مەملەكەت باسشىسى قاسىم-جومارت توقايەۆ جاريا ەتكەن «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاما اياسىندا وڭىرلەردە 11،6 ملن شارشى مەتر تۇرعىن ءۇي، 59 مىڭ ورىندىق 165 مەكتەپ، 28،5 مىڭ ورىندىق 354 بالاباقشا، سونداي-اق 6،7 مىڭ ادام قابىلدايتىن 44 مەديسينالىق نىسان پايدالانۋعا بەرىلدى. 248 كاسىپورىن اشىلىپ، 1 تريلليون تەڭگەدەن استام ينۆەستيسيا سالىندى. 315 مىڭ ادام تۇراقتى جۇمىس ورىندارىنا ورنالاستىرىلدى.
ماسەلەن، ماڭعىستاۋ وبلىسىنىڭ قىزىلساي اۋىلىندا زاماناۋي مەديسينالىق قۇرال-جابدىقتارمەن جابدىقتالعان دارىگەرلىك امبۋلاتوريا اشىلدى. ەندى ەمدەلۋشىلەر ۋلترادىبىستىق، رەنتگەن، ستوماتولوگيا جانە زەرتحانا قىزمەتتەرىن پايدالانا الادى. بارلىعى 40-تان استام ارنايى كابينەت جۇمىس ىستەيدى.
تۇركىستان وبلىسىندا وبلىستىق ماڭىزى بار «كوكساەك-اقسۋ-شايان-مىڭبۇلاق» اۆتوموبيل جولى پايدالانۋعا بەرىلدى. مۇندا 14،8 كم جول جوندەلىپ، قايتا سالىنسا، ال 7،7 كم جولعا اسفالت-بەتون جابىنى توسەلدى. ەلدى مەكەندەردىڭ ىشىندە جاياۋ جۇرگىنشىلەردىڭ قاۋىپسىزدىگىن قامتاماسىز ەتۋ ءۇشىن جالپى 10 كم تروتۋار توسەلدى.
شىعىس قازاقستان وبلىسىنىڭ كۋرچاتوۆ قالاسىندا تەننيس كورتى مەن باسكەتبول الاڭىنىڭ اۋماعىن اباتتاندىرۋ جۇمىستار جۇرگىزىلدى. سايلاۋ ناۋقانى كەزىندە جاستاردان كوپتەگەن ۇسىنىستار كەلىپ تۇسكەنىن ەسكەرە وتىرىپ، اتالعان ماسەلە پارتيانىڭ قالالىق سايلاۋالدى باعدارلاماسىنا ارنايى تارماق رەتىندە ەنگىزىلگەن ەدى.
الماتى وبلىسىنىڭ باقاناس اۋىلىندا جاڭا دەنە شىنىقتىرۋ-ساۋىقتىرۋ كەشەنى اشىلدى. جالپى اۋدانى 4 مىڭ شارشى مەتردەن اساتىن عيماراتتا كۇرەس، بوكس، فۋتبول، باسكەتبول، ۆولەيبول، تەننيس سياقتى سپورت تۇرلەرىمەن اينالىسۋعا جاعداي جاسالعان. نىسان بارلىق قاجەتتى سپورتتىق كەرەك-جاراقتارمەن تولىقتاي جابدىقتالعان.
ەسكە سالا كەتەيىك، «Nur Otan» پارتياسىنىڭ سايلاۋالدى ۋادەلەرى اياسىندا 2025 جىلعا دەيىن 1 ملن وتباسى ءۇشىن 100 ملن شارشى مەتردەن استام تۇرعىن ءۇي پايدالانۋعا بەرىلىپ، 3،5 مىڭ اۋىل مەن 5 مىڭ مەكتەپ جاڭعىرتىلادى. 25 مىڭ شاقىرىم رەسپۋبليكالىق جانە 27 مىڭ شاقىرىم جەرگىلىكتى جولدار سالۋ جانە قايتا جاڭارتۋ كوزدەلىپ وتىر.
الەۋمەتتىك تولەمدەردى جىل سايىن يندەكستەۋگە 3 تريلليون تەڭگەدەن استام قاراجات بولىنەدى. دەنساۋلىق ساقتاۋدى قارجىلاندىرۋ كولەمى ءىجو-نىڭ 5%-ىنا دەيىن جەتكىزىلەدى. 3 جاستان 6 جاسقا دەيىنگى بالالار 100%مەكتەپكە دەيىنگى تاربيەمەن قامتىلادى.
تولىعىراق nurotan.kz سايتىندا تانىسۋعا بولادى.
