كونفەرەنسيانى «Nur Otan» پارتياسى تۇركىستان قالالىق فيليالى ءتوراعاسىنىڭ ءبىرىنشى ورىنباسارى الماسبەك جۇرگىزىپ وتىردى. كۇن تارتىبىندە ءۇش ماسەلە قارالدى. ءبىرىنشى ماسەلە – «Nur Otan» پارتياسى تۇركىستان قالالىق فيليالىنىڭ ءتوراعاسىن سايلاۋ بولدى. دەلەگاتتاردىڭ داۋىس بەرۋىمەن نۇربول تۇراشبەكوۆتىڭ كانديداتۋراسى ءبىراۋىزدان قولداۋ تاۋىپ، ول «Nur Otan» پارتياسى تۇركىستان قالالىق فيليالىنىڭ ءتوراعاسى بولىپ سايلاندى.
«Nur Otan» پارتياسى تۇركىستان وبلىستىق فيليالى ءتوراعاسىنىڭ ءبىرىنشى ورىنباسارى بەيسەنباي تاجىبايەۆ تۇركىستاننىڭ ستراتەگيالىق ماڭىزى بار قالا ەكەنىنە توقتالىپ، جاڭا ءتورعانىڭ الدىندا اۋقىمدى مىندەتتەر تۇرعانىن اتاپ ءوتتى. وبلىس ورتالىعى بولعاندىقتان تۇركىستان فيليالىنا ۇلكەن جاۋاپكەرشىلىك جۇكتەلىپ وتىرعانىنا دا توقتالدى. قالا اكىمى، قالالىق فيليال ءتوراعاسى ن.تۇراشبەكوۆ ەل سەنىمىن اقتاۋ جولىندا ايانىپ قالمايتىنىن ايتتى.
– 2020 جىلدىڭ قورىتىندىسى بويىنشا پارتيانىڭ تۇركىستان قالالىق قوعامدىق قابىلداۋ بولمەسىنە 1354 ادام جۇگىنگەن، بۇل – 2019 جىلمەن سالىستىرعاندا (734) 2 ەسە كوپ. ناتيجەسىندە ءوتىنىشتىڭ 687 وڭتايلى شەشىلىپ، 667 وتىنىشكە زاڭ اياسىندا كەڭەستەر بەرىلدى. 2021 جىلى قاڭتار-ماۋسىم ايلارى بويىنشا 754 ءوتىنىش كەلىپ تۇسكەن. ونىڭ 165ء-ى (22%) وڭتايلى شەشىلىپ، 586 وتىنىشكە زاڭ اياسىندا كەڭەستەر بەرىلگەن، 3 ءوتىنىش قارالۋ بارىسىندا. جول كارتاسىن جۇزەگە اسىرۋ، حالىقپەن ديالوگ ورناتىپ، ولاردىڭ ماسەلەلەرىنىڭ شەشىلۋىنە ىقپال ەتۋ جۇمىستارىن كۇشەيتۋ كەرەك، – دەدى ب.تاجىبايەۆ.
كونفەرەنسيادا «Nur Otan» پارتياسىنىڭ تۇركىستان قالاسى بويىنشا «وزگەرىستەر جولى»: ءار ازاماتقا – لايىقتى ءومىر!» سايلاۋالدى باعدارلاماسىن ورىنداۋ جونىندە جول كارتاسىنىڭ ورىندالۋ بارىسى دا ءسوز بولدى. تۇركىستان قالاسى اكىمىنىڭ ورىنباسارى مۇرات بازارقۇلوۆتىڭ ايتۋىنشا، تۇركىستان قالاسىنىڭ جول كارتاسىندا 126 ءىس-شارا جوسپارلانعان، ونىڭ ىشىندە 15ء-ى (11،9%) ورىندالعان، 90-ى (71،5%) ورىندالۋ ۇستىندە، 21ء-ىنىڭ (16،6%) ورىندالۋ مەرزىمى بار. 2021 جىلدىڭ ءى جارتىجىلدىعىندا تۇركىستان قالاسىندا كەلۋشىلەردىڭ سانى 209،3 مىڭ ادامدى قۇرادى. قوناق ۇيلەر اشىلىپ، حالىقارالىق اۋە رەيستەرى سانى ارتقان. قالا اينالاسىندا 4 355 گا جەردە ازىق-تۇلىك بەلدەۋىن قۇرۋ جوسپارلانىپ، جىل باسىنان 1567 گا يگەرىلدى. «بيزنەستىڭ جول كارتاسى - 2025» مەملەكەتتىك باعدارلاماسى اياسىندا 300 كاسىپكەرگە قولداۋ كورسەتۋ جوسپارلانىپ، 4 ايدا 55،3 ملن.تەڭگەگە 108 كاسىپكەرگە سۋبسيديا بەرىلگەن. وسى جانە وزگە دە دەرەكتەرگە توقتالعان بايانداماشى جەتەكشى پارتيانىڭ سايلاۋالدى باعدارلاماسىن ورىنداۋ باستى نازاردا ەكەنىن جەتكىزدى.
كۇن تارتىبىندەگى ءۇشىنشى ماسەلە بويىنشا «Nur Otan» پارتياسى تۇركىستان قالالىق فيليالى ساياسي كەڭەسىنىڭ قۇرامىنا وزگەرىستەر ەنگىزىلدى.
