ەكس-پرەزيدەنت نۇرسۇلتان نازاربايەۆتىڭ تۇڭعىشى داريعا مەن كەنجەسى ءاليا بىتىمگە كەلۋدەن باس تارتتى، - دەپ حابارلايدى Dalanews.kz.
نۇرسۇلتان نازاربايەۆتىڭ ۇلكەن جانە كىشى قىزدارى - داريعا مەن ءاليا اراسىنداعى "قىرعيقاباق" سوعىس اياقتالاتىن ءتۇرى جوق.
"نازاربايەۆ وليمپتەن تايعاننان كەيىن، اۋلەت ۇلكەندەرى داريعا مەن ءاليانى تاتۋلاستىرعىسى كەلگەن. سەبەبى، نازاربايەۆتىڭ وتباسى ىشىندەگى كيكىلجىڭ قازىرگى "جاڭا قازاقستان" جاعدايىندا ولارعا مۇلدە قاجەت ەمەس. الايدا سىڭلىلەردىڭ بىر-بىرىنە دەگەن وكپەسى تىم اۋىر سياقتى"، - دەيدى، جاعدايمەن جاقسى تانىس DALA INSIDE دەرەككوزى.
ولاردىڭ جانجالى داريعا نازاربايەۆانىڭ ۇلى ايسۇلتاننىڭ ەسىرتكىگە تاۋەلدى بولۋىنان باستالعان ەدى. اناسىنان قاشىپ كەتكەن ايسۇلتاندى ءاليا ءوز قامقورلىعىنا الادى. ارتىنان داريعا بالاسىن الىپ كەتۋگە كەلگەندە، ءاليا ونىڭ "بالانىڭ پسيحيكاسىن بۇزدى" دەپ ايىپتاعان. سول كەزدە نازاربايەۆتىڭ ۇلكەن قىزى "اۋلەتكە ەسىرتكىنى الىپ كەلگەن سەنسىن" دەپ، كىشى سىڭلىسىنە جۇدىرىق جۇمساعان دەگەن اقپارات بار.
ارتىنان داريعانىڭ روپ وپەراتورىنا شابۋىلى باستالدى. ءاۋ باستا ءوزىنىڭ قول استىندا ىستەگەن سانجار بوقايەۆتى روپ پەن ۋتيلالىمعا قارسى قويعان وسى داريعا نازاربايەۆا بولاتىن.
وسىدان كەيىن سىڭلىلەر ارالاسۋدى قويىپ، اۋلەتتىڭ تويى نەمەسە ولىم-جىتىمدەرىندە بىر-بىرىنەن اۋلاق جۇرەتىن بولعان. تاياۋدا ولاردى تاتۋلاستىرماق بولعان تۋىستارىنىڭ ارەكەتى ءساتسىز اياقتالدى.
"نازاربايەۆتىڭ كوزى ءتىرىسى كەزىندە عانا ولاردىڭ قىزدارىنا قاۋىپسىزدىك گارانتياسى بار. يسلام كارىموۆ ولگەننەن كەيىن ونىڭ قىزى، جالعاندى جالپاعىنان باسقان گۇلنار كارىموۆانىڭ قانداي كۇي كەشكەنى، اباقتىدا وتىرعانىن ءبارىمىز بىلەمىز. سوندىقتان دا، توم-توم بولىپ جينالىپ قويىلعان ءبىراز قىلمىستىق ءىستىڭ قوزعالماي جاتقانى دا ۋاقىتشا عانا"، - دەيدى، دەرەككوز.
DALA INSIDE كەزىندە قازاقستاندى ۋىسىندا ۇستاعان وتباسىنىڭ بىلىقتارى تۋرالى از جازعان جوق. جاقىندا داريعاعا قاتىستى ءبىر ينسايد دايىندالۋدا.
