وڭتۇستىك قازاقستان وبلىسىندا اعىمداعى جىلى قوسىمشا 24،9 مىڭ شارۋا قوجالىق 102 كووپەراتيۆكە بىرىگەتىن بولادى. ناتيجەسىندە 2،7 مىڭ توننا ەت، 34،2 مىڭ توننا ءسۇت، 6 مىڭ توننا جەمىس، 5 مىڭ توننا كوكونىس دايىندالادى دەپ جوسپارلانۋدا. بۇگىن بۇل تۋرالى وقو وڭىرلىك كوممۋنيكاسيالار قىزمەتىندە وتكەن بريفينگتە وبلىستىق اۋىل شارۋاشىلىعى باسقارماسىنىڭ باسشىسى سەرىك تۇربەكوۆ ءمالىم ەتتى.   

سونىمەن قاتار، 3173 بىرلىك شاعىن مال بورداقىلاۋ الاڭى، 731 بىرلىك جانۇيالىق ءسۇت فەرما، 15 بىرلىك شاعىن قۇس فەرماسى جانە  7 بىرلىك بالىق شارۋاشىلىقتارى اشىلادى دەپ كۇتىلۋدە.

باسقارما باسشىسىنىڭ ايتۋىنشا، نەگىزگى كاپيتالعا باعىتتالعان ينۆەستيسيا  - 197 پايىزعا، ال تاماق ونىمدەرىنە تارتىلعان ينۆەستيسيا 60 پايىزعا جەتكىزىلمەك.

«باعدارلاماعا سايكەس اعىمداعى جىلى 54 ملرد تەڭگەنى قۇرايتىن 49 ينۆەستيسيالىق جوبا قارجىلاندىرىلادى. ازىق-تۇلىك ونىمدەرىنىڭ ەكسپورتىنىڭ كولەمى - 350 ملن. اقش دوللارىن قۇرايتىن بولادى. سونداي-اق، «دامۋ» باعدارلاماسى بويىنشا اۋىل شارۋاشىلىعى داقىلدارى 15 مىڭ گەكتارعا ارتىپ، جالپى 833 مىڭ گەكتارعا جەتەتىن بولادى»، - دەدى سەرىك وردابەك ۇلى.

بۇدان بولەك، ينتەنسيۆتى باۋلار - 800 گەكتارعا، ءجۇزىم - 736 گەكتارعا، جاڭعاق شارۋاشىلىعى قوسىمشا 1000 گەكتار جەرگە وتىرعىزۋ جوسپارلانۋدا.

اعىمداعى جىلى جىلىجاي كولەمى 200 گەكتارعا ارتىپ، جالپى كولەمى 1500 گەكتارعا جۋىق اۋماقتى قامتيتىن بولادى. ال 13،8 مىڭ گەكتار سۋارمالى جەرلەر جاڭادان اينالىمعا قوسىلادى. تامشىلاتىپ سۋعارۋ ءادىسى 7،2 مىڭ گەكتارعا ەنگىزىلىپ، ونىڭ جالپى كولەمى 65،7 مىڭ گەكتارعا جەتپەك.

 

وقو اكىمىنىڭ باسپا ءسوز قىزمەتى