قازاقستان پرەمەر-مينيسترى، سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنىنىڭ سالدارىن جويۋ جونىندەگى رەسپۋبليكالىق شتابتىڭ جەتەكشىسى ولجاس بەكتەنوۆ سولتۇستىك قازاقستان وبلىسىندا ەسىل وزەنىنىڭ جايىلماسىن تىكۇشاقپەن اينالىپ ءوتىپ، سەرگەيەۆ سۋ قويماسىنداعى جاعدايدى تەكسەردى. سونداي-اق ەسىل وزەنى ارناسىنان اسقان جاعدايدا سۋ باسۋدىڭ الدىن الۋ جانە زالالدى ازايتۋ ءۇشىن پەتروپاۆل قالاسىنىڭ ماڭىنداعى بوگەتتەردى نىعايتۋ بويىنشا جۇمىستار تەكسەرىلەتىن بولادى.
ۇكىمەت باسشىسىنا سەرگەيەۆ سۋ تورابى قازىرگى ۋاقىتتا قۋاتىنىڭ شەگىندە جۇمىس ىستەپ جاتقانى تۋرالى باياندالدى.
8 ساۋىردەگى جاعداي بويىنشا 6017 م3/س دەڭگەيىندە سۋ كەلۋى تىركەلدى، ونى جىبەرۋ 4720 م3/س دەڭگەيىندە جۇزەگە اسىرىلىپ جاتىر.
سونداي-اق سەرگەيەۆ سۋ قويماسى پايدالانۋعا بەرىلگەن 1969 جىلدان باستاپ سۋدىڭ ماكسيمالدى شىعىنى 3600 م3/س دەڭگەيىندە بولعان.
وسىلايشا، قازىرگى سۋ قويماسىنىڭ تولۋى سوڭعى 50 جىلدا العاش رەت ورىن الىپ وتىر جانە الدىڭعى ماكسيمالدى كورسەتكىشتەردەن 2 ەسە دەرلىك اسادى.
وسىعان بايلانىستى سۋ تاسقىنىنا قارسى ءىس-شارالاردى تولىققاندى جۇرگىزۋ ءارى عيماراتتاردىڭ قيراۋىنا جول بەرمەۋ ءۇشىن ولجاس بەكتەنوۆتىڭ تاپسىرماسىمەن ق ر قارۋلى كۇشتەرى قۇرلىق اسكەرلەرى بريگادالارىنىڭ 300 اسكەري قىزمەتكەرى استانا قالاسىنان سولتۇستىك قازاقستان وبلىسىنا اتتاندى.
ق ر ۇلتتىق ۇلان اكادەمياسىنان 400 كۋرسانت جانە ق ر ۇلتتىق ۇلانىنىڭ «ورتالىق» وڭىرلىك قولباسشىلىعى اسكەري ءبولىمىنىڭ 300-دەن استام قىزمەتكەرى تارتىلدى.
بۇل رەتتە وڭىرگە كومەك كورسەتۋ ءۇشىن تارتىلاتىن اسكەريلەر سانىن ودان ءارى ۇلعايتۋ جونىندە كوماندا بەرىلدى. ايتا كەتۋ كەرەك، قازىرگى ۋاقىتتا قورعانىس ءمينيسترى رۋسلان جاقسىلىقوۆ – قوستاناي وبلىسىندا.
«پرەزيدەنت سۋ تاسقىنىمەن كۇرەسكە بارلىق كۇشتى جۇمىلدىرۋ مىندەتىن قويدى. ءبىز سولتۇستىك قازاقستان وبلىسىنىڭ وزىنە قورعانىس مينيسترلىگى مەن ۇلتتىق ۇلاننىڭ مىڭعا جۋىق قىزمەتكەرىن جۇمىلدىردىق. مىندەتىمىز – ەسىل وزەنى ارناسىنان اسىپ كەتكەن كەزدە ۇلكەن زارداپتاردىڭ الدىن الۋ. مۇنداي اۋقىمداعى سۋ كولەمى سەرگەيەۆ سۋ قويماسىنىڭ بۇكىل تاريحىندا العاش رەت ورىن الۋدا»، — دەدى ولجاس بەكتەنوۆ.
بۇعان دەيىن ۇكىمەت باسشىسى ولجاس بەكتەنوۆتىڭ تاپسىرماسى بويىنشا ءبىرىنشى ۆيسە-پرەمەر رومان سكليار سقو-نىڭ قۇرىلىس جانە جول-قۇرىلىس كومپانيالارىنىڭ باسشىلارىن سۋ تاسقىنىنا قارسى ءىس-شارالاردى وتكىزۋگە كومەك كورسەتۋگە شاقىردى.
