بەلگىلى ساياساتتانۋشى ايدوس سارىم شەتەلدەگى سوعىستارعا قاتىسىپ جۇرگەن قازاقستاندىقتار تۋرالى پىكىر ءبىلدىردى. ونىڭ ايتۋىنشا، بۇعان دەيىن سيرياعا 500-گە جۋىق ادام كەتكەن، ال ءقازىر ۋكرايناداعى سوعىسقا قاتىسىپ جۇرگەندەر دە از ەمەس، دەپ حابارلايدى Dalanews.kz.
“قايتارىلعاندارى قايتارىلدى، وتباسىمەن بىرگە كەتكەندەرى دە بار. ءبىراق ءبىزدىڭ ۇلتتىق قاۋىپسىزدىك كوميتەتىنىڭ مۇمكىندىگى شەكتەۋلى. ونىڭ قۇرامىندا بار-جوعى 2-3 مىڭ ادام عانا. ەگەر ولار ەلدەگى قاۋىپسىزدىكتى قامتاماسىز ەتىپ، ەكسترەميزم مەن تەرروريزمنىڭ جولىن بوگەي السا، سونىڭ ءوزى جەتكىلىكتى”، – دەدى سارىم.
ول سوعىسقا كەتكەن ازاماتتار ءوز تاڭداۋىن جاساعانىن جانە بۇل جاعداي باسقالارعا ساباق بولۋى كەرەگىن اتاپ ءوتتى.
“مەن ءوزىم 2-3 ناقتى جاعدايمەن اينالىسىپ جاتىرمىن. بىرنەشە ادام قابىلداۋىما كەلىپ، “بالالارىمىز رەسەي تۇرمەسىندە وتىر” دەپ شاعىمداندى. ءبىز بۇل ماسەلەنى شەشۋ ءۇشىن ەلشىلىكپەن جۇمىس ىستەپ جاتىرمىز. “سول ازاماتتى ەلگە قايتارىڭىزشى، ءبىز ءوزىمىز-اق سوتتاپ، جازاسىن بەرەمىز” دەگەن اڭگىمەنى ءبىز دە ايتىپ جاتىرمىز. سوندىقتان، مەيلى ولار ۋكراينا جاعىندا بولسىن، رەسەي جاعىندا بولسىن – ءبارىبىر. ولار ءوز تاڭداۋىن جاساعاندا، ەلگە قايتپايتىنىن ءبىلىپ كەتتى. ەندى زاڭ الدىندا جاۋاپ بەرۋى كەرەك”، – دەدى ساياساتتانۋشى.
ايتا كەتەيىك، بۇعان دەيىن "ءومىر سۇرگىم كەلەدى" جوباسى رەسەي اسكەرىنىڭ قاتارىندا ۋكرايناداعى سوعىسقا قاتىسىپ جۇرگەن قازاقستاندىقتاردىڭ ءتىزىمىن جاريالاعان ەدى. جوبا مالىمەتىنشە، سوعىسقا 600-دەن استام قازاقستاندىق اتتانعان. تىزىمدە 264 ادامنىڭ ءاتى-جونى كورسەتىلگەن، ولاردىڭ اراسىندا قازاق ازاماتتارى دا بار.
