پارتيانىڭ باسپا ءسوز قىزمەتىنىڭ مالىمەتىنشە، «Nur Otan»-نىڭ سايلاۋالدى باعدارلاماسىن ىسكە اسىرۋ جونىندەگى جول كارتاسى اياسىندا بيىل 17 ميلليون شارشى مەتر تۇرعىن ءۇي سالۋ جوسپارلانۋدا، ونىڭ 2،5 ميلليونى حالىقتىڭ الەۋمەتتىك وسال توپتارىنا جاتاتىن جاندارعا ارنالادى. جىل باسىنان بەرى 7،7 ميلليون ش.م. تۇرعىن ءۇي نەمەسە 66 مىڭ پاتەر پايدالانۋعا بەرىلدى.
الايدا، پارتيالىق باقىلاۋ كوميتەتىنىڭ مۇشەسى ءانۋار ءىلياسوۆانىڭ ايتۋىنشا، پاتەرگە مۇقتاج جاندار سانى ارتىپ كەلەدى. قازىرگى ۋاقىتتا تۇرعىن ءۇي كەزەگىندە 577 مىڭ وتباسى تۇر. 2019 جىلدىڭ قاڭتارىنان 2021 جىلدىڭ قىركۇيەگىنە دەيىن 113،8 مىڭ تۇرعىن كەزەكتە تۇر. ولاردىڭ كوپشىلىگى –الەۋمەتتىك وسال توپتاعى ازاماتتار.
– سوڭعى ۋاقىتتا الەۋمەتتىك تۇرعىن ءۇي سالۋعا جانە ونى بولۋگە بايلانىستى پارتيانىڭ قوعامدىق قابىلداۋ بولمەلەرىنە وتىنىشتەر سانى ارتقانىن ايتقىم كەلەدى. ماسەلەن، اقتاۋ قالاسىندا اكىمدىك 2ء-شى توپتاعى مۇگەدەككە راكوۆيناسى، ۋنيتازى جانە ۆانناسى جوق جالدامالى پاتەر بولگەن. اتىراۋ وبلىستىق پارتيا فيليالىنا كوپبالالى انالاردان شاعىم تۇسكەن. ولاردىڭ تۇرعىن ءۇي كەشەنىندەگى ەسىكتەردىڭ ساپاسى وتە ناشار، قابىرعالارى جارىلعان، ال قىستا ىشكى جانە سىرتقى اۋا تەمپەراتۋراسى بىردەي. سوڭعى ءبىر جارىم جىلدا وسىنداي شاعىمداردىڭ 11 مىڭنان استامى ءتۇستى، – دەدى ءانۋار ءىلياسوۆا.
بۇل رەتتە، حالىقتىڭ الەۋمەتتىك وسال توپتارىنا 2017-2019 جىلدارى پايدالانۋعا بەرىلگەن 21،5 مىڭ پاتەردىڭ 8%-ى ازاماتتاردىڭ وسى ساناتىنا جاتپايتىن ادامدار اراسىندا بولىنگەن، ال پاتەرلەردىڭ تاعى 12%-ى ينجەنەرلىك-كوممۋنيكاسيالىق ينفراقۇرىلىمنىڭ جانە اۋماقتى اباتتاندىرۋدىڭ بولماۋىنا بايلانىستى بولىنبەگەن.
– مەملەكەتتىك باعدارلامالاردى ىسكە اسىرۋ اياسىندا پايدالانۋعا بەرىلەتىن تۇرعىن ءۇيدىڭ ساپاسى، وكىنىشكە قاراي، كوپ جاعدايدا كوڭىل كونشىتەرلىك ەمەس، – دەپ اتاپ ءوتتى كوميتەت ءتوراعاسى، ءماجىلىس دەپۋتاتى ارتۋر پلاتونوۆ.
ءوز كەزەگىندە يندۋستريا جانە ينفراقۇرىلىمدىق دامۋ ءبىرىنشى ۆيسە-مينيسترى قايىربەك وسكەنبايەۆ 2015 جىلى قۇرىلىس ساپاسىن باقىلاۋ تولىعىمەن جەرگىلىكتى اتقارۋشى ورگانداردىڭ، مەملەكەتتىك ساۋلەت-قۇرىلىس باسقارماسىنىڭ قاراماعىنا بەرىلگەنىن ناقتىلادى.
– ولار تەكسەرىستەردى ازاماتتاردىڭ وتىنىشتەرىنەن كەيىن عانا جۇرگىزەدى. سالىنىپ جاتقان نىسانداردى تەكسەرۋ – 6،9% بولدى. 10 529 نىسانعا 725 تەكسەرۋ جۇرگىزىلدى. قالا تۇرعىندارى ينجەنەرلىك-كوممۋنالدىق جەلىلەردىڭ جۇكتەمەلەرىنە، كولىك كەپتەلىستەرىنە الىپ كەلەتىن تىعىز سالىنىپ جاتقان قۇرىلىستارعا شاعىمداناتىنى جاسىرىن ەمەس. بۇل ماسەلەلەر اكىمدىكتەر ازىرلەيتىن ەگجەي-تەگجەيلى جوبالاۋ جوسپارى بويىنشا رەتتەلەدى. ءبىز جوسپارلاردىڭ بارلىق قالا قۇرىلىسى نورمالارىنا سايكەستىگى تۇرعىسىنان مەملەكەتتىك ساراپتامادان ءوتۋى تيىستىگىن زاڭنامالىق تۇردە بەكىتۋدى ۇسىنامىز، – دەدى قايىربەك وسكەنبايەۆ.
