الماتى وبلىسىنىڭ اكىمدىگى قۇنى 118 ميلليون تەڭگەدەن باستالاتىن استاناداعى كوتتەدجدى ساتىلىمعا قويدى، - دەپ حابارلايدى Dalanews.kz.

fbrk.kz Telegram-ارناسىنداعى دەرەككە سۇيەنسەك، ەلەكترون ساۋدا الاڭىنىڭ سايتىنداعى مالىمەت بويىنشا "الماتى وبلىسىنىڭ قارجى باسقارماسى" مەملەكەتتىك مەكەمەسى استانا قالاسىنداعى 197،4 شارشى مەتر كوتتەدجدى ساتىلىمعا شىعارعان. بۇل - الماتى وبلىسى اكىمى اپپاراتىنىڭ "شارۋاشىلىق باسقارماسى" كمم بالانسىنداعى ءۇي.

ءۇيدىڭ باعاسى 118،3 ميلليون تەڭگەدەن باستالادى. باسپانا اۋكسيوندا ساتىلماق. 2023 جىلعى دەرەككە سايكەس، ءۇيدىڭ نارىقتاعى قۇنى 118،3 ميلليون تەڭگە. ساۋدا-ساتتىق 6 اقپاندا باستالادى.

1990 جىلى كىرپىشتەن سالىنعان ەكىقاباتتى ۇيدە 4 بولمە، 3 جۋىناتىن بولمە، اس ءۇي، ساۋنا جانە قازاندىق بار. ودان بولەك، ۋچاسكەدە گاراج، 2 ساراي جانە تەرراسا بار.

كوتتەدجدىڭ ناقتى كىمگە تيەسىلى ەكەنى بەلگىسىز.

ايتا كەتەيىك، بۇعان دەيىن ەكس-پرەزيدەنت نۇرسۇلتان نازاربايەۆقا تيەسىلى رەزيدەنسيا ساتىلىمعا شىققان بولاتىن.جەكە گولف كلۋبى بار رەزيدەنسيانىڭ الىپ جاتقان اۋماعى – 1600 شارشى مەتر. ەكس-پرەزيدەنتكە تيەسىلى بولعان رەزيدەنسيانى 3،5 ميللارد تەڭگەگە ساتىپ الا الاسىز.