تانىمال ساياساتكەر دوس كوشىم ASSYLTAS TV باعدارلاماسىندا جاڭا قازاقستاندا نازاربايەۆقا قانداي ءقاۋىپ بارىن ايتتى، - دەپ حابارلايدى Dalanews.kz.
دوس كوشىمنىڭ پىكىرىنشە، توقايەۆ - ەسكەرتكىش ورناتۋ، ەسىمىن ماڭىزدى نىساندارعا بەرۋ ماسەلەسىنە كەلگەندە مادەنيەتتى ادام.
"قاسىم-جومارت اعامىز - مادەنيەتتى، پاراساتتى ادام. ول ونداي نارسەگە جول بەرگەن جوق. مەنىڭ ويىمشا، كەلەشەكتە تاياقتىڭ ۇشى نازاربايەۆقا ءتيۋى ابدەن مۇمكىن. ...توقايەۆ مىرزا وسى جۇيەنى ساقتاپ قالۋ ءۇشىن، كۇرەسىپ جاتقانىن كورسەتۋ ءۇشىن نازاربايەۆتىڭ تۋىستارىن قۇرباندىققا شالادى. ودان كەيىن نازاربايەۆتىڭ ءوزىن قۇرباندىققا شالىپ جىبەرۋ وڭاي. سەبەبى بيلىكتى ساقتاپ قالۋ ءۇشىن سوعان بارۋعا تۋرا كەلەدى. ءقازىر "ادىلەتتى قازاقستان"، "جاڭا قازاقستان" دەگەن ۇراندارمەن ءجۇر عوي. كەشىرىڭىزدەر، بارلىعى كورىپ وتىر عوي، ءجۇز پايىز ەسكى قازاقستاندا بولعان ادامدار"، - دەيدى ول.
سونداي-اق، ساياساتتانۋشى ءترايباليزمدى قولدامايتىنىن، الايدا ەل ىشىندە "جالايىرلار بيلىككە كەلىپ جاتىر" دەگەن اڭگىمە بار ەكەنىن جەتكىزدى.
"ءقازىر جالايىرلار كوبەيىپ كەتىپتى، كنب-نىڭ باستىعى جالايىر ەكەن، ولجاس ءىنىمىز دە جالايىر ەكەن" دەگەن سوزدەر كوپ. بۇعان ءوز باسىم كۇلە قارايمىن. بىزدەن دە ۇلكەن ادامداردىڭ شىعاراتىنى ما؟! رۋشىلىق ءبولىنۋدى، ترايباليزم ماسەلەسىن ەش ۋاقىتتا مويىندامايتىن اداممىن. قازاقتا رۋ جوق بولسا، توپتاسپاي ما؟ توپتاسادى. ...رۋشىلدىقتى ساياسي ادامداردى توپتاستىرۋدىڭ قۇرالى ەتۋ دە بار. اسىرەسە، بۇل سايلاۋدا كوپ كورىنەدى. ءماسليحاتتىڭ سايلاۋىندا وتە كوپ، ءوزىم كوردىم. "اناۋ اتانىڭ بالاسىنا داۋىس بەرمە، مىناۋ ءوزىمىزدىڭ ادام" دەگەندى كوردىم"، - دەيدى دوس كوشىم.
