وڭتۇستىك كورەيا پرەزيدەنتى يۋن سوك ءول ەلدە جاريالانعان اسكەري توتەنشە جاعداي الىنىپ تاستالاتىنىن مالىمدەدى، دەپ حابارلايدى Dalanews.kz.

مەملەكەت باسشىسى توتەنشە جاعدايدى قامتاماسىز ەتۋ ءۇشىن جۇمىلدىرىلعان اسكەردىڭ كەرى شاقىرىلاتىنىن اتاپ ءوتتى.

“مينيسترلەر كابينەتىنىڭ وتىرىسى ارقىلى ۇلتتىق قۇرىلتاي تالاپتارىن ەسكەرە وتىرىپ، اسكەري جاعداي رەجيمىن توقتاتامىن. ءبىز مينيسترلەر كابينەتىنىڭ وتىرىسىن شۇعىل تۇردە شاقىردىق. ءبىراق تاڭەرتەڭگى ۋاقىت بولعاندىقتان، كۆورۋم جينالعان جوق. سول سەبەپتى كۆورۋم جينالعان ساتتە-اق اسكەري جاعدايدى رەسمي تۇردە توقتاتامىز”، – دەدى ول.

سونىمەن قاتار ول ۇلتتىق قۇرىلتايدى جاۋاپكەرشىلىككە شاقىرىپ، زاڭناما مەن بيۋدجەتتى مانيپۋلياسيالاۋ ارقىلى ەلدىڭ قىزمەتىنە كەدەرگى كەلتىرمەۋدى ءوتىندى.

“مۇنداي ارەكەت مەملەكەتتىڭ جۇمىسىن شەكتەۋگە اكەلەدى”، – دەپ ەسكەرتتى يۋن سوك ءول.

ايتا كەتسەك، يۋن سوك ءول 3 جەلتوقسان كۇنى كەشكە ەلدە اسكەري توتەنشە جاعداي ەنگىزگەن بولاتىن. بۇل سوڭعى 45 جىلدا وڭتۇستىك كورەيا باسشىلىعى تاراپىنان ەنگىزىلگەن العاشقى اسكەري جاعداي بولدى.

كوپ ۇزاماي سەۋلدەگى ۇلتتىق اسسامبلەيا عيماراتىنىڭ الدىندا نارازىلىق بىلدىرۋشىلەر جينالىپ، پوليسيا پارلامەنت عيماراتىنا كىرۋ جولدارىن جاۋىپ تاستادى. قالا كوشەلەرىندە اسكەري تەحنيكا پايدا بولدى.

بىرنەشە ساعاتتان كەيىن 300 دەپۋتاتتىڭ 190-ى پارلامەنتكە كىرىپ، اسكەري توتەنشە جاعدايدى توقتاتۋ ءۇشىن داۋىس بەردى. وپپوزيسيا جەتەكشىسى لي دجە مەن پرەزيدەنتتىڭ شەشىمىن “كونستيتۋسياعا قايشى” دەپ اتاپ، ونى “حالىققا قارسى ارەكەت” دەپ سىنعا الدى.

ال قازاقستاننىڭ كورەياداعى ەلشىلىگى ەلدەگى اسكەري توتەنشە جاعدايعا قاتىستى مالىمدەمە جاساعان بولاتىن.

كورەيا رەسپۋبليكاسى پرەزيدەنتى يۋن سوك ەلدىڭ اسكەري جاعداي ەنگىزۋىنە بايلانىستى كورەيا رەسپۋبليكاسىندا جۇرگەن قازاقستان رەسپۋبليكاسىنىڭ ازاماتتارىن سابىرلىق ساقتاپ، جەرگىلىكتى بيلىكتىڭ ۇسىنىستارىن ورىنداۋعا جانە كوپشىلىك ءىس-شارالاردان اۋلاق بولۋعا شاقىرامىز. 

قازاقستان رەسپۋبليكاسىنىڭ ازاماتتارى ءۇشىن توتەنشە جاعداي تۋىنداعان جاعدايدا، جەدەل بايلانىس ءۇشىن +8210-6572-9311تەلەفونى ارقىلى ەلشىلىككە حابارلاسۋلارىڭىزدى سۇرايمىز!، - دەلىنگەن ەلشىلىك تاراتقان حابارلامادا.