اگەنتتىكتىڭ اقپاراتى بويىنشا نازاربايەۆ كىتاپحاناسىنىڭ ورىنباسارى وتكەن جىلعى جەلتوقسان ايىنىڭ ورتاسىندا قاماۋعا الىنعان. شايمەرگەنوۆتىڭ ۇستالعانىن پورتالعا استاناداعى سەنىمدى دەرەككوز حابارلاعان.
"دەرەككوزدىڭ ءمالىم ەتكەنىندەي كىتاپحانا قىزمەتكەرىن ارنايى قىزمەت وكىلدەرى ەلوردادا قۇرىقتاعان. ونىمەن بىرگە ايەلى دە قاماۋعا الىنعان. شايمەرگەنوۆتىڭ جۇبايى سىرت ەلدەردىڭ ءبىرىن زەرتتەۋمەن اينالىساتىن ينستيتۋتقا باسشىلىق ەتكەن"، – دەپ جازادى اگەنتتىك ءتىلشىسى.
رەسمي ورگاندار مەن كىتاپحانا تاراپىنان بۇعان قاتىستى قانداي دا ءبىر تۇسىنىكتەمە بەرىلمەدى.
شايمەرگەنوۆ بۇعان دەيىن نازاربايەۆ باسشىلىق ەتكەن قاۋىپسىزدىك كەڭەسىندە ىستەگەن، اەروعارىش جانە قورعانىس ونەركاسىبى ۆيسە-مينيسترى قىزمەتىن اتقارعان. سىرتقى ىستەر مينيسترلىگىندە حالىقارالىق اقپارات كوميتەتىنە جەتەكشىلىك ەتكەن.
سوڭعى جىلدارى نازاربايەۆ كىتاپحاناسىنىڭ باسشىلىق قۇرامىندا بولدى. ورتا ازيا مەن قىتايدى جەتىك بىلەتىن مامان دەپ سانالادى.
اقپارات وكىلدەرى وقيعانىڭ انىق-قانىعىن ءبىلۋ ماقساتىندا كىتاپحاناعا حابارلاسقانمەن ونداعىلار جاۋاپ بەرۋدەن باس تارتقان.
بۇعان دەيىن بيلىك باسىلىمدارىنا سۇحبات بەرگەن شايمەردەنوۆ: "نۇرسۇلتان نازاربايەۆ الەمدىك كوشباسشى-رەفورماتورلارمەن ءبىر قاتاردا تۇر"، – دەگەن بولاتىن.
ونىڭ پايىمداۋىنشا قازاقستاندى قارىشتاپ دامۋ جولىنا سالعان "نازاربايەۆ مودەلىنەن" باس تارتپاۋ قاجەت. تۇڭعىش پرەزيدەنت شەتەلدىك، ەۋروپالىق نەمەسە امەريكالىق دامۋ مودەلىن كوشىرە سالماعان.
الەمدىك تاجىريبەدەگى امبەباپ قاعيداتتاردى ىرىكتەي وتىرىپ، ول جولداردى ۇلتتىق كونتەكستكە شەبەر ەنگىزە بىلگەن. جاڭعىرتۋدىڭ ساتتىلىگى تۇڭعىش پرەزيدەنتتىڭ مەملەكەتتىك باسقارۋداعى مودەلىنە تىكەلەي بايلانىستى...
ءسوي دەگەن شايمەردەنوۆ قاڭتار قىرعىنىنان كەيىن ءبىرجولاتا بيلىكتەن كەتكەن ەكس-پرەزيدەنتتى اتاتۇرىك، شارل دە گولل، فرانكلين رۋزۆەلت، M.موحاماد، مارگارەت تەچەر، لي كۋان يۋ سەكىلدى ايگىلى قايراتكەرلەردىڭ قاتارىنا قوسقان ەدى.
https://youtu.be/k3084_Sj8io
