وسىناۋ فورۋمعا ازيا مەن ەۋروپانىڭ 84 مەملەكەتىنەن پارلامەنت باسشىلارى، 14 حالىقارالىق جانە پارلامەنتارالىق ۇيىمداردىڭ جەتەكشىلەرى ات شالدىرىپ كەلدى.
بۇل جولعى جيىننىڭ ەرەكشەلىگى – فورۋم ەلباسى نۇرسۇلتان نازاربايەۆتىڭ ەۋرازيالىق ينتەگراسيا تۋرالى يدەياسىنىڭ 25 جىلدىعىمەن تۇسپا-تۇس كەلىپ وتىر.
قازاقستاننىڭ باستى ۇستانىمى – ەۋرازيا ەلدەرى اراسىندا بولاتىن قاراما-قايشىلىقتارعا، سونىمەن قاتار جاھاندىق قاۋىپ-قاتەرلەرگە قارسى بىرلەسە ارەكەت ەتۋ.
كەزدەسۋگە قازاقستاننىڭ تۇڭعىش پرەزيدەنتى – ەلباسى نۇرسۇلتان نازاربايەۆ تا قاتىسىپ، ەلىمىزدىڭ تاۋەلسىزدىك العان جىلدارداعى جەتىستىكتەرىنە توقتالىپ ءوتتى. نازاربايەۆ ەلىمىز وسى ۋاقىت ىشىندە دامىعان 50 ەلدىڭ قاتارىنا قوسىلىپ، جالپى ىشكى ءونىم 18 ەسە وسكەنىن جانە رەسپۋبليكا ەكونوميكاسىنىڭ كولەمى ورتالىق ازيا ەلدەرىنىڭ جالپى ىشكى ونىمىنەن 2 ەسە اسىپ تۇسكەنىن اتاپ ءوتتى.
سونىمەن قاتار زاڭ شىعارۋشى ورگانداردىڭ ءوزارا ىنتىماقتاستىعىن تىلگە تيەك ەتتى.
- وسى كەڭەستىڭ تابىستى جۇمىس ىستەۋىنە بارشامىز مۇددەلىمىز. كەلگەندەرىڭىزگە ريزاشىلىعىمىزدى بىلدىرەمىز. ءبىز زاڭ شىعارۋ ورگانىنىڭ قىزمەتىنە ەرەكشە ءمان بەرەمىز. قازاقستان دەپۋتاتتارى شەتەلدىك ارىپتەستەرىمەن كەڭ كولەمدى بايلانىس ورناتىپ، مەملەكەتارالىق دوستىقتى نىعايتا ءتۇستى. ەلدەرىمىزدىڭ جوعارعى ورگاندارىنىڭ دەپۋتتارى ەۋرازيادا ىنتىماقتاستىق اياسىن ودان ءارى كەڭەيتەدى دەپ سەنەمىن، – دەدى ەلباسى.
