بۇگىن، 2025 جىلى 8 قاڭتاردا ۇكىمەت وتىرىسىندا پرەمەر-مينيستر ولجاس بەكتەنوۆ جۇمىسشى كادرلار ءۇشىن يپوتەكالىق جانە جالعا بەرىلەتىن تۇرعىن ءۇيدىڭ جەڭىلدەتىلگەن باعدارلامالارىن ىسكە قوسۋ ماسەلەلەرىن پىسىقتاۋدى تاپسىردى، دەپ جازادى Dalanews.kz.
"جۇمىسشى كادرلاردى الەۋمەتتىك قولداۋدىڭ ۇزدىك كورپوراتيۆتىك تاجىريبەسىن كەڭىنەن تاراتىپ، جاڭا ىنتالاندىرۋ شارالارىن ەنگىزۋ كەرەك. ونەركاسىپ، ەنەرگەتيكا، كولىك، اۋىل شارۋاشىلىعى، سۋ رەسۋرستارى مينيسترلىكتەرىنە كاسىپورىندارمەن، اكىمدىكتەرمەن جانە وتباسى بانكىمەن بىرلەسىپ، جۇمىسشى كادرلار ءۇشىن يپوتەكالىق جانە جالعا بەرىلەتىن تۇرعىن ءۇيدىڭ جەڭىلدەتىلگەن باعدارلامالارىن ىسكە قوسۋ ماسەلەلەرىن پىسىقتاۋدى تاپسىرامىن"، — دەدى ۇكىمەت وتىرىسىندا ولجاس بەكتەنوۆ.
ماسەلەنى قاراۋ قورىتىندىسى بويىنشا پرەمەر-مينيستر مۇددەلى مەملەكەتتىك ورگاندار، اكىمدىكتەر، ۇلتتىق كومپانيالار مەن كاسىپورىندارعا پرەزيدەنت قاسىم-جومارت توقايەۆ جاريالاعان جۇمىسشى ماماندىقتارى جىلىن وتكىزۋ جونىندەگى سالالىق جانە وڭىرلىك جوسپارلاردىڭ ساپالى ىسكە اسىرىلۋىن قامتاماسىز ەتۋدى تاپسىردى.
بارلىق ءىس-شارالار جۇيەلى، ناتيجەلى جانە ولاردىڭ الەۋمەتتىك-ەكونوميكالىق ۇزاقمەرزىمدى اسەرى بولۋى ءتيىس.
"ۇكىمەت جۇمىسشى ماماندىقتارى جىلىن وتكىزۋ ماسەلەلەرىن ۇنەمى باقىلاۋدا ۇستايدى"، دەپ اتاپ ءوتتى ولجاس بەكتەنوۆ.
سونداي-اق استانا قالاسىنىڭ اكىمدىگىمەن بىرگە قۇزىرەتتەر ورتالىعىن قۇرۋ جوسپارلانىپ وتىر.
پرەمەر-مينيستر بيزنەس، جۇمىس بەرۋشىلەر، ينۆەستورلار تاراپىنان دا ءتيىستى شارالار قابىلدانۋى ءتيىس ەكەنىن، سونداي-اق وسى باعىتتاعى جۇمىستى "سامۇرىق-قازىنا" قورى بەلسەندى جۇرگىزۋى قاجەت ەكەنىن باسا ايتتى.
