تۇركىستان وبلىسى اكىمى نۇرالحان كوشەروۆ شاردارا اۋدانىنا جاساعان ساپارى اياسىندا «جايلى مەكتەپ» ۇلتتىق جوباسىمەن سالىنعان 1200 ورىندىق ءبىلىم وشاعىن ارالاپ، قۇرىلىس ساپاسىن قاداعالادى، – دەپ حابارلايدى Ertenmedia.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
اۋداندا پيلوتتىق جوبا اياسىندا 2 مەكتەپ سالۋ جوسپارلانىپ، بۇگىنگى تاڭدا 1200 ورىندىق مەكتەپتىڭ قۇرىلىسى تولىق اياقتالعان. مۇندا 150 جۇمىس ورنى اشىلماق. زاماناۋي ۇلگىدەگى قوس ءبىلىم نىسانى ينجەنەرلىك ينفراقۇرىلىممەن تولىق قامتىلعان. جالپى الاڭى 4،2 گەكتار اۋماقتى قۇرايتىن مەكتەپتىڭ قۇرىلىسى «Samruk-Kazyna Construction» اق تاپسىرماسىمەن جۇرگىزىلگەن. اتالعان ءبىلىم وشاعى كىتاپحانا، سپورت زالى، كومپيۋتەر سىنىبى جانە اكت زالىمەن تولىعىپ، بالالاردىڭ جان-جاقتى دامۋى ءۇشىن زاماناۋي قۇرالدارمەن جابدىقتالعان.
وبلىس اكىمى مەكتەپ عيماراتىندا جەرگىلىكتى تۇرعىندارمەن كەزدەسىپ، پىكىر الماستى. ۇسىنىستارىن تىڭداپ، ءوڭىردىڭ نەگىزگى دامۋ باعىتتارى تۋرالى ايتتى.
بۇگىندە مەملەكەت باسشىسىنىڭ تاپسىرماسىمەن تۇركىستان وبلىسىندا زامان تالابىنا ساي، 29 ءبىرىڭعاي «جايلى مەكتەپ» بوي كوتەرىپ، كەزەڭ-كەزەڭىمەن ەل يگىلىگىنە پايدالانۋعا بەرىلىپ كەلەدى. جالپى وڭىردە ءبىلىم ساپاسىن نىعايتۋ ماقساتىندا ءتۇرلى ماڭىزدى جوبالار قولعا الىنعان. بۇل باعىتتاعى جۇمىستار جالعاسىن تابادى.
ءوڭىردى ەلەكتر قۋاتىمەن قامتۋ جۇمىستارى وزەكتى ماسەلە سانالادى. وبلىستاعى ەنەرگيا ءوندىرۋشى كاسىپورىننىڭ بىرەگەيى – «شاردارا سۋ ەلەكتر ستانسياسى». مۇندا ەنەرگيا كوزى وندىرىلەدى. تۇركىستان وبلىسىنىڭ اكىمى نۇرالحان كوشەروۆ «شاردارا سۋ ەلەكتر ستانسياسى» اكسيونەرلىك قوعامىنا بارىپ، ءوندىرىس بارىسىمەن تانىسىپ، جاۋاپتى تۇلعالارعا ءتيىستى تاپسىرمالار بەردى.
1967 جىلى پايدالانۋعا بەرىلگەن گيدروەلەكتر ستانسياسىندا ءارقايسىسى 31،5 مۆت ەلەكتر قۋاتىن وندىرەتىن 4 اگرەگاتتى گەنەراتور ىسكە قوسىلعان، مۇندا 126 ادام جۇمىسپەن قامتىلعان. كاسىپورىندا وندىرىلەتىن ەلەكتر ەنەرگياسى ىشكى سۇرانىسقا باعىتتالعان. وندىرىستىك اۋماعى 2 گەكتاردى قۇرايتىن ستانسيانىڭ نەگىزگى قىزمەتى – قر-نىڭ وڭتۇستىك اۋماعىن ەلەكتر ەنەرگياسىمەن قامتي وتىرىپ، سۋ تاسقىنىنا قارسى كۇرەس جۇمىستارىن وڭتايلاندىرۋ.
