ماڭعىستاۋ وبلىسىنىڭ اكىمى نۇرداۋلەت قيلىبايدىڭ توراعالىعىمەن وتكەن اپپاراتتىق جيىندا جاڭاوزەن قالاسىنىڭ اكىمى جانسەيىت قايناربايەۆ وتكەن جىلى اتقارىلعان جۇمىستار مەن الداعى جوسپارلار تۋرالى بايانداما جاسادى،- دەپ حابارلايدى Dalanews.kz
جانسەيىت قايناربايەۆتىڭ ايتۋىنشا، حالىقتىڭ الەۋمەتتىك وسال توپتارىن تۇرعىن ۇيمەن قامتاماسىز ەتۋ، سونىڭ ىشىندە اپاتتى ۇيلەر ماسەلەسىن شەشۋ ماقساتىندا وتباسى بانكى ارقىلى «شاڭىراق»، «ناۋرىز»، «وتاۋ» باعدارلامالارى اياسىندا 32 ازامات تۇرعىن ءۇي سەرتيفيكاتىن الىپ، باسپانا كىلتىنە يە بولدى.
جاڭاوزەندە جانە جاقىن ماڭداعى ەلدىمەكەندەردە اۋىز سۋ تاپشىلىعى ماسەلەسىن شەشۋ ماقساتىندا تاۋلىگىنە 50 مىڭ تەكشە مەتر سۋ تۇششىلاندىراتىن «كەندىرلى» زاۋىتىنىڭ قۇرىلىسى ءجۇرىپ جاتىر.
"قالاداعى سۋمەن جابدىقتاۋ جانە كارىز جۇيەلەرىن جاڭارتۋ جۇمىستارى جالعاسىپ جاتىر. قازىرگى ۋاقىتتا «قولدانىستاعى سۋمەن جابدىقتاۋ جانە كارىز جەلىلەرىن كەڭەيتۋ» جوباسى جۇزەگە اسىرىلۋدا. جوبا ناتيجەسىندە سۋ جەلىلەرىنىڭ توزۋ دەڭگەيى 60%-دان 57%-عا، ال كارىز جەلىلەرىنىڭ توزۋ دەڭگەيى 90%-دان 68،8%-عا دەيىن تومەندەيدى. سونداي-اق، تەڭگە اۋىلىنداعى سۋ قۇبىرى جەلىلەرى 715،8 شاقىرىمنان 723،4 شاقىرىمعا دەيىن ارتادى"، - دەدى جانسەيىت قايناربايەۆ.
ءبىلىم بەرۋ سالاسى بويىنشا «اۋىل – ەل بەسىگى» جوباسى اياسىندا راحات اۋىلىنداعى №18 مەكتەپكە 300 وقۋشىعا ارنالعان جاپسارجايدىڭ قۇرىلىسى ءجۇرىپ جاتىر.
سونداي-اق، «جايلى مەكتەپ» ۇلتتىق جوباسى شەڭبەرىندە راحات اۋىلىنىڭ «مەرەي» شاعىناۋدانىندا 1200 ورىندىق مەكتەپتىڭ قۇرىلىسى ءجۇرىپ جاتىر. بۇل نىسانداردى 2025 جىلدىڭ قىركۇيەك ايىندا اياقتاۋ جوسپارلانعان.
جەكە ينۆەستيسيا ەسەبىنەن قىزىلساي اۋىلىندا 500 وقۋشىعا ارنالعان باستاۋىش مەكتەپ، ال «وزەنمۇنايگاز» اق قاراجاتى ەسەبىنەن «وقۋشىلار سارايى» سالىنۋدا.
جانسەيىت قايناربايەۆتىڭ ايتۋىنشا، بيىل جاڭاوزەندە الەۋمەتتىك نىسانداردىڭ قۇرىلىسى، سۋ جانە كارىز جەلىلەرىنىڭ توزۋىن تومەندەتۋ، ەلەكترمەن جابدىقتاۋ جانە اۆتوموبيل جولدارىن سالۋ بويىنشا ءبىرقاتار جوبالاردى ىسكە اسىرۋ جوسپارلانىپ وتىر.
جيىن بارىسىندا وبلىس اكىمى نۇرداۋلەت قيلىباي تۇرعىندار ءۇشىن ەڭ قاجەتتى جوبالارعا باسىمدىق بەرۋ كەرەكتىگىن اتاپ ءوتىپ، قاراجاتتى ماقساتتى ءارى ءتيىمدى پايدالانۋدىڭ ماڭىزدىلىعىن ەسكەرتتى.
سونداي-اق، ءوڭىر باسشىسى جاڭاوزەن قالاسىنداعى قوقىس ماسەلەسىن قاتاڭ سىنعا الىپ، قالا اكىمى جانسەيىت قايناربايەۆقا شاھار اۋماعىن، قاسيەتتى ورىندارعا اپاراتىن جولدار مەن ولاردىڭ اينالاسىن قوقىستان تازارتۋدى تاپسىردى.
