"ءبىر عانا سويلەممەن ايتا الامىن: قۇپتامايمىن، بۇل ماعان كەرەك ەمەس. وسى جايلى بۇرىننان اشىق ايتىپ كەلەمىن. بارلىق باسشىنىڭ كەڭەسشىسى بولعان مارك اۆرەليي "ءتىرى كەزىندە ەسكەرتكىش سالۋ - بولاشاق ۇرپاقتىڭ سەنى ەسكە الاتىنىنا سەنبەۋ" دەگەن. بارلىعىن ءىسى بويىنشا باعالاۋ كەرەك. ەشقانداي ەسكەرتكىش كەرەك ەمەس. كەزىندە داۋىس بەرىپ، شۋلاپ، قولداپ، لەنين مەن ستالينگە ەسكەرتكىش قويعىزعاندار سولاردى قايتادان قيراتتى"، - دەدى مەملەكەت باسشىسى.
"مەن تەك نازاربايەۆ ۋنيۆەرسيتەتكە ەسىمىمدى بەرۋگە كەلىسىم بەردىم، سەبەبى ەرەكشە وقۋ ورنى اشىلدى. بۇل بارلىق ۋنيۆەرسيتەتكە ۇلگى بولادى. حالىقتىڭ، ۇكىمەتتىڭ نازارىن اۋدارۋ ءۇشىن، وسى ۋنيۆەرسيتەتتىڭ قازاقستاننىڭ عىلىم ورتالىعى بولۋى ءۇشىن. سولاي بولىپ كەلە جاتىر دا. قالعانىنىڭ ەشقايسىسىنا كەلىسىمىمدى بەرگەن جوقپىن. سوندىقتان، وسى ءساتتى پايدالانا وتىرىپ، تاعى دا ايتامىن: بۇل ماعان قاجەت ەمەس، ماعان بۇل ۇنامايدى"
- دەدى پرەزيدەنت.
وسىعان دەيىن نازاربايەۆتىڭ مەرزىمىنەن بۇرىن سايلاۋ وتكىزۋ تۋرالى سۇراققا جاۋاپ بەرگەنى حابارلانعان ەدى. كەيىن جۋرناليستەر ساياسي باسەكەلەستىكتىڭ جوقتىعى جايلى سۇراق قويعان بولاتىن.
ەسكە سالايىق، كەزدەسۋگە قاتىسۋشىلار "قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك" اتتى جولداۋدى ىسكە اسىرۋ اياسىندا ەل ەكونوميكاسىن ترانسفورماسيالاۋ ۇدەرىسىنىڭ ءبىرقاتار اسپەكتىلەرىن، سىبايلاس جەمقورلىققا قارسى كۇرەس ماسەلەلەرىن، قازىرگى ساياسي جاڭعىرۋ كەزەڭىنىڭ ەرەكشەلىكتەرىن، بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندەگى قازاقستاننىڭ سىرتقى ساياسي باسىمدىقتارىن، سونداي-اق باسقا دا ماڭىزدى جايتتاردى تالقىلادى. كەزدەسۋگە "قازاقستان"، "حابار"، "مير" تەلەارنالارىنىڭ، "ايقىن" گازەتىنىڭ، "Esquire" جۋرنالىنىڭ، "قازاقپارات" اقپارات اگەنتتىگىنىڭ جۋرناليستەرى قاتىستى.
دەرەككوز: kaz.tengrinews.kz
