بۇرىنعى جانە قازىرگى الەمدىك ساياساتكەرلەردىڭ قۇپيا قۇجاتتار نەگىزىندە وفشورلىق كومپانيالارى بەلگىلى بولا باستاعاننان كەيىن، ءبىرقاتار ەلدەر قارجىلىق الاياقتىق مۇمكىندىگىنە بايلانىستى زەرتتەۋلەر جاساي باستادى.

تەكسەرۋگە اتاپ ايتقاندا، نيدەرلاندى، اۋستريا، اۋستراليا، ۇلىبريتانيا جانە اقش ەلدەرى كىرىسىپ كەتتى. وعان سەبەپ بولعان پانامالىق Mossack Fonseca دەپ اتالاتىن زاڭگەرلىك فيرمانىڭ 11 ميلليون قۇجاتىنىڭ جاريا بولۋى. فيرمانىڭ زاڭگەرلەرى وزدەرىنىڭ كليەنتتەرىنە سالىقتان قاشىپ، اقشالارىن جاسىرۋعا كومەكتەسكەن.

جاريالانعان ماتەريالدا 12 ەلدىڭ بۇرىنعى جانە قازىرگى باسشىلارى مەن الەمدىك ليدەرلەرمەن بايلانىسى بار 60 ادامنىڭ ءاتى-جونى كورسەتىلگەن. ولاردىڭ ىشىندە يسلانديانىڭ قازىرگى پرەمەر-مينيسترى سيگميۋنديۋر گيۋننلويگسسون بار. ول ينۆەستيسيانى وفشورلى كومپانيا ارقىلى يسلانديا بانكىنە جاسىرىپ كەلگەن. 4 ناۋرىزدا قازىرگى پرەمەردىڭ وتستاۆكاسىن تالاپ ەتكەن پەتيسياعا 16 مىڭ يسلاندىق قول قويعان.

جاريالانعان ماتەريالدىڭ نەگىزگى بولىگى رەسەيگە ارنالعان. اتاپ ايتقاندا، ەل پرەزيدەنتى ۆلاديمير ءپۋتيننىڭ توڭىرەگىندەگى ادامدار "روسسيا" بانكى جانە وفشورلى كومپانيا ارقىلى 2 ميلليارد دوللاردى "ۇرلاعان". كرەمل "پانامالىق قۇجاتتاردى" "ارانداتۋشىلىق" دەپ اتاپ، رەسەيدە جاقىنداپ قالعان سايلاۋدا ۆلاديمير پۋتينگە قارا پيار جاساۋ ماقساتىندا جاسالىنىپ وتىر دەپ مالىمدەدى.