سولتۇستىك قازاقستان وبلىسىنا جۇمىس ساپارى اياسىندا ۇكىمەت باسشىسى ولجاس بەكتەنوۆ ونىمدەرى اۋىل شارۋاشىلىعى، مۇناي-گاز، تەمىرجول سالالارىندا كەڭىنەن قولدانىلاتىن ءبىرقاتار ءىرى ونەركاسىپتىك كاسىپورىنداردىڭ جۇمىسىمەن تانىستى، - دەپ حابارلايدى Dalanews.kz.
ولجاس بەكتەنوۆ سولتۇستىك قازاقستان وبلىسىنىڭ ونەركاسىپتىك الەۋەتىمەن تانىسۋدى ءوڭىردىڭ بايىرعى كاسىپورىندارىنىڭ ءبىرى، عاسىرلىق تاريحى بار س.م. كيروۆ اتىنداعى زاۋىتتى ارالاۋدان باستادى.
وتاندىق ماشينا جاساۋ سالاسىنداعى كوشباسشىلاردىڭ ءبىرى بولىپ تابىلاتىن زاۋىتتا ەلەكتروندى جابدىقتاردى ازىرلەۋ مەن ءوندىرۋدىڭ تولىق سيكلى قامتىلعان. وسى جىلدىڭ ەكى ايىندا ءوندىرىس كولەمى 9،5%-عا ءوسىپ، 193،7 ملن تەڭگەنى قۇرادى. زاۋىتتا 487 ادام جۇمىس ىستەيدى. بۇدان باسقا، قازاقستاندىق كاسىپورىندا شىعارىلاتىن Lenovo سەرۆەرلەرىن قۇراستىرۋعا يندۋستريالىق سەرتيفيكات الىندى. تاعى ءبىر سۇرانىسقا يە ءونىم – ەلەكتروندى كومپونەنتتەردى ورناتۋعا ارنالعان 5+ دالدىك كلاسىنداعى 16 قاباتتى باسپا پلاتاسى.
پرەمەر-مينيستر قورعانىس جانە ازاماتتىق ماقساتتارعا ارنالعان جوعارى تەحنولوگيالىق ونىمدەردىڭ اركەلكى تۇرلەرىن دايىنداۋ ۇدەرىسىمەن ەگجەي-تەگجەيلى تانىستى. سونىمەن قاتار جەلىنى كەڭەيتۋ بويىنشا الداعى جوسپارلار تۋرالى حاباردار ەتىلدى.
«ءبىز جاڭا وندىرىستەردى يگەرىپ جاتىرمىز. اتاپ ايتقاندا، ەلەكتروموبيلدەرگە ارنالعان قۋاتتاعىشتاردى شىعارۋدى جوسپارلاپ وتىرمىز. تاعى ءبىر تىڭ جوبا – ارناۋلى مەكەمەلەردە ورناتىلعان انتيۆاندالدى تەلەفوندار. كومپيۋتەرلىك تەحنولوگيا نارىعىندا باسەكەلەسۋ قيىن بولعانىمەن ءبىز بارىنشا تىرىسىپ كەلەمىز. وتكەن جىلى 4 مىڭعا جۋىق كومپيۋتەر ساتىلدى»، — دەدى پرەمەر-مينيسترگە س.م. كيروۆ اتىنداعى زاۋىتتىڭ باس ديرەكتورى الماز نۇرماعامبەتوۆ. ول سونداي-اق وندىرىستىك قۋاتتاردى ودان ءارى ارتتىرۋ جوسپارلارى تۋرالى حابارلادى.
ولجاس بەكتەنوۆ پەتروپاۆل اۋىر ماشينا جاساۋ زاۋىتىنىڭ تەحنولوگيالىق جاڭعىرتۋ ناتيجەسىمەن دە تانىستى. مۇندا مۇناي-گاز، ەنەرگەتيكا جانە تەمىرجول سالالارىندا قولدانىلاتىن ونىمدەردىڭ كەڭ جەلىسى شىعارىلادى. بۇدان بولەك، زاۋىت مەملەكەتتىك قورعانىس تاپسىرىستارىن ورىندايدى.
«مەملەكەت باسشىسى قازاقستان حالقىنا جولداۋىندا قورعانىس-ونەركاسىپ كەشەنىن جان-جاقتى نىعايتۋ ەلدىڭ ۇلتتىق قاۋىپسىزدىگىن قامتاماسىز ەتۋدە شەشۋشى ءرول اتقاراتىنىن اتاپ ءوتتى. لوكاليزاسيالاۋ دەڭگەيى جوعارى اسكەري ماقساتتاعى ونىمدەردى ءوندىرۋ سيكلىن قۇرۋ يمپورتقا تاۋەلدىلىكتى ازايتۋعا مۇمكىندىك بەرەدى. سونىمەن قاتار كاسىپورىننىڭ مۇمكىندىكتەرىن تەمىرجول جانە مۇناي-گاز سالاسىنداعى قاجەتتىلىكتەردى قامتۋ ءۇشىن پايدالانۋ كەرەك»، — دەپ اتاپ ءوتتى ولجاس بەكتەنوۆ. ۇكىمەت وتاندىق زاۋىتتاردىڭ ونىمدەرىنىڭ باسەكەگە قابىلەتتىلىگىن ارتتىرۋعا باعىتتالعان قولداۋ شارالارىن قابىلداۋدا.
