كەيىنگى بىرنەشە كۇننەن بەرى وڭتۇستىك كورەيادا جاعداي شيەلەنىسىپ تۇر. ساياسي ارەنادا ۇلكەن وزگەرىستەر بولۋى دا مۇمكىن، - دەپ حابارلايدى Dalanews.kz.

"حابار 24" تەلەارناسى مالىمەتىنشە، وڭتۇستىك كورەيا پارلامەنتىندە پرەزيدەنتكە يمپيچمەنت جاريالاۋ تۋرالى زاڭعا قاتىستى داۋىس بەرۋ 7 جەلتوقسانعا استانا ۋاقىتىمەن 15:00-گە بەلگىلەندى.

يمپيچمەنت جاريالاۋ ءۇشىن دەپۋتاتتاردىڭ ۇشتەن ەكىسىنىڭ داۋىسى قاجەت. دەمەك 300 پارلامەنتارييدىڭ كەمى 200ء-ى قولداۋى ءتيىس. ولار ماقۇلداسا، يۋن سوك ءولدىڭ وكىلەتتىگى بىردەن توقتاتىلىپ، ونىڭ مىندەتىن پرەمەر-مينيستر اتقارادى.

"سوڭعى شەشىمدى كونستيتۋسيالىق سوت قابىلدايدى. ول يمپيچمەنتتى قولداسا، 60 كۇن ىشىندە جاڭا سايلاۋ وتەتىن بولادى"، - دەپ جازىلعان دەرەكتە.

ايتا كەتەيىك، 3 جەلتوقساندا كەشكە وڭتۇستىك كورەيا پرەزيدەنتى يۋن سوك ەل توتەنشە اسكەري جاعداي جاريالادى.

بۇل شەشىم وپپوزيسيالىق دەموكراتيالىق پارتيا پارلامەنتتە قىسقارتىلعان بيۋدجەت تۋرالى زاڭ جوباسىن قولداپ، مەملەكەتتىك اۋديتور مەن باس پروكۋرورعا يمپيچمەنت جاريالاۋ تۋرالى ءوتىنىش بەرگەننەن كەيىن قابىلداندى. الايدا وڭتۇستىك كورەيانىڭ ۇلتتىق اسسامبلەياسى ەلدە اسكەري جاعداي ەنگىزىلۋىنە قارسى داۋىس بەردى.

داۋىس بەرۋ كەزىندە ۇلتتىق اسسامبلەيا عيماراتىندا اسكەري جاعدايدى جويۋدى تالاپ ەتكەن ازاماتتار اسكەري ادامدارمەن، پوليسيامەن قاقتىعىسىپ قالدى. سەۋل كوشەلەرىندە اسكەري تەحنيكا پايدا بولدى.

كەيىن ەل پرەزيدەنتى توتەنشە اسكەري جاعدايدى الىپ تاستايتىنىن مالىمدەدى. ونىڭ ايتۋىنشا، اسكەري جاعدايداعى اسكەر شىعارىلعان، ال جاقىن ارادا ۇكىمەت وتىرىسى وتەدى.

قازاقستاننىڭ وڭتۇستىك كورەياداعى ەلشىلىگى قازاقستاندىقتارعا ۇندەۋ جاسادى.

«كورەيا رەسپۋبليكاسى پرەزيدەنتى يۋن سوك ەل اسكەري جاعداي ەنگىزۋىنە بايلانىستى كورەيا رەسپۋبليكاسىندا جۇرگەن قازاقستان ازاماتتارىن سابىر ساقتاپ، جەرگىلىكتى بيلىكتىڭ ۇسىنىستارىن ورىنداۋعا جانە كوپشىلىك ءىس-شارالاردان اۋلاق بولۋعا شاقىرامىز»، — دەپ جازىلعان حابارلامادا.

قازاقستان ازاماتتارى توتەنشە جاعداي كەزىندە جەدەل بايلانىس ءۇشىن مىنا نومىرلەرگە حابارلاسا الادى: +8210-6572-9311.