2021 جىلدان باستاپ قازاقستاندا ق ر قارجى نارىعىن رەتتەۋ جانە دامىتۋ اگەنتتىگى (قنردا) ەنگىزگەن قارىز الۋشىلاردى وڭالتۋدىڭ جاڭا تەتىگى جۇمىس ىستەيدى.
قنردا مالىمەتى بويىنشا، ءساۋىر ايىنىڭ سوڭىنا تامان كرەديتتەر بويىنشا «وڭالتىلدى» دەگەن مارتەبەنى اۆتوماتتى تۇردە 1 419 000 ازامات العان.
دەمەك، بۇعان دەيىن يپوتەكا الا الماي جۇرگەن ءبىر جارىم ميلليوننان استام وتانداسىمىز ەندى ءۇي جايىن جاقسارتۋعا مۇمكىندىك الىپ وتىر.
ازاماتتار «قارا تىزىمگە» قالاي كىرىپ كەتكەن؟
قنردا مالىمەتى بويىنشا، نەسيە قارىزىن 90 كۇننەن استام ۋاقىتتا تولەمەگەن جاعدايدا، اقپارات كرەديتتىك بيۋرو جۇيەسىندە كورسەتىلەدى. سول ساتتەن باستاپ بانكتەر مەن ميكروقارجىلىق ۇيىمدار نەسيە بەرمەيتىن بولادى. سوندىقتان ءوزىڭىزدىڭ كرەديتتىك جاۋاپكەرشىلىگىڭىزگە مۇقيات بولعانىڭىز ءجون.
كرەديت تولەۋدى بىر-ەكى كۇنگە كەشىكتىرسە شە؟
ەگەر بىر-ەكى كۇن نەسيە تولەمىن ۋاقىتىندا تولەمەسەڭىز، قاتتى قوبالجۋدىڭ قاجەتى جوق. سول كەشىكتىرىلگەن ۋاقىتقا ەسەپتەلگەن ءوسىمىن (پەنيا) قوسىپ، وتەپ تاستاعان ابزال. ول جاعدايدا ەشقايدا اقپارات جىبەرىلمەيدى. تەك بانك مەنەدجەرى حابارلاسىپ، ەسكە سالۋى مۇمكىن. كرەديتتىك بيۋروعا اقپارات تەك نەسيەنى وتەۋ مەرزىمى 90 كۇنگە كەشىكتىرىلسە عانا بارادى.
كرەديتتىك وڭالتۋدى قالاي الۋعا بولادى؟
كرەديتتىك وڭالتۋ دەگەنىمىز – ءسىزدىڭ نەسيە تاريحىڭىز تۇزەلدى دەگەندى بىلدىرەدى. ياعني، بۇرىن ەش بانك كرەديت بەرمەسە، ەندى ولار سىزگە نەسيە بەرۋگە كەت ءارى ەمەس بولادى. ول كرەديتتىك بيۋروداعى ءسىزدىڭ دوسەڭىزدە كورسەتىلىپ تۇراتىن ستاتۋس. وسى مارتەبە اۆتوماتتى تۇردە ءوزى بەرىلەدى. وعان قانداي دا ءبىر قۇجاتتار تالاپ ەتىلمەيدى. ءراسىمدى كرەديتتىك بيۋرو مەرزىمى وتكەن بورىشتى وتەگەننەن كەيىن 12 اي وتكەن سوڭ جانە وسى كەزەڭدە وزگە دە مەرزىمى وتكەن بەرەشەك بولماعان كەزدە جۇرگىزەدى.
ەگەر ءسىز «قارا تىزىمدە» جۇرسەڭىز، ءبىراق ءقازىر بانك نەمەسە باسقا دا قارجى ۇيىمدارى الدىندا ەش قارىزىڭىز بولماسا، ءسىزدى مەملەكەت اۆتوماتتى تۇردە وڭالتۋى عاجاپ ەمەس. ونىڭ جايىن ءبىلۋ ءۇشىن ەگوۆتەن كرەديتتىك ەسەپ سۇراتىپ، ستاتۋستى تەكسەرىپ قويۋعا بولادى.