كەلەسى نىسان مۇناي ونەركاسىبىنە ارنالعان سورعىش شتانگالار شىعاراتىن «مۇنايماش» اق كاسىپورنى بولدى. ىشكى نارىقتاعى ۇلەسى 90% بولسا، لوكاليزاسيا دەڭگەيى 65-تەن 75% دەيىن قۇرايدى. ۇكىمەت باسشىسى ءوندىرىس قارقىنىن ۇلعايتىپ، تەرەڭ ۇڭعىمالار سورعىلارىنىڭ يمپورتىنان تولىق باس تارتۋ ءۇشىن مۇناي-گاز سالاسىنداعى ءىرى كاسىپورىندارمەن ءوزارا ءىس-قيمىلدى نىعايتۋ جولدارىن قاراستىرۋ كەرەكتىگىن اتاپ ءوتتى. بۇگىندە ۇكىمەت پەن بيزنەستىڭ الدىندا وتاندىق زاۋىتتاردا وندىرىلەتىن ءونىم نومەنكلاتۋراسىن كەڭەيتۋ ارقىلى ەلىشىلىك قۇندىلىقتاردىڭ ۇلەسىن جىل سايىن ۇلعايتۋ بويىنشا ورتاق مىندەت تۇرعانى باسا ايتىلدى.
پوليپروپيلەن ىدىس شىعاراتىن ءىرى كاسىپورىنداردىڭ ءبىرى «SMBGROUP Family» جشس-ىندا ولجاس بەكتەنوۆ ەلىمىزدىڭ جەڭىل ونەركاسىبىنىڭ الەۋەتىن ارتتىرىپ، سىرتقى نارىققا شىعۋ قاجەت ەكەنىنە توقتالدى. قازاقستاندىق ءوندىرۋشىنىڭ كونتەينەرلەرى ءارتۇرلى جۇك تۇرلەرىن تاسىمالداۋعا، ساقتاۋعا، تاسىمالداۋعا ارنالعان، سونىمەن قاتار ونەركاسىپ پەن لوگيستيكادا كەڭىنەن قولدانىلادى. بيىلعى جىلدىڭ ەكى ايىندا عانا جالپى قۇنى 580 ملن تەڭگەنىڭ ءونىمى ءوندىرىلىپ، ءوندىرىس كولەمى 13،8%-عا ءوستى.
بۇدان بولەك، پرەمەر-مينيستر «سولتۇستىك فانەر كومبيناتى» ج ش س جۇمىسىمەن تانىستى. كاسىپورىن قازاقستاندىق نارىقتىڭ لاميناتتالعان فانەرگە دەگەن قاجەتتىلىگىنىڭ 22%-ىن قامتاماسىز ەتەدى. ول ءىرى قالالارداعى قۇرىلىس الاڭدارىندا قولدانىلادى جانە شەتەلگە دە ەكسپورتتالادى. بىلتىر ءوندىرىس كولەمى 4،3 ملرد تەڭگەنى قۇراپ، 2022 جىلدىڭ قورىتىندىسىمەن سالىستىرعاندا 32،6%-عا ءوستى.
«ريمقازاگرو» ج ش س قاعاز ونىمدەرى زاۋىتىندا ولجاس بەكتەنوۆكە ماكۋلاتۋرانى قايتا وڭدەۋدىڭ بەلگىلەنگەن سيكلى كورسەتىلىپ، كلاستەردى ودان ءارى دامىتۋ جوسپارلارى تۋرالى باياندالدى. فابريكا 30-دان استام ءونىم ءتۇرىن شىعارادى، ولار ەلىمىزدىڭ بارلىق وڭىرلەرىنە جەتكىزىلىپ، سونداي-اق رەسەيگە دە ەكسپورتتالادى. كاسىپورىن الدىنا حالىق تۇتىناتىن تاۋارلاردىڭ ەكسپورتىن ۇلعايتىپ، ىشكى نارىقتاعى ۇلەستى ءارى قاراي ۇلعايتۋ مىندەتى جۇكتەلدى. مەملەكەت پەن وتاندىق بيزنەستىڭ بەلسەندى ىنتىماقتاستىعىنىڭ جاڭا تۇرلەرى قاراستىرىلاتىن بولادى.
نىسانداردى ارالاپ شىققان پرەمەر-مينيستر مەملەكەت وڭدەۋ ونەركاسىبىن جانە حالىق تۇتىناتىن تاۋارلاردىڭ كەڭ نومەنكلاتۋراسىن دامىتۋعا ەرەكشە نازار اۋدارىپ وتىرعانىن اتاپ ءوتتى. بۇل رەتتە وتاندىق ءونىمنىڭ ساپاسىنا ەرەكشە ءمان بەرۋ قاجەت. ول ءۇشىن بيزنەس ۇزدىكسىز دامىپ، جاڭا وندىرىستەردى دە يگەرۋگە ءتيىس. ءوز كەزەگىندە ۇكىمەت تاراپىنان قاجەتتى قولداۋ كورسەتىلەتىن بولادى.
