اقش ۋنيۆەرسيتەتتەرى مەن ءبىلىم بەرۋ ورتالىقتارىنداعى "Digital Education in the United States" باعدارلاماسى بويىنشا كۋرس تىڭداۋشىلارىنىڭ توبى ايوۆا شتاتىنىڭ ءبىلىم دەپارتامەنتىنە بارىپ قايتتى. كەزدەسۋ ناتيجەلى ءارى قىزىقتى ءوتتى. دەپارتامەنت وكىلى تيففاني مورگان ءبىلىم بەرۋ جوبالارىن شولۋدا ونلاين-ورتالىقتىڭ جۇمىسىنا باستى نازار اۋداردى.

الەم COVID-19 تۋرالى ءالى بىلمەگەن جانە دۇنيەجۇزىلىك ىندەت بولۋى مۇمكىن دەپ كۇدىكتەنبەگەن كەزدە شتاتتىڭ ءبىلىم دەپارتامەنتى شالعاي اۋدانداردا تۇراتىن ستۋدەنتتەرگە ساباق بەرۋ ءۇشىن تاجىريبەلى تاربيەشىلەردى تارتۋ ماقساتىندا ونلاين كۋرستار ەنگىزدى. بۇل تاجىريبە پاندەميا كەزىندە بارلىق مەكتەپتەر قاشىقتىقتان وقىتۋعا كوشكەن كەزدە وتە پايدالى جانە سۇرانىسقا يە بولدى.

قازىرگى ۋاقىتتا دەپارتامەنت قاشىقتىقتان وقىتۋ ورتالىعى سايتىنىڭ جۇمىسىن قولداپ وتىر، وندا مۇعالىمدەر ساباقتار وتكىزۋ ءۇشىن ديداكتيكالىق ماتەريالدار ازىرلەنىپ، سونداي-اق ساباقتارعا ارنالعان كۋرستىق ماتەريالدار ونلاين فورماتتا ورنالاستىرىلعان. وقۋ ستاندارتى مەملەكەتتىك دەڭگەيدە انىقتالادى. ال كۋرستىق ماتەريالداردى ازىرلەۋدى ساراپشىلار توبى جۇزەگە اسىرادى.

ايوۆا مەملەكەتتىك ۋنيۆەرسيتەتى مۇعالىمدەر مەن مەكتەپ اكىمشىلىگىن وقىتۋمەن اينالىسادى. مۇندا ينكليۋزيۆتى ءبىلىم بەرۋگە كوپ كوڭىل بولىنەدى. مىسالى، ۇيدە وقيتىن وقۋشىلارعا ولاردىڭ سىنىپتاعى وكىلى رەتىندە روبوتتى ۇسىنىلادى. سونداي-اق، ۋنيۆەرسيتەت وقىتۋشىلارى قوناقتارمەن قاشىقتىقتان وقىتۋ كۋرستارىنىڭ باعدارلامالارىن جاساۋ تاجىريبەسىمەن ءبولىستى.

نۇرزات رايمقۇلوۆا