الماتى قالاسىنداعى فيزيكا-ماتەماتيكا باعىتىنداعى نازاربايەۆ زياتكەرلىك مەكتەبىنىڭ وقۋشىلارى NASA جانە National Space Society ۇيىمداستىرعان Space Settlement Contest 2025 حالىقارالىق بايقاۋىندا ءبىرىنشى جانە ەكىنشى ورىنداردى يەلەنىپ، الەمدىك ارەنادا ەل ابىرويىن اسقاقتاتتى، دەپ حابارلايدى Dalanews.kz.
بيىل بۇل بايقاۋعا الەمنىڭ 25 ەلىنەن 26 000-نان استام وقۋشى قاتىسىپ، بولاشاقتاعى عارىش مەكەندەرىنىڭ پروتوتيپتەرىن ۇسىندى. زياتكەرلىك مەكتەپتىڭ ەكى كومانداسى عىلىمي-فانتاستيكالىق جانە ينجەنەرلىك نەگىزدە جاسالعان جوبالارىمەن ۇزدىك دەپ تانىلدى.
ءبىرىنشى ورىندى جەڭىپ العان YURT جوباسى – يۋپيتەر وربيتاسىندا ورنالاساتىن، 20–30 مىڭادامعا ارنالعان اۆتونومدى عارىش ستانسياسى. جوبا جاساندى گراۆيتاسيامەن جانە تىرشىلىك ءۇشىن قاجەتتى ينفراقۇرىلىممەن تولىق جابدىقتالعان. ستانسيا قۇرامىنا Tulpar جانە Qyran اتتى جۇك كەمەلەرى، Yu-1 جانە Yu-2 قوسالقى مودۋلدەرى، سونداي-اق فلورا مەن فاۋنا تىرشىلىگىنە ارنالعان اگروسەكتورلار مەن بىرنەشە جاساندى ەكوجۇيە كىرەدى. جوبانى اناستاسيا سوي، يۋليا كيم، كاميلا ەرتىس قىزى جانە ءىلياس داۋلەت دايىندادى.
ال ەكىنشى ورىندى يەلەنگەن يكارۋس جوباسى – يۋپيتەردىڭ ەڭ ۇلكەن سەرىگى گانيمەدتىڭ وربيتاسىندا ورنالاساتىن، 45 000 ادامعا ارنالعان زاماناۋي عارىش ستانسياسى. جوبا ستانسيانى رادياسيادان تابيعي جولمەن قورعاۋدى، جەل تۋربينالارى مەن بيورەاكتورلار ارقىلى ەنەرگيا ءوندىرۋدى، سونداي-اق اەروپونيكا مەن حلورەللا ارقىلى اۆتونومدى تىرشىلىك جۇيەسىن قامتاماسىز ەتۋدى كوزدەيدى.
جوبانى دايىنداعان وقۋشىلار – اسان تابىلدى، ارمان تەمىربۋلاتوۆ، سابىرجان ىنكاربەك، توميريس قۇزباكوۆا، مۇحيدين جاپاروۆ، باعداۋلەت الىشەر، ءۋالي بەرىك، ايسۇلۋ نۇرسۇلتان، ارلان تايروۆ جانە باقىت اسلان. جوبانىڭ جەتەكشىلىگىن 12-سىنىپ وقۋشىسى ءادىل ساندىقبايەۆ اتقاردى.
"2022 جىلى Space Settlement Contest بايقاۋىنا العاشقى جوبامىزدى دايىنداعان كەزدە، ءبىز ءۇشىن جول كورسەتەتىن دايىن تاجىريبە دە، تابىستى كەيس تە، قاۋىمداستىق تا بولعان جوق. ءبىز ءبىرىنشى بولىپ جول سالدىق، تاۋەكەلگە باردىق. سول جىلى ءبىز بايقاۋداعى تۇڭعىش قازاقستاندىق جەڭىمپاز اتانىپ، بىردەن ءبىرىنشى ورىندى جەڭىپ الدىق"، – دەپ ەسىنە الدى ءادىل ساندىقبايەۆ.
ءادىل – قازاقستاندا زىمىران جاساۋ مەن عارىشتىق ينجەنەرياعا العاش بولىپ قىزىعۋشىلىق تانىتقان وقۋشىنىڭ ءبىرى. ول بۇل سالانى تاڭداۋ ارقىلى تەك ءوز بولاشاعىنا عانا ەمەس، تۇتاس ءبىر ۇرپاقتىڭ باعىتىنا اسەر ەتۋدى ماقسات ەتكەن. بيىل ونىڭ جولىن جالعاعان جاڭا كوماندا دا جەڭىسكە جەتىپ وتىر.
"بايقاۋعا قاتىسۋشىلاردىڭ دەڭگەيى جىل سايىن ءوسىپ كەلەدى. سوندىقتان مۇنداي ناتيجەلەردىڭ ءمانى ەرەكشە. ءبىز تەك ءبىلىم مەن تاجىريبە بەرىپ قويماي، ولاردىڭ وزىنە دەگەن سەنىمىن دە ارتتىرا الدىق دەپ ويلايمىن. بۇل باستامانىڭ جالعاسارىنا سەنەمىن. ولار تەك مەكتەپ ىشىندە ەمەس، ەلىمىزدە دە اەروكوسموس سالاسىن دامىتۋعا ۇلەس قوسادى"، – دەيدى ءادىل.
ايتا كەتەيىك، Space Settlement Contest – اتاقتى امەريكالىق فيزيك دجەرارد و'ءنيللدىڭ باستاماسىمەن ۇيىمداستىرىلاتىن مەكتەپ وقۋشىلارىنا ارنالعان جىل سايىنعى حالىقارالىق بايقاۋ. قاتىسۋشىلار فيزيكا، بيولوگيا، تەحنولوگيا، ارحيتەكتۋرا جانە ەكولوگيا سالالارىنداعى بىلىمدەرىن پايدالانا وتىرىپ، بولاشاقتاعى عارىشتىق قونىستاردىڭ ۇلگىلەرىن جاسايدى.
