Belgili saıasattanýshy Aıdos Sarym sheteldegi soǵystarǵa qatysyp júrgen qazaqstandyqtar týraly pikir bildirdi. Onyń aıtýynsha, buǵan deıin Sırıaǵa 500-ge jýyq adam ketken, al qazir Ýkraınadaǵy soǵysqa qatysyp júrgender de az emes, dep habarlaıdy Dalanews.kz.
“Qaıtarylǵandary qaıtaryldy, otbasymen birge ketkenderi de bar. Biraq bizdiń Ulttyq qaýipsizdik komıtetiniń múmkindigi shekteýli. Onyń quramynda bar-joǵy 2-3 myń adam ǵana. Eger olar eldegi qaýipsizdikti qamtamasyz etip, ekstremızm men terorızmniń jolyn bógeı alsa, sonyń ózi jetkilikti”, – dedi Sarym.
Ol soǵysqa ketken azamattar óz tańdaýyn jasaǵanyn jáne bul jaǵdaı basqalarǵa sabaq bolýy keregin atap ótti.
“Men ózim 2-3 naqty jaǵdaımen aınalysyp jatyrmyn. Birneshe adam qabyldaýyma kelip, “balalarymyz Reseı túrmesinde otyr” dep shaǵymdandy. Biz bul máseleni sheshý úshin elshilikpen jumys istep jatyrmyz. “Sol azamatty elge qaıtaryńyzshy, biz ózimiz-aq sottap, jazasyn beremiz” degen áńgimeni biz de aıtyp jatyrmyz. Sondyqtan, meıli olar Ýkraına jaǵynda bolsyn, Reseı jaǵynda bolsyn – báribir. Olar óz tańdaýyn jasaǵanda, elge qaıtpaıtynyn bilip ketti. Endi zań aldynda jaýap berýi kerek”, – dedi saıasattanýshy.
Aıta keteıik, buǵan deıin "Ómir súrgim keledi" jobasy Reseı áskeriniń qatarynda Ýkraınadaǵy soǵysqa qatysyp júrgen qazaqstandyqtardyń tizimin jarıalaǵan edi. Joba málimetinshe, soǵysqa 600-den astam qazaqstandyq attanǵan. Tizimde 264 adamnyń aty-jóni kórsetilgen, olardyń arasynda qazaq azamattary da bar.
