Jobanyń dittegeni baspana men jumys orny ońaishylyqpen tabyla qoimaityn óńirlerde turatyn kópbalaly otbasylardy Pavlodar óńirine qonystandyrý.
Jobanyń áýelden-aq suranysqa ie bolǵanyn mamyr aiynyń basynda Ekibastuzǵa qonys aýdarǵan 17 kópbalaly otbasyǵa qarap-aq baiqaýǵa bolady. Kómirdiń otany sanalatyn qalaǵa 100-ge tarta adam kóship kelgen eken.
Olardyń arasynda segiz balany baǵyp otyrǵan Almagúl Júsipova da bar. Almagúl balalarymen birge Qyzylorda óńirinen kóship kelipti.
– Áýelde jaily, jaqsy ómir izdep astanaǵa aýa kóshken edik. Biraq qansha tyryssam da baspana máselesi aldymnan kese-kóldeneń shyǵyp, qiyndyq týǵyzdy. Jasym bolsa 38-ge keldi. Balalardyń aldy eseidi. Páter jaldaǵan ómirdiń qaibir qyzyǵy bolsyn. Osy sebepti Pavlodardan úsh bólmeli páter berelik, kóship kelińiz degendi estigende birden kelisim berdim, – deidi ol.
Kópbalaly ana baspana máselesin siyrquiymshaqtandyrmai birden-aq sheship bergen oblys basshylyǵyna dán riza.
– Balalardyń aldy mektepke baryp júr. Oqý jyly bitýge jaqyn. Astanadan asyqpai aiaqtasyn dep sheshtim. Budan soń olardy birden janyma aldyramyn. Nurly Ertis jobasynyń igiligin alǵashqylardyń biri bolyp kórdik. Alǵystan basqa aitarym joq. Bul joba áli talai otbasyǵa qol ushyn sozaryna senimdimin, – deidi ol.
– Páterdi muntazdai taza kúiinde berdi. Elektr peshi de bar eken. As úileri de keń. Kóship-qonýymyz da qiyndyq týǵyzǵan joq. Oǵan da kómektesti. Budan buryn úi jaldap, qojaiynnyń qas-qabaǵyna qarap eńsemiz túsetin edi. Endigi jerde óz úiimiz, óleń tósegimiz bar. Úisiz, kúisiz júrmiz dep ýaiymdamaimyz. Balalarymyzǵa kóńil bólip, olardyń bolashaǵyn oilastyramyz. Mektep te, balabaqsha da dál irgemizde tur, – deidi taǵy bir kópbalaly ana Inara Esirkepova.
Oblystyq ákimdik kóship kelgen kópbalaly otbasylardy jumyspen qamtý máselesin de qarastyryp qoiypty. Olardyń balalaryn balabaqsha men mektepke ornalastyrýda da qiyndyq týmaidy deidi.
Oblystyq ákimdiktiń dereginshe, baspanaly bolǵan kópbalaly otbasylar 5 jyl ótkesin páterdi jekemenshigine ótkize alady.
Ázirge jalǵa alý quny tipten arzan. Kópbalaly otbasylarǵa berilgen páterlerdiń keńdigi 78-80 sharshy metr bolsa, jalǵa alý quny sharshy metrine 99 teńgeni quraidy eken. Bul ai saiynǵy jalǵa alý tólemi 7-8 myń teńgege ainalady degen sóz. Budan bólek, Pavlodar oblysynyń ákimdigi kóship kelgen otbasylardyń balalaryn mektep formasymen jáne tegin tamaqpen qamtýdy óz moinyna alypty. Balalardyń barlyǵyna jáne ata-anasyna tegin jol júrý bileti de beriledi.
«Kóship kelgenderdi mamandyǵy boiynsha jumysqa ornalastyramyz. Ekibastuz óndiristi qala. Eki qolǵa bir kúrek tabylady. Oblystaǵy az qamtylǵan otbasylardy baspanamen qamtamasyz etýge 907,5 mln teńge qarajat bólinip, Aqsý qalasynda atalmysh sanattaǵy 70 otbasyn baspanamen qamtýǵa múmkindik týdy», – deidi oblystyq Jumyspen qamtý jáne áleýmettik baǵdarlamalar basqarmasynyń jetekshisi Qairat Nurmaǵambetov.
Bul rette oblys ákimi Bolat Baqaýov jurtshylyq arasynda durys túsindirý jumystaryn júrgizýdi jáne oblysta bos turǵan úilerdi anyqtaý úshin saraptama jasaýdy tapsyrdy.
– Pilottyq joba aiasynda respýblikalyq biýdjetten bólingen qarajat esebinen Ekibastuz qalasynda baspana beriledi, – dedi aimaq basshysy. – Sebebi Ekibastuzda memlekettik baǵdarlama aiasynda salynǵan páterdiń bir sharshy metri 140 myń teńge bolǵan. Alaida birde-bir páter satylmady. Budan keiin 100 myń teńgege deiin túsirgen kúnniń ózinde suraqtar boldy.
Sondyqtan úkimet deńgeiinde eńbek kúshi artyq óńirlerden jáne Nur-Sultan qalasynan jaǵdaiy qiyn otbasylarǵa kómek kórsetý maqsatynda Pavlodar oblysy boiynsha pilottyq joba qabyldandy.
Bul jerde aimaqtyń demografiialyq jaǵdaiy da eskerilgenin atap ótken jón. Áleýmettik jelidegi qazaqtildi aýditoriia atalǵan úrdisti oń baǵalaýda. «Nurly Ertis baǵdarlamasynyń Pavlodar óńirin qazaqtandyrýǵa kóp kómegi tieri anyq. Kóship kelýshilerge laiyqty jasalǵany jón.
Mundai jaǵdaida elimizdiń ońtústik óńirlerinen keletinderdiń úlesi ósedi. Bul óz kezeginde Ekibastuz ǵana emes, jalpy Pavlodar óńirindegi demografiialyq ahýalǵa oń septigin tigizeri sózsiz» deidi jelidegi jurt.
