پرەمەر-مينيستر ولجاس بەكتەنوۆ اقمولا وبلىسىنا جۇمىس ساپارى اياسىندا پرەزيدەنتتىڭ ەلەكترمەن جابدىقتاۋ جانە جىلۋ كوممۋنيكاسيا جەلىلەرىن جاڭعىرتۋ جانە ولاردىڭ توزۋ دەڭگەيىن تومەندەتۋ جونىندەگى تاپسىرمالارىنىڭ ورىندالۋىن، سونداي-اق كوممۋنالدىق ينفراقۇرىلىم نىساندارىنىڭ جىلۋ بەرۋ ماۋسىمىنا دايىندىق بارىسىن تەكسەردى، - دەپ حابارلايدى Dalanews.kz.
ۇكىمەت باسشىسى ستەپنوگورسك جەو-نىڭ بۇگىنگى جاعدايىمەن تانىستى. 1966 جىلى پايدالانۋعا بەرىلگەن نىسان بۇگىندە قالانىڭ تۇرعىن ءۇي سەكتورى مەن كاسىپورىندارىن، سونداي-اق زاۆودسكوي كەنتىن جىلۋ جانە ەلەكتر ەنەرگياسىمەن قامتاماسىز ەتەدى.
پرەمەر-مينيسترگە اقمولا وبلىسىنىڭ كوممۋنالدىق ينفراقۇرىلىمىنىڭ جىلىتۋ كەزەڭىنە دايىندىعى تۋرالى باياندالدى. بۇگىنگى تاڭدا قازاندىقتاردىڭ دايىندىعى 99%-دى قۇرايدى، ءبىلىم بەرۋ نىساندارى، مەديسينالىق مەكەمەلەر، تۇرعىن ۇيلەر تەكسەرىلدى. بارلىق الەۋمەتتىك ينفراقۇرىلىم جىلىتۋ ماۋسىمىنا تولىعىمەن دايىن. جەو-دا كۇزگى-قىسقى ماۋسىمعا قاجەتتى وتىن قورىن دايىنداۋ كەستەگە سايكەس جۇرگىزىلىپ جاتىر.
بيىل ستەپنوگورسك قالاسىنىڭ جىلۋ جەلىلەرىن جوندەۋگە ۇكىمەت رەزەرۆىنەن 2،7 ملرد تەڭگە ءبولىندى. ۇزىندىعى 11،3 شاقىرىم ۋچاسكەدە قۇرىلىس-مونتاج جۇمىستارى اياقتالدى. سونىمەن قاتار ستەپنوگورسك ەنەرگەتيكا كەشەنىنىڭ مەنشىك يەسى ينفراقۇرىلىم مەن كوممۋنيكاسيا نىساندارىن جاڭعىرتۋعا 7،9 ملرد تەڭگە ءبولدى. 4 تۋربينانى جوندەۋ جۇمىستارى اياقتالدى، قازاندىقتاردى رەكونسترۋكسيالاۋ جالعاسۋدا، جوسپارلانعان 2،6 كم جىلۋ جەلىلەرىنىڭ 1،6 شاقىرىمىنا مونتاجداۋ جۇمىستارى جۇرگىزىلدى.
جۇرگىزىلىپ جاتقان جۇمىستار جەو جابدىقتارىنىڭ توزۋىن 65،6%-دان 61،9%-عا دەيىن، ماگيسترالدى جەلىلەردىڭ توزۋىن قازىرگى 80،7%-دان 70%-عا دەيىن تومەندەتۋگە مۇمكىندىك بەرەدى. الايدا، ءالى دە ءبىرقاتار تۇيتكىلدى ماسەلەلەر بار، دەپ اتاپ ءوتتى ەنەرگەتيكا ءمينيسترى الماسادام ساتقالييەۆ.
