەگىس كولەمى 833 مىڭ گا جەتكىزىلەدى.  ال ينتەنسيۆتى باۋلار 800 گا، ءجۇزىم 736 گا، تاڭقۋراي 300 گا، جاڭعاق شارۋاشىلىعى قوسىمشا 1000 گا جەرگە وتىرعىزىلماق. بۇدان بولەك، جىلىجايلار 200 گا، تامشىلاتىپ سۋعارۋ ءادىسى 7 200 گەكتارعا ەنگىزىلەتىن بولادى. بۇل جونىندە «تۇركىستان» سارايىندا وتكەن وبلىس اكىمىنىڭ ەسەپتى كەزدەسۋىندە ءمالىم بولدى.

بيىل شارۋا قوجالىقتاردى كووپەراتيۆكە بىرىكتىرۋ جۇمىستارى جالعاساتىنىن ايتقان ايماق باسشىسى، قۇرىلاتىن كووپەراتيۆتەردە 2 700 توننا ەت، 34 200 توننا ءسۇت، 6 مىڭ توننا جەمىس، 5 مىڭ توننا كوكونىس دايىنداۋ جوسپارلانىپ جاتقانىن جەتكىزدى.



– سونىمەن قاتار، وبلىستا جاڭادان 3 173 شاعىن مال بورداقىلاۋ الاڭى، 731 جانۇيالىق ءسۇت فەرماسى، 15 شاعىن قۇس فەرماسى، 7 بالىق شارۋاشىلىعى اشىلادى دەپ كۇتىلۋدە. اتقارىلاتىن جۇمىستاردىڭ ناتيجەسىندە اۋىل شارۋاشىلىعى ءونىمىنىڭ كولەمى 595،3 ملرد. تەڭگەگە، ءوسىم 3،9 پايىزعا جەتەتىن بولادى، – دەدى ج.تۇيمەبايەۆ.



بۇدان باسقا اكىم وبلىستا «ءسۇت كلاستەرىن» جانە كووپەراتيۆتەردى دامىتۋعا ىقپال ەتەتىن ءمودۋلدى بەكەتتەر جاسالىپ، ولاردى كاسىپكەرلەرگە قوسىمشا كەپىلسىز جانە الدىن-الا تولەمسىز ليزينگكە بەرەتىن باعدارلاما جاسالىنعانىن اتاپ ءوتتى. سونىمەن بىرگە اۋىل-ايماقتارداعى تۇرعىنداردى جاپپاي كاسىپكەرلىككە تارتىپ، وتباسىلىق بيزنەستى دامىتۋ ءۇشىن ءسۇت ونىمدەرىن شىعاراتىن، جەمىس-جيدەكتەردى كەپتىرەتىن، مال سويۋعا ارنالعان ءمودۋلدى بەكەتتەر ورنالاستىرۋ جوسپارلانۋدا.



 

وقو اكىمىنىڭ باسپا ءسوز قىزمەتى