جوبانىڭ دىتتەگەنى باسپانا مەن جۇمىس ورنى وڭايشىلىقپەن تابىلا قويمايتىن وڭىرلەردە تۇراتىن كوپبالالى وتباسىلاردى پاۆلودار وڭىرىنە قونىستاندىرۋ.
جوبانىڭ اۋەلدەن-اق سۇرانىسقا يە بولعانىن مامىر ايىنىڭ باسىندا ەكىباستۇزعا قونىس اۋدارعان 17 كوپبالالى وتباسىعا قاراپ-اق بايقاۋعا بولادى. كومىردىڭ وتانى سانالاتىن قالاعا 100-گە تارتا ادام كوشىپ كەلگەن ەكەن.
ولاردىڭ اراسىندا سەگىز بالانى باعىپ وتىرعان الماگۇل ءجۇسىپوۆا دا بار. الماگۇل بالالارىمەن بىرگە قىزىلوردا وڭىرىنەن كوشىپ كەلىپتى.
– اۋەلدە جايلى، جاقسى ءومىر ىزدەپ استاناعا اۋا كوشكەن ەدىك. ءبىراق قانشا تىرىسسام دا باسپانا ماسەلەسى الدىمنان كەسە-كولدەنەڭ شىعىپ، قيىندىق تۋعىزدى. جاسىم بولسا 38-گە كەلدى. بالالاردىڭ الدى ەسەيدى. پاتەر جالداعان ءومىردىڭ ءقايبىر قىزىعى بولسىن. وسى سەبەپتى پاۆلوداردان ءۇش بولمەلى پاتەر بەرەلىك، كوشىپ كەلىڭىز دەگەندى ەستىگەندە بىردەن كەلىسىم بەردىم، – دەيدى ول.
كوپبالالى انا باسپانا ماسەلەسىن سيىرقۇيىمشاقتاندىرماي بىردەن-اق شەشىپ بەرگەن وبلىس باسشىلىعىنا ءدان ريزا.
– بالالاردىڭ الدى مەكتەپكە بارىپ ءجۇر. وقۋ جىلى بىتۋگە جاقىن. استانادان اسىقپاي اياقتاسىن دەپ شەشتىم. بۇدان سوڭ ولاردى بىردەن جانىما الدىرامىن. Nurly Ertis جوباسىنىڭ يگىلىگىن العاشقىلاردىڭ ءبىرى بولىپ كوردىك. العىستان باسقا ايتارىم جوق. بۇل جوبا ءالى تالاي وتباسىعا قول ۇشىن سوزارىنا سەنىمدىمىن، – دەيدى ول.
– پاتەردى مۇنتازداي تازا كۇيىندە بەردى. ەلەكتر پەشى دە بار ەكەن. اس ۇيلەرى دە كەڭ. كوشىپ-قونۋىمىز دا قيىندىق تۋعىزعان جوق. وعان دا كومەكتەستى. بۇدان بۇرىن ءۇي جالداپ، قوجايىننىڭ قاس-قاباعىنا قاراپ ەڭسەمىز تۇسەتىن ەدى. ەندىگى جەردە ءوز ءۇيىمىز، ولەڭ توسەگىمىز بار. ءۇيسىز، كۇيسىز ءجۇرمىز دەپ ۋايىمدامايمىز. بالالارىمىزعا كوڭىل ءبولىپ، ولاردىڭ بولاشاعىن ويلاستىرامىز. مەكتەپ تە، بالاباقشا دا ءدال ىرگەمىزدە تۇر، – دەيدى تاعى ءبىر كوپبالالى انا ينارا ەسىركەپوۆا.
وبلىستىق اكىمدىك كوشىپ كەلگەن كوپبالالى وتباسىلاردى جۇمىسپەن قامتۋ ماسەلەسىن دە قاراستىرىپ قويىپتى. ولاردىڭ بالالارىن بالاباقشا مەن مەكتەپكە ورنالاستىرۋدا دا قيىندىق تۋمايدى دەيدى.
وبلىستىق اكىمدىكتىڭ دەرەگىنشە، باسپانالى بولعان كوپبالالى وتباسىلار 5 جىل وتكەسىن پاتەردى جەكەمەنشىگىنە وتكىزە الادى.