ول سونداي-اق اكىمدىكتەردىڭ ورنىنا الەۋمەتتىك تۇرعىن ءۇي سالۋمەن كەيىننەن ساتىپ الۋعا بولاتىن جەكە سەكتور اينالىسقانى ءجون دەگەن پىكىرىن ءبىلدىردى.
سونىمەن قاتار، يندۋستريا جانە ينفراقۇرىلىمدىق دامۋ ءبىرىنشى ۆيسە-مينيسترىنىڭ ايتۋىنشا، قۇرىلىس پروسەستەرىنىڭ اشىقتىعىن قامتاماسىز ماقساتىندا جانە تۇرعىن ءۇي قۇرىلىسىنىڭ ساپاسىن باقىلاۋ جۇرگىزۋ ءۇشىن «ە-Qurylys» ءبىرىڭعاي اقپاراتتىق جۇيەسى ازىرلەنىپ جاتقانىن ايتتى. جۇيە جۇمىسىن ناقتى ۋاقىت رەجيمىندە باقىلاۋعا مۇمكىندىك بەرەدى. جاڭا جۇيە 2022 جىلعى 1 قاڭتاردان باستاپ جۇمىس ىستەي باستايدى.
مەملەكەتتىك باعدارلامالاردى ىسكە اسىرۋ بارىسىندا بيۋدجەت قاراجاتىن جۇمساۋعا بايلانىستى كوپتەگەن قارجىلىق زاڭ بۇزۋشىلىق فاكتىلەرى كوميتەت مۇشەلەرىنىڭ ساۋالدارىن تۋعىزدى.
– «نۇرلى جەر» مەملەكەتتىك باعدارلاماسىن ىسكە اسىرۋ بويىنشا يندۋستريا جانە ينفراقۇرىلىمدىق دامۋ مينيسترلىگىنىڭ قۇرىلىس جانە تۇرعىن ۇي-كوممۋنالدىق شارۋاشىلىق ىستەرى كوميتەتى 21 ملرد تەڭگە سوماسىندا زاڭ بۇزۋشىلىقتارعا جول بەردى. بۇدان باسقا، كوميتەتتىڭ 10 ملرد تەڭگەدەن استام بيۋدجەت قاراجاتىن ءتيىمسىز پايدالانۋ فاكتىلەرى انىقتالدى. بۇل جەردە ناقتى اقپاراتسىز كوميتەتكە 21 ملرد تەڭگەگە بيۋدجەتتىك ءوتىنىم قالاي ماقۇلدانۋى مۇمكىن دەگەن سۇراق تۋىندايدى، – دەدى ءانۋار ءىلياسوۆا.
ول سونداي-اق، «بايتەرەك ديەۆەلوپمەنت» اق-دا (ءقازىر قازاقستان تۇرعىن ءۇي كومپانياسى) ءتيىمسىز جوسپارلاۋ انىقتالعانىن دا اتاپ ءوتتى. ولار جوبالاۋ سمەتالىق قۇجاتتاماسى بولماعان نەمەسە ازىرلەنۋ بارىسىندا بقو، سقو، قاراعاندى جانە پاۆلودار وبلىستارىندا 19 ملرد تەڭگەدەن استام سوماعا ءبىرقاتار جوبالاردىڭ قۇرىلىسىن قارجىلاندىرعان.
وتىرىس قورىتىندىسى بويىنشا، پارتيالىق باقىلاۋ كوميتەتى يندۋستريا جانە ينفراقۇرىلىمدىق دامۋ مينيسترلىگىنە جانە ۇلتتىق ەكونوميكا مينيسترلىگىنە حالىقتىڭ از قامتىلعان جانە الەۋمەتتىك وسال توپتارى ءۇشىن تۇرعىن ءۇي سالۋدى جەكە ارنايى مەملەكەتتىك باعدارلاماعا ءبولۋدى، سونداي-اق وسى باعىتتاعى بيۋدجەتتىك قارجىلاندىرۋدى كوبەيتۋ مۇمكىندىگىن قاراستىرۋدى ۇسىندى.
نۇروتاندىقتار پاتەرلەردى بەرۋ پروسەسىن جەدەلدەتۋ ءۇشىن مەملەكەتتىك باعدارلامالار شەڭبەرىندە حالىقتىڭ از قامتىلعان جانە الەۋمەتتىك وسال توپتارى ءۇشىن كوممەرسيالىق قۇرىلىس كومپانيالارىنان دايىن ينجەنەرلىك ينفراقۇرىلىمى بار تۇرعىن ءۇي ساتىپ الۋ تەتىگىن ەنگىزۋدى ۇسىندى.
ەسكە سالا كەتەيىك، «Nur Otan» پارتياسىنىڭ سايلاۋالدى ۋادەلەرى اياسىندا 2025 جىلعا قاراي 1 ميلليونعا جۋىق وتباسى ءۇشىن، ونىڭ ىشىندە 284 مىڭ كوپبالالى جانە كەدەيلىك شەگىنەن تومەن وتباسىلار، مۇمكىندىگى شەكتەۋلى ازاماتتار، جەتىم بالالار ءۇشىن 103 ميلليون شارشى مەتر تۇرعىن ءۇي پايدالانۋعا بەرىلەدى. اۋىلدىق جەرلەردە جىل سايىن جەكە تۇرعىن ءۇي سالۋ ءۇشىن ينجەنەرلىك جەلىلەرمەن قامتاماسىز ەتىلگەن 22 مىڭ جەر ۋچاسكەسى بولىنەدى.
