ءنۇرقادىلوۆ بىلاي دەپتى:
— ادامدى سىناعىڭ كەلسە، بيلىك بەر دەۋشى ەدى. سىناقتان وتپەگەن، بولمىسىن بيلىك بۇزعان ادامدار كوپ. بيلىكتى كوتەرە الماعان ولار ادام تانىماستاي وزگەرگەن.
مەن بە؟ بيلىك مەنى بۇزعان ەمەس، ەشقاشان. بۇزا دا المايدى. ءيا، تالاي وقيعانىڭ كۋاگەرى بولدىم. مەملەكەتتىك ماڭىزى بار تالاي شەشىمدەرگە ىقپال ەتكەنىم دە راس. بۇرا تارتقان، قاتەلەسكەن كەزدەرىم بولدى. ەشقاشان بيلىكتىڭ جالىنا جارماسقان ەمەسپىن، ءبىراق.
مەنى بيلىكشىل، كرەسلوشىل، تىم سۇستى، تىم تاكاپپار دەپ سانايتىندار بار. تانىماعاسىن سولاي ويلايدى. سولاي پايىمدايدى.
بۇل ومىردەگى ءبىر اقيقات، قولىڭا بيلىك بەرىلسە دۇرىس پايدالانۋعا تىرىس، يگى ماقساتقا جۇمساۋعا ۇمتىل. ماڭگىلىك ەشتەڭە جوق، ويتكەنى. بيلىك تە ماڭگىلىك ەمەس.
قۇيرىعى كرەسلوعا جابىسىپ تۋعان پەندە جوق، بۇل جالعاندا. كرەسلونىڭ سۋسىمالى ەكەنىن ۇمىتپاعان ءجون.
قولىنا بيلىك تيسە جالعاندى جالپاعىنان باسقىسى كەلەتىندەر كوپ-اق، سوعان قاراماي. قۇددى، قۇدىرەت قونعانداي سەزىنەدى ءوزىن.
الجاسقاننىڭ، اداسقاننىڭ بەلگىسى بۇل. ادامدىقتان اينىعاننىڭ كورىنىسى. ادام دەگەن اتىن جوعالتقان، ادام قالپىنان اجىراپ قالعاندار قانشاما ارامىزدا…
تۇپتەپ كەلگەندە سەنىڭ دە شەگىڭ بار، ءتاڭىر بەلگىلەپ بەرگەن. بۇدان اسىپ قايدا باراسىڭ، ايتشى؟
قولىڭا بەرىلگەن بيلىكتى اسىرا پايدالانساڭ، وسى شەكتەڭ شىققانىڭ. ءتاڭىر بەلگىلەپ بەرگەن سىزىقتان اسقانىڭ. تالقانىڭ تاۋسىلعان كۇنى الدىڭنان شىعادى…
بيلىككە كەلگەن ادام قىزمەتىن قۋ قۇلقىننىڭ قامىنا، جۇرتتىڭ اقشاسىن جەۋگە، جۇلمالاۋعا جۇمساسا ءتۇپتىڭ-تۇبى وڭبايدى. سازايىن الادى. ازابىن تارتادى.
مۇندايلار ايگىلى اياز ءبيدىڭ وسيەتىن ۇمىتقان.
«اياز بي ءالىڭدى ءبىل، قۇمىرسقا جولىڭدى ءبىل».
ومىرىمە ريزامىن. ەشكىمگە وكپەم جوق. قاتەلەسسەم، الدىمەن وزىمە ۇڭىلەم. «دۇرىس ىستەدىم بە، دۇرىس شەشىم قابىلدادىم با؟» دەپ…
الماتىنىڭ اكىمى بولدىم. سۇيكىمسىز جۇمىس ەدى. قىزمەتتەن كەتكەسىن پاتەرسىز قالدىم.
قالا سىرتىنداعى داچىمىزگە بارىپ تۇردىق. ماقپالدىڭ ۇيىنە كوشىپ بارماسىم بەلگىلى ەدى. جاڭا ءۇي سالدىم. بولدى. مەنىڭ شەگىم وسى. بۇدان ارتىقتىڭ كەرەگى جوق . ءۇيىم بار، ءومىرىم بار. وتباسىم بار.
ءوزىمنىڭ قاراپايىم عانا ادام ەكەنىمدى ءتۇسىندىم. قاناعات. كەرەگى وسى ەكەن.
دايىنداعان، دۋمان بىقاي
https://www.youtube.com/watch؟v=7ntOVJlG-y0
