وڭتۇستىك كورەيادا پرەزيدەنت يۋن سوك ءولدىڭ كومەكشىلەرى جاپپاي وتستاۆكاعا كەتتى، دەپ حابارلايدى Dalanews.kz.

Yonhap News مالىمەتىنشە، وتستاۆكاعا كەتكەندەر قاتارىندا پرەزيدەنت اكىمشىلىگىنىڭ باسشىسى چون دجين سوك، ۇلتتىق قاۋىپسىزدىك جونىندەگى كەڭەسشى سين ۆون سيك، ساياسات ماسەلەلەرى جونىندەگى اكىمشىلىك باسشىسى سون تە يۋن جانە تاعى جەتى اعا كومەكشى بار.

بۇل يۋن سوك ءولدىڭ اسكەري توتەنشە جاعدايعا بايلانىستى شەشىمىنەن كەيىن قابىلداندى. پرەزيدەنت ول كەزدە وپپوزيسيانى “مەملەكەتكە قارسى كۇشتەر” دەپ ايىپتاپ، ولاردى يمپيچمەنت ۇسىنىستارى مەن قىسقارتىلعان بيۋدجەت ارقىلى ەل قىزمەتىن توقتاتۋعا تىرىسۋدا دەپ سىناعان ەدى.

ايتا كەتەيىك، وڭتۇستىك كورەيا پرەزيدەنتى يۋن سوك ءول 3 جەلتوقسان كۇنى كەشكە ەلدە توتەنشە جاعداي جاريالاعان بولاتىن. 

مەملەكەت باسشىسىنىڭ سوزىنشە، بۇل شەشىم ەلدىڭ كونستيتۋسيالىق قۇرىلىمىن قورعاۋ ءۇشىن ماڭىزدى.

“اسكەري جاعداي سولتۇستىك كورەيانى جاقتايتىن كۇشتەردى جويۋعا جانە كونستيتۋسيالىق قۇرىلىستى قورعاۋعا ىقپال ەتەدى”، – دەدى پرەزيدەنت.

يۋن سوك ءولدىڭ سوزىنشە، وپپوزيسيا مەملەكەتتىك قايراتكەرلەرگە يمپيچمەنت جاريالاۋعا تىرىسىپ جاتىر.

“بۇل – ەركىن كورەيا رەسپۋبليكاسىنىڭ كونستيتۋسيالىق قۇرىلىسىن بۇزاتىن جانە كونستيتۋسيا مەن زاڭدارمەن بەكىتىلگەن زاڭدى مەملەكەتتىك ينستيتۋتتاردى جويىپ، ازاماتتىق سوعىستى تۋدىرۋعا تىرىساتىن ايقىن مەملەكەتكە قارسى ارەكەت”، – دەدى يۋن سوك ءول.

وسىعان بايلانىستى كورەياداعى قازاقستان ەلشىلىگى قازاقستاندىقتارعا ۇندەۋ جاسادى.

كورەيا رەسپۋبليكاسى پرەزيدەنتى يۋن سوك ەلدىڭ اسكەري جاعداي ەنگىزۋىنە بايلانىستى كورەيا رەسپۋبليكاسىندا جۇرگەن قازاقستان رەسپۋبليكاسىنىڭ ازاماتتارىن سابىرلىق ساقتاپ، جەرگىلىكتى بيلىكتىڭ ۇسىنىستارىن ورىنداۋعا جانە كوپشىلىك ءىس-شارالاردان اۋلاق بولۋعا شاقىرامىز. 

قازاقستان رەسپۋبليكاسىنىڭ ازاماتتارى ءۇشىن توتەنشە جاعداي تۋىنداعان جاعدايدا، جەدەل بايلانىس ءۇشىن +8210-6572-9311تەلەفونى ارقىلى ەلشىلىككە حابارلاسۋلارىڭىزدى سۇرايمىز!، - دەلىنگەن ەلشىلىك تاراتقان حابارلامادا.