جۋرناليست باقتيار تايجان وليمپيادا ويىندارىندا باعى جانباي قالعان ابيبا ءابۋجاقىنوۆانىڭ ءۇيى يپوتەكادا ەكەنىن ايتتى، - دەپ حابارلايدى Dalanews.kz.
ونىڭ سوزىنشە، ابيبا - وزبەكستاننىڭ تۋماسى، ءسۇتى قازاق. وزبەكستان قۇراماسىندا ءبىرىنشى بولعان.
«الا توپىلى اعايىن جەمە-جەمگە كەلگەندە جاۋاپتى جارىستارعا ءابيبانى ەمەس، ونىڭ كولەڭكەسىندە جۇرگەن وزبەك قىزىن تاڭدايدى. ول ءۇشىن وزبەك اعايىنداردى كىنالاۋعا بولماس. «قارىنا تارتاعاننىڭ قارى سىپسىپ» دەگەن بار. رەتى كەلسە، ءبىز دە وسىنداي تاڭداۋدا قازاعىمىزعا بۇرىپ تۇرامىز. ءابيبا مەن بىرگە تاعى ءبىر قازاق قىزى ەسميگۇل كۇيۋروۆا دا تاريحي وتانىنا ورالدى»، - دەدى باقتيار تايجان.
وزبەكستاننان ەلگە كەلگەن تانىمال سپورتشىلار، قازاق اتىن اسپانداتقان سپورتشىلار از ەمەس. دەگەنمەن ابيبا ءابۋجاقىنوۆانىڭ ءجونى بولەك. بۇگىندە ءابيبا ءابۋجاقىنوۆا - قىزدار قۇراماسىنىڭ كوشباسشىسى.
«بارعان جاۋاپتى جارىستارىنان ولجاسىز ورالمايدى. الەمدىك رەيتينگتە 3ء-ى ورىندا. مۇنداي ورىنعا قازاق دزيۋدوشى قىزدارىنان ازىرگە ەشكىم جەتكەن جوق. پاريجدە فينالدا-اق كۇرەسەتىن الەۋەتى بار ەدى. ءسال ساتتىلىك جەتىسپەدى. قولا مەدالعا جاراقاتىمەن شىقتى. قارسىلاسى، ون سەگىز جاستاعى قىز شۆەسيالىق تارا بابۋلفات ءبارىن ءبىلدى. سپورتشىعا قۇرمەتتەن ادا قىز جاراقات العان اياعىن تەۋىپ تاستاعانىن كورىپ وتىردىق. جەڭىلگەنىنە قورلانعان ءابيبا جىلادى. جىلاپ وتىرىپ ۇمىتتەرىن اقتاي الماعان ءۇشىن قازاق حالقىنان كەشىرىم سۇرادى. مىنا جاقتا وتىرىپ التىن قىزدىڭ جۇرەكجاردى ءسوزى ءۇشىن ءوزىمىز دە كوزىمىزدى شىلاپ الدىق»، - دەپ جازدى جۋرناليست.
چەمپيون اتانعان ەلدوس سمەتوۆكە ءمارت ازاماتتار ءتۇرلى سىي جاساپ جاتىر. وسى ورايدا جۋرناليست ءابيباعا دا سىي جاساۋعا شاقىردى.
«ەل مەرەيىن تاسىتقان ەلدوس باستاعان ەرلەرگە التىننان ساراي سالدىرىپ بەرسەڭ دە ازدىق ەتپەيدى. سونىڭ ءبىرى - ءابيبا. ءبىر سۇحباتىندا اتىراۋداعى ءۇيى يپوتەكادا ەكەنىن ايتىپ قالدى. قاسىنا ەسميگۇلدى العان ەكەن. «پاريج وليمپياداسىنىڭ التىنى السام ءۇي جانە ءايبات ماشينا الام» دەپ كۇلىپ ارمانىن دا ايتىپ قالدى. جاس قوي، جاراسادى.
ءابيبانىڭ تاريحي جەڭىستەرى: 2021 جىلى بىشكەكتە وتكەن ازيا چەمپيوناتىنىڭ فينالىندا قىتايلىق سپورتشى لي ياناننان جەڭىلىپ، كۇمىس مەدال الدى. 2022 جىلى نۇر-سۇلتان قالاسىندا وتكەن قۇرلىقتىق چەمپيوناتتا ءابيبا تاعى دا كۇمىستى جەڭىپ الدى، بۇل جولى فينالدا جاپوندىق ۆاكانە كوگاعا جول بەردى. تاشكەنتتە وتكەن 2022 جىلعى الەم چەمپيوناتىندا قولا مەدال ۇتتى. 2023 جىلى پورتۋگالياداعى گران-پري سەرياسىنداعى تۋرنيردە جەڭىمپاز اتاندى. ول دزيۋدودان وسىنداي بەدەلدى تۋرنيردە جەڭىسكە جەتكەن العاشقى قازاقستاندىق بولدى. ورىسشا سۇراق قويعان جۋرناليستكە قازاقشا سۇحبات بەرگەن ءابيبا - كەشەگى باتىر ءاليا، مانشۇك، حيۋاز اپالارىنىڭ جۇرناعى. جەڭىسكە جەتسە ءماز بولىپ، كيمونوسىنداعى قازاق ەلتاڭباسىن كورسەتىپ، قولىمنان جۇرەكتى بەينەلەيتىن سۇراپىل قىز دا بار قۇرمەتكە لايىق. ەلدوسقا 100 قىلقۇيرىق اتاعان ءمارت قازاقتار قازاقتا كوپ. دوپتى قيسىق تەبەتىندەردى ءوزى سايىپقىران ەلدوستان كوپ اقشا تابادى. جاندى داۋىسپەن ءان ايتا المايتىن فونوگرامشيك، انەبىر اعامىز ايتىپ جۇرگەندەي شەگىرتكەلەرگە دە ءۇيىپ توگىپ اقشا بەرەتىندەر وسى جولى ءبىر قايرات كورسەتۋ كەرەك. ءابيبا جاراقات السا دا «بەلىم اۋىردى»، «تىزەم اۋىردى» دەپ جەمە-جەمگە كەلگەندە وليمپيادا ويىندارىنان باس تارتقان اناۋ كەلەمسەكتەردەي، ات باسىنداي التىن بەرىپ ارداقتاپ جۇرگەن وتانسىزداردان بارلىق جاعىنان ارتىق. اتىمتاي جومارتتار قايداسىڭدار؟!» - دەدى ول.
ايتا كەتەيىك، ابيبا ءابۋجاقىنوۆا 48 كەلىگە دەيىنگى سالماقتا پاريج وليمپياداسىنىڭ قولا جۇلدەسىنە قول جەتكىزە المادى. وتانداسىمىز ءۇشىنشى ورىن ءۇشىن وتكەن بەلدەسۋدە شۆەد قىزى تارا بابۋلفازعا جول بەردى.
بۇعان دەيىن پارلامەنتى ءماجىلىسىنىڭ دەپۋتاتى، رەسپۋبليكا پارتياسىنىڭ ءتوراعاسى ايداربەك حوجانازاروۆ تا وليمپيادادا جەڭىلىس تاپقان ابيبا ءابۋجاقىنوۆاعا سىياقى بەرەتىنىن ايتتى.
