شەرزات بولاتتىڭ اعاسى نۇرقانات عايىپبايەۆتىڭ 2021 جىلى «Newqazaq.kz» اقپاراتتىق اگەنتتىگىنە بەرگەن سۇحباتى تارادى. وندا نۇرقاناتتىڭ ەكى ادامدى قۇتقارىپ قالعانى ايتىلعان، - دەپ حابارلايدى Dalanews.kz.
«سول كۇنى جۇمىستا بولاتىنمىن. ساعات 17-20-دا ديسپەچەر قىزمەتىنەن اپات بولدى دەگەن شاقىرتۋ ءتۇستى. وقيعا بولعان جەردەن ارا قاشىقتىق 7 شاقىرىمداي ەكەن. جالما جان سول باعىتقا بەت الدىق. 7 مينۋتتا وقيعا ورنىنا جەتتىم. حابارلامادا قورشاۋدىڭ سىرتى دەپ تۇسكەن، الايدا سامولەت ۇشۋ-قونۋ جولاعىنا جەتپەي قورشاۋدىڭ ىشىنە قۇلاپتى. اينالىپ كەلۋ ءۇشىن ۋاقىت جوعالتاتىن بولعاندىقتان، قورشاۋدان اسىپ ءتۇسىپ، قولىما بيكسىمدى الا سالا جۇگىردىم. سامولەت جانىپ جاتىر. ءورت سوندىرۋشىلەر مەن اۆياسيالىق دارىگەرلەر دە ارعى جاعىنان كەلە جاتىر ەكەن. جانىپ جاتقان سامولەتكە قاراي جۇگىردىك.
بورتتىڭ جانىندا ءورت ىشىندە ەسسىز جاتقان ەكەۋىن سۇيرەپ الىپ شىعىپ، العاشقى كومەك بەردىك. بىرەۋىن اۆياسيالىق دارىگەرلەر، بىرەۋىنە الگوريتم بويىنشا العاشقى كومەكتى ءوزىم كورسەتتىم. ولاردى ەمحاناعا جەتكىزۋ ءۇشىن قوسىمشا 3 بريگادا شاقىردىم. لەزدە 18ء-شى بريگادا كەلدى. ناۋقاستى ەمحاناعا الىپ كەتتى. نەگىزىندە الەۋجەلىدەگى «باتىر جىگىتتەر» – تەك ناۋقاستى الىپ كەتىپ، ەمحاناعا جەتكىزۋشىلەر. سول جەردە الماتى قالاسىنىڭ جەدەل جاردەم قىزمەتىنىڭ مىندەتىن اتقارۋشى پارحات نادىروۆ جۇمىسقا اۋىسۋ تۋرالى ۇسىنىستى تەك ەكەۋىنە ەمەس، بارىمىزگە ايتتى. ەكەۋى كەلىسىمىن بەردى، مەن ءوز ورتامدى تاڭدادىم»، – دەگەن ەدى نۇرقانات.
نۇرقانات 10-شى بريگادا قايتىس بولعانداردى انىقتاپ، زەرتتەۋ جۇمىستارىن جاساۋ ءۇشىن وزىمەن قالعانىن ايتقان. تۇنگى ون-ون بىرگە دەيىن سوندا بولعان. ءورت وشىرىلگەن. ەكى ادامدى كابينانىڭ الدىنان، بىرەۋىن ورتاسىنان، ال بىرەۋىن بورتتىڭ سىرتىنان تاپقان. الماتىنىڭ جەدەل جاردەم قىزمەتى ءبارى بىتكەن كەزدە ساعات 19.30-داردا جەتكەن.
«بۇل ءبىر ماقتانارلىق جاعداي ەمەس، الايدا «شىندىق نەگە بۇرمالاندى، وسىنداي سىن ساعاتتا كىم ءوز ۇپايىن تۇگەندەگىسى كەلدى ەكەن»،- دەگەن وي مازالادى. ەرتەسىنە جۇمىسقا كەلگەندە باسشىلاردان زاڭ تالاپتارىن بۇزعانىم ءۇشىن ۇرىس ەسىتتىم. №230 بۇيرىق بويىنشا توتەنشە جاعداي ءتارتىبىن بۇزعانىم راس. سامولەت جانىپ جاتىر، اينالانىڭ بارىنە بەنزين توگىلگەن. كەز كەلگەن جاعدايدا سامولەت جارىلۋى ءقاۋپى جوعارى. قاۋىپسىزدىك ەرەجەلەرىن ساقتاۋ مىندەتىم. ءبىراق ماعان سول ساتتە، ءوز ءومىرىمدى ساقتايتىن ەرەجەدەن گورى ازاماتتىق، ادامگەرشىلىك پارىزىم جوعارى تۇردى. سالدەن سوڭ، اشۋلارى باسىلعان سوڭ مەڭگەرۋشىمىز بايان ەسەن ۇلى ارقامنان قاعىپ، «سەن ناعىز ەرلەرشە ارەكەت ەتتىڭ» دەپ العىسىن ايتتى. اعا فەلدشەرلەر نازەركە ايدارحان مەن التىناي اناربەك تە ءوز العىستارىن ءبىلدىردى. الماتى وبلىسى جەدەل جاردەم قىزمەتى ديرەكتورىنىڭ ورىنباسارى ومار نۇرعالي ومار ۇلى مەن الماتى وبلىسىنىڭ اعا فەلدشەرى سەرىك اناربەك ۇلىنىڭ العىسى دا مەن ءۇشىن بارلىق ماراپاتتان ۇلكەن، – دەيدى ناعىز باتىر نۇرقانات.
ەسكە سالايىق، 9 جەلتوقساندا الماتى وبلىسىندا شەرزات بولاتتىڭ اعاسى نۇرقانات عايىپبايەۆ ءولى تابىلعان ەدى. پوليسيا دەپارتامەنتىنىڭ الدىن الا دەرەكتەرى بويىنشا، ول سۋيسيد جاساعان. وعان دالەل رەتىندە پوليسەيلەر نۇرقاناتتىڭ تۋىسىنا مەسسەندجەر ارقىلى جازعان حاتىن جاريا ەتتى.
حابارلامادا ول تۋىسقاندارىمەن قوشتاسىپ، جيەنىنىڭ جانىنا جەرلەۋدى سۇراعان.
بۇل فاكتى بويىنشا قىلمىستىق ءىس قوزعالدى. قازىرگى ۋاقىتتا بارلىق جاعدايلاردى انىقتاۋ ءۇشىن تەرگەۋ امالدارى جۇرگىزىلىپ جاتىر.