ازىرگە جالعا الۋ قۇنى تىپتەن ارزان. كوپبالالى وتباسىلارعا بەرىلگەن پاتەرلەردىڭ كەڭدىگى 78-80 شارشى مەتر بولسا، جالعا الۋ قۇنى شارشى مەترىنە 99 تەڭگەنى قۇرايدى ەكەن. بۇل اي سايىنعى جالعا الۋ تولەمى 7-8 مىڭ تەڭگەگە اينالادى دەگەن ءسوز. بۇدان بولەك، پاۆلودار وبلىسىنىڭ اكىمدىگى كوشىپ كەلگەن وتباسىلاردىڭ بالالارىن مەكتەپ فورماسىمەن جانە تەگىن تاماقپەن قامتۋدى ءوز موينىنا الىپتى. بالالاردىڭ بارلىعىنا جانە اتا-اناسىنا تەگىن جول ءجۇرۋ بيلەتى دە بەرىلەدى.
«كوشىپ كەلگەندەردى ماماندىعى بويىنشا جۇمىسقا ورنالاستىرامىز. ەكىباستۇز ءوندىرىستى قالا. ەكى قولعا ءبىر كۇرەك تابىلادى. وبلىستاعى از قامتىلعان وتباسىلاردى باسپانامەن قامتاماسىز ەتۋگە 907،5 ملن تەڭگە قاراجات ءبولىنىپ، اقسۋ قالاسىندا اتالمىش ساناتتاعى 70 وتباسىن باسپانامەن قامتۋعا مۇمكىندىك تۋدى»، – دەيدى وبلىستىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ جەتەكشىسى قايرات نۇرماعامبەتوۆ.
بۇل رەتتە وبلىس اكىمى بولات باقاۋوۆ جۇرتشىلىق اراسىندا دۇرىس ءتۇسىندىرۋ جۇمىستارىن جۇرگىزۋدى جانە وبلىستا بوس تۇرعان ۇيلەردى انىقتاۋ ءۇشىن ساراپتاما جاساۋدى تاپسىردى.
– پيلوتتىق جوبا اياسىندا رەسپۋبليكالىق بيۋدجەتتەن بولىنگەن قاراجات ەسەبىنەن ەكىباستۇز قالاسىندا باسپانا بەرىلەدى، – دەدى ايماق باسشىسى. – سەبەبى ەكىباستۇزدا مەملەكەتتىك باعدارلاما اياسىندا سالىنعان پاتەردىڭ ءبىر شارشى مەترى 140 مىڭ تەڭگە بولعان. الايدا بىردە-بىر پاتەر ساتىلمادى. بۇدان كەيىن 100 مىڭ تەڭگەگە دەيىن تۇسىرگەن كۇننىڭ وزىندە سۇراقتار بولدى.
سوندىقتان ۇكىمەت دەڭگەيىندە ەڭبەك كۇشى ارتىق وڭىرلەردەن جانە نۇر-سۇلتان قالاسىنان جاعدايى قيىن وتباسىلارعا كومەك كورسەتۋ ماقساتىندا پاۆلودار وبلىسى بويىنشا پيلوتتىق جوبا قابىلداندى.
بۇل جەردە ايماقتىڭ دەموگرافيالىق جاعدايى دا ەسكەرىلگەنىن اتاپ وتكەن ءجون. الەۋمەتتىك جەلىدەگى ءقازاقتىلدى اۋديتوريا اتالعان ءۇردىستى وڭ باعالاۋدا. «Nurly Ertis باعدارلاماسىنىڭ پاۆلودار ءوڭىرىن قازاقتاندىرۋعا كوپ كومەگى تيەرى انىق. كوشىپ كەلۋشىلەرگە لايىقتى جاسالعانى ءجون.
مۇنداي جاعدايدا ەلىمىزدىڭ وڭتۇستىك وڭىرلەرىنەن كەلەتىندەردىڭ ۇلەسى وسەدى. بۇل ءوز كەزەگىندە ەكىباستۇز عانا ەمەس، جالپى پاۆلودار وڭىرىندەگى دەموگرافيالىق احۋالعا وڭ سەپتىگىن تيگىزەرى ءسوزسىز» دەيدى جەلىدەگى جۇرت.