«ەنەرگيا كوزدەرىن جاڭارتۋعا قاراجات سالۋ مەن قولعا الىنعان شارالار توزۋدى بىرتىندەپ ازايتادى. دەگەنمەن، تۇتىنۋ كولەمىنىڭ ارتۋىن ەسكەرەك، ىركىلىس بولۋ ءقاۋپى ءالى دە بار. تۇراقتى ساپالى ەنەرگيامەن جانە جىلۋمەن قامتاماسىز ەتۋ ءۇشىن بالامالى كوزدەر قۇرۋ قاجەت. حالىق قاجەتتىلىگىن وتەۋ جانە جاڭا كاسىپورىنداردى ىسكە قوسۋدى قامتاماسىز ەتۋ ماقساتىندا اتوم ەنەرگەتيكاسىن دامىتۋ ءتيىمدى شەشىم بولماق»، - دەپ باياندادى الماسادام ساتقالييەۆ.
قازاقستاندا جۇمىس ىستەپ تۇرعان ستانسالاردىڭ توزۋ دەڭگەيى جوعارى – 70%-عا دەيىن جەتەدى. ەلىمىزدە ەلەكتر ەنەرگياسىن تۇتىنۋ جىل سايىن 3%-عا وسۋدە. ەنەرگەتيكا مينيسترلىگىنىڭ بولجامىنا سايكەس، 2035 جىلعا قاراي قازاقستاندا ەلەكتر ەنەرگياسىن تۇتىنۋ ساعاتىنا 152،4 ملرد كۆت جەتەدى دەپ كۇتىلۋدە. بۇل رەتتە، قولدانىستاعى ەلەكتر ستانسالارى ساعاتىنا تەك 135 ملرد كۆت قامتاماسىز ەتە الادى.
پرەمەر-مينيستر ينفراقۇرىلىمدى ايتارلىقتاي جاڭعىرتۋ قاجەتتىگىن اتاپ ءوتتى.
«پرەزيدەنت ءوز جولداۋىندا تۇرعىن ۇي-كوممۋنالدىق شارۋاشىلىق جۇيەسىن جاڭعىرتۋ بويىنشا جەكە جوبا ازىرلەۋدى تاپسىرعانىن بىلەسىزدەر. بۇل – 2029-2030 جىلدارعا دەيىن جالعاساتىن اۋقىمدى باعدارلاما. مۇندا ماڭىزدى جۇمىس اتقارىلۋى ءتيىس. تاريف، تابيعي مونوپوليالار سۋبەكتىلەرىنىڭ قاراجاتى، بيۋدجەت، قارىز قاراجاتى ەسەبىنەن شامامەن 10 ترلن تەڭگە قارجى تالاپ ەتىلەدى. جۇمىستار كەشەندى تۇردە جۇرگىزىلەتىن بولادى. ءبىز ەلىمىزدە تكش جۇيەسىنىڭ قانداي كۇردەلى جاعدايدا تۇرعانىن تۇسىنەمىز. مەنشىك يەلەرى دە، جەرگىلىكتى بيلىك تە، ۇكىمەت تە بۇل ىسكە اسا جاۋاپكەرشىلىكپەن قاراۋى قاجەت. ۇكىمەتتىڭ باستى مىندەتى – تۇرعىندارعا قولايلى جاعداي جاساۋ. بىزدە جالپى ەل بويىنشا ەلەكتر ەنەرگياسىن تۇتىنۋ شامامەن 17 گۆت قۇرايدى، ال ءبىز تەك 16 گۆت وندىرەمىز. ياعني، ءبىز ەنەرگيا تاپشىلىعى بار ەلمىز، كورشىلەس ەلدەردەن ەلەكتر ەنەرگياسىن ساتىپ الۋعا ءماجبۇرمىز. توزىعى جەتكەن جەلىلەردى قالپىنا كەلتىرىپ قانا قويماي، تۇراقتى ەنەرگەتيكا جۇيەسىن قۇرۋىمىز كەرەك»، - دەپ اتاپ ءوتتى ولجاس بەكتەنوۆ.
حالىق 6 قازاندا وتەتىن رەفەرەندۋمدا قولداۋ بىلدىرسە، قاۋىپسىزدىك دەڭگەيى جوعارى اتوم ەلەكتر ستانساسى سالىنىپ، ەلىمىزدەگى ەنەرگيا تاپشىلىعى ماسەلەسى شەشىلەدى ءارى ەنەرگەتيكالىق قاۋىپسىزدىكتى قامتاماسىز ەتەتىن بولادى.
